«Adrazajuć pa kavałku: spačatku Cichanoŭski, paśla Capkała, ciapier Babaryka»

Nierehistracyja Viktara Babaryki praciahvaje tuju taktyku, jakuju Alaksandr Łukašenka pryniaŭ jašče da abviaščeńnia vybaraŭ: adrazać alternatyvu pa kavałku. I nie davać apazicyi vyznačyć lidara.

Jašče da abviaščeńnia vybaraŭ byŭ aryštavany Siarhiej Cichanoŭski — na toj momant samy śmieły i aktyŭny praciŭnik Alaksandra Łukašenki.

A jašče raniej, kali ŭspomnić, była sarvanaja sproba niekalkich apazicyjnych partyj abrać adzinaha kandydata ad apazicyi. Hanna Kanapackaja i Andrej Dźmitryjeŭ, jakija stanuć kandydatami-spojlerami, mieli dačynieńnie da pravału toj kampanii.

Cichanoŭski nie byŭ hatovy da aryštu — jon nie pieradaŭ nikomu davieranaści na rehistracyju siabie ŭ jakaści kandydata. U vyniku zamiest jaho dakumienty padała jahonaja žonka Śviatłana — jana lubić muža i spačuvaje jahonaj spravie, ale ad palityki była dalokaja i, da taho ž, zaniataja małymi dziećmi, jakich joj niama na kaho pakinuć.

Ale ci varta vinić Cichanoŭskaha ŭ niepradbačlivaści? Nierehistracyja troch dziasiatkaŭ paplečnikaŭ Mikałaja Statkieviča Centrvybarkamam pakazvaje, što i Siarhieja Cichanoŭskaha mahli prosta nie zarehistravać. Cichanoŭskuju ž zarehistravali, bo jaje na toj momant nie bajalisia.

U hetaj vybarčaj honcy niama jasnych pravił, a CVK dziejničaje z adnoj metaj — asłabić lubuju alternatyvu Alaksandru Łukašenku, administracyja jakoha i pryznačanaja im viertykal vyznačaje, kamu zasiadać u vybarčych kamisijach.

Zdavałasia, usio schoplena, ale tut jak Pilip z kanapiel vyskačyli dva nie apošnija ŭ krainie čałavieki — Viktar Babaryka i Valeryj Capkała. Hetyja ludzi mieli i minułaje — sa svaimi plusami i minusami, — ale mieli i suviazi, i hrošy. 

Niekalki dzion ci tydniaŭ ludzi pryhladalisia da ich, ichnych dziejańniaŭ i kamandaŭ.

Niekalki dzion — i statystyka dałučeńnia da inicyjatyŭnych hrup, a paśla i da zboru podpisaŭ, pakazała, što prychilniki źmien z taho vybaru, jaki byŭ, schilajucca da Babaryki. Ale nie nastolki, kab usie inšyja apazicyjnyja asiarodki i partyi padtrymali najmajcniejšaha. Bolšaść praciahvała realizoŭvać svaje vuzkahrupavyja stratehii.

U toj ža čas vyzvaleny Siarhiej Cichanoŭski nie zasieŭ skłaŭšy ruki, a praciahvaŭ enierhična jeździć pa krainie i budzić narod. Stała vidavočna, što jaho pikiety pierarastajuć u vypleski narodnaha hnievu, i ŭžo 29 maja mižvolny kiraŭnik vybarčaha štaba ŭłasnaj žonki Cichanoŭski paŭ achviaraj pravakacyi — kraina ašarašana nazirała hetuju hańbu ŭ žyvym efiry.

Byŭ aryštavany nie tolki Cichanoŭski, ale i dziasiatak jaho paplečnikaŭ, zdolnych arhanizavać kampaniju pratestu.

Niekalki tysiač ludziej vychodziać na vulicy ŭ znak pratestu — ułady ŭ adkaz aryštoŭvajuć Sieviarynca, Statkieviča, Kabanava, Piatruchina i jašče dziasiatak ludziej, zdolnych vieści ludziej na vulicach.

Babaryka ŭ takoj situacyi byŭ vymušany radykalizavać svaju rytoryku, ale nie nastolki, kab imhnienna zaklikać da masavych pratestaŭ za vyzvaleńnie Cichanoŭskaha, Statkieviča dy inšych. Jon i jaho prychilniki ŭsio jašče spadziavalisia «chitra dažyć» da vybaraŭ. Ale heta byŭ nie 2001, nie 2006 i nie 2010 hod. Havaryć Babaryku zastavałasia niadoŭha. Jašče da kanca zboru podpisaŭ siłaviki aryštavali i jaho, i taksama dziasiatak najbližejšych paplečnikaŭ i kampańjonaŭ.

Babaryka pakinuŭ videa, dzie zaklikaŭ da praviadzieńnia refierendumu ab viartańni da Kanstytucyi-1994, ale nie pakinuŭ jasnaha płana, jak dziejničać u čas kampanii na vypadak svajho aryštu i nierehistracyi. 

Cichanoŭski da pasadki pryznavaŭ, što nie vyznačyŭsia da kanca, jak ludziam dziejničać 9 žniŭnia. Jon schilaŭsia da taktyki bajkotu i vychadu ludziej na centralnyja płoščy haradoŭ a 12-j hadzinie ŭ dzień vybaraŭ, ale zastaŭsia za krok ad taho, kab da niečaha zaklikać. 

Na svabodzie zastavaŭsia Valeryj Capkała, ale i jon, zdajecca, raźličvaŭ, što ŭłady nie navažacca zrezać usich alternatyŭnych kandydataŭ i pakinuć jahony šaniec na paśla. Capkała nie zaklikaŭ da masavych pratestaŭ suprać aryštu Cichanoŭskaha, Babaryki, Statkieviča i h. d. Projdzie tolki dva tydni, i nadydzie čarha Capkały. Vybarčyja kamisii abvieściać, što mienavita za Capkału (i Babaryku) podpisy tatalna niedastaviernyja. A dla viernaści byŭ raspaŭsiudžany brudny rolik z Capkałam u hałoŭnaj roli.

14 lipienia Jarmošyna abvieściła pra nierehistracyju Babaryki, ale zarehistravała Cichanoŭskuju. Taja pryšła atrymać paśviedčańnie, usia ŭ čornym, jak udava, ale nie zmahła navat razhornuta vystupić pierad CVK — i ŭžo tym bolš nie zaklikała da masavych akcyj za vyzvaleńnie svajho muža, inšych palitviaźniaŭ i svabodnyja vybary.

U svaju čarhu, abiezhałoŭleny štab Viktara Babaryki abmiežavaŭsia składańniem palcaŭ u sardečki i zaklikam da ludziej prychodzić 9 žniŭnia na vybary i hałasavać suprać Alaksandra Łukašenki, a taksama — usio heta vielmi niekankretna — «vykazvacca». 

Tak ułady sprabujuć adrazać pratestavyja koły, niby salami, pa kavałku. 

Hladzicie taksama: Vyjšaŭ film pra Viktara Babaryku

Apytanka

• 0
• 0
• 0
• 0
• 0
• 0
• 0
• 0