Supracoŭnikam milicyi zabaranili ŭjezd i vyjezd ź Viciebskaj vobłaści

Biełaruskim milicyjanieram zabaranili ŭjezd na terytoryju Viciebskaj vobłaści, a taksama vyjezd ź jaje. Jak minimum niekalki supracoŭnikaŭ milicyi znachodziacca na karancinie. Uviedzieny taksama istotnyja abmiežavańni na pierasoŭvańnie milicyjanieraŭ pa krainie. Takuju infarmacyju apublikavaŭ telehram-kanał NEXTA. U MUS zajaŭlajuć, što abmiežavańni na słužbovyja kamandziroŭki ŭviali nie tolki na Viciebščynie, ale i ŭ inšych rehijonach Biełarusi, piša Tut.by.

Sapraŭdnaść dakumienta, jaki raźmiaściŭ telehram-kanał NEXTA, paćviardžajuć krynicy TUT.BY u milicyi — z roznych rehijonaŭ i nie źviazanyja pamiž saboj.

Jany śćviardžajuć, što ŭ piatnicu, 27 sakavika, im daviali rasparadžeńnie ministra ŭnutranych spraŭ Juryja Karajeva, jakoje vyklučaje naviedvańnie Viciebskaj vobłaści, a taksama vyjezd ź jaje. Pry hetym, pa słovach pracaŭnikoŭ milicyi, havorka idzie tolki pra adzin rehijon krainy — mienavita Viciebski.

«Usich supracoŭnikaŭ aznajomili z hetym rasparadžeńniem ministra, milicejskamu kiraŭnictvu ź Viciebskaj vobłaści zabaranili navat pryjazdžać u Minsk na narady», — paviedamiŭ TUT.BY adzin z surazmoŭcaŭ.

«Milicyi zabaranili ŭjezd i vyjezd ź Viciebskaj vobłaści. Kali karancinu z-za karanavirusa u krainie niama, to čamu takija miery? Viciebsk stanovicca biełaruskim Bierhama?» — pytajecca adzin z čytačoŭ.

Aficyjny pradstaŭnik MUS Volha Čamadanava prakamientavała TUT.BY:

— U cełym pa našym viedamstvie ŭsie kamandziroŭki pa abłaściach rekamiendavali vyklučyć. Vyjazdžać za miežy svajho rehijonu supracoŭniki mohuć u vypadku samaj ekstranaj nieabchodnaści. I na siońnia nichto z našych supracoŭnikaŭ u kamandziroŭki ŭ inšyja rehijony faktyčna nie vyjazdžaje. Heta robicca ŭ epidemijałahičnych metach: dla paźbiahańnia kantaktaŭ, prafiłaktyki, niedapuščeńnia virusnych zachvorvańniaŭ.

Volha Čamadanava zapeŭnivaje, što heta tyčycca dziejnaści supracoŭnikaŭ milicyi pa ŭsioj Biełarusi:

— Hety pryncyp u roŭnaj stupieni vykonvajecca jak u Viciebskaj, tak i ŭ Mahiloŭskaj, Hrodzienskaj i ŭsich inšych abłaściach.

Nakont taho, ci znachodziacca zaraz niekatoryja supracoŭniki milicyi ź Viciebskaj vobłaści na karancinie z-za karanavirusa, aficyjny pradstaŭnik MUS adznačyła:

— Tak, u Viciebskim rehijonie jość supracoŭniki, jakija mohuć padazravacca ŭ zachvorvańni. Jany znachodziacca na abśledavańni. Ale heta nie havoryć pra toje, što ŭ ich karanavirus i što z-za hetaha my abmiežavali ŭjezd i vyjezd u vobłaść. U pieršuju čarhu heta epidemijałahičny składnik.

— Supracoŭniki, jakija znachodziacca pad padazreńniem, zdavali testy na najaŭnaść karanavirusnaj infiekcyi?

— Viadoma, jany vykonvajuć usie mierapryjemstvy, jakija prapanujuć [miedyki]. Ale ciapier niavažna, chto hetyja ludzi — milicyjaniery ci pradstaŭniki inšaj sacyjalnaj słužby. Samaja hałoŭnaja meta ciapier dla ŭsich — vykanańnie prafiłaktyčnych mierapryjemstvaŭ, jakija rekamienduje Ministerstva achovy zdaroŭja.

• 0
• 0
• 0
• 0
• 0
• 0
• 0
• 0