Z łyžnaj trasy ŭ Viaśniancy vyvoziać śnieh u Raŭbičy?
Adzinaje miesca ŭ Minsku, dzie hetaj zimoj šmat śniehu, — łyžarolernaja trasa ŭ Viaśniancy. Ale i adtul jaho mohuć pavieźci — u Raŭbičy. Pra heta TUT.BY paviedamiŭ čytač.
— Ja tolki što kataŭsia na trasie ŭ Viaśniancy, — raspavioŭ redakcyi čytač Alaksandr, łyžnik. — Tam vajennyja, padahnali mašyny, kažuć, buduć vyvozić śnieh! Ja pahutaryŭ z supracoŭnikam, jaki pracuje na trasie, jon patłumačyŭ, što śnieh paviazuć u Raŭbičy. Užo navat dzieciam paviedamili, jakija ŭ Viaśniancy zajmajucca, što spabornictvy tut zakančvajucca. Jak ža tak? Va ŭhodu niekalkim dniam čempijanatu vieźci śnieh?
U trasy ŭ Viaśniancy sapraŭdy pracujuć sałdaty — układvajuć pamosty. Jany raspaviali fotakarespandentu TUT.BY, što vyvozić śnieh płanujuć, kali mienavita — nie jasna, «dahavor jašče nie zaklučany».
Pakul śnieh na miescy — łyžniki katajucca.
Načalnik adździeła łyžarolernaj trasy futbolnaha kłuba «Minsk» Kanstancin Kalinoŭski admoviŭsia kamientavać situacyju, patłumačyŭšy, što nie viedaje detalaŭ rašeńnia.
— Technika padjechała. Mnie prosta skazali akazvać dapamohu. Ale takoha, kab trasu začyniali, niešta admianiali, — ja nie čuŭ. Pytańnie tolki, kolki mietraŭ zastaniecca.
U Raŭbičach, dzie ŭžo 26 lutaha startuje čempijanat Jeŭropy pa bijatłonie, ad kamientaroŭ taksama admovilisia, za imi nakiroŭvajuć u Ministerstva sportu i turyzmu — tam apieratyŭna niešta daviedacca nie ŭdałosia.
Nahadajem, na dniach trasu ŭ Raŭbičach prainśpiektavaŭ Alaksandr Łukašenka. Jon pryznaŭsia, što pieražyvaje z-za nadvorja.
— My zrobim trasu. Śniehu, vuń, bačycie, hory nastralali. Ceły dyvizijon harmat staić i našych, i nie našych. Tamu, kali daždžu nie budzie, čempijanat Jeŭropy i etap kubka my praviadziem hodna. Nie padviadziem mižnarodnikaŭ, jakija prosta nas paprasili vyratavać ich, tamu što nidzie niama śniehu.
Čempijanat Jeŭropy pavinien byŭ prajści ŭ Estonii, adnak tam ad praviadzieńnia mierapryjemstvaŭ admovilisia z-za adsutnaści śniehu. Zrešty, sa śnieham i ŭ nas napružanka. Za aknom — ustojlivy plus, klimatyčnaja zima ŭ hetym siezonie da hetaha času nie nastupiła.
Kamientary