Haspadarka pad Słonimam na papiery pradała ludziam 200 karoŭ, tolki sami viaskoŭcy tych karoŭ u vočy nie bačyli
U KSUP «Miževičy» ludzi nibyta vypisvali karoŭ dla svaich padsobnych haspadarak. Pry hetym ź ich bralisia hrošy, ale sami žyvioły tajamničym čynam źnikali pa darozie da novych uładalnikaŭ. Heta značyć, ludziam vypisvali miortvyja dušy karoŭ, piša «Hazieta Słonimskaja».
— Na ludziej vypisvajuć žyviołu, ale jany i viedać nie viedajuć, što źjaŭlajucca ŭładalnikami karoŭ. Tak, naprykład, na adnaho, na siońniašni dzień užo byłoha, pracaŭnika žyviołahadoŭčaha kompleksu ŭ Miževičach vypisali adrazu 14 karoŭ. Nasamreč u jaho ŭ haspadarcy niama ni adnoj karovy. Ale 14 — heta nie miaža. Na adnu z rabotnic haspadarki vypisali 18 karoŭ. Kamuści vypisvali 2, kamuści 4, va ŭsich pa-roznamu. A ŭsiaho nasielnictva nibyta kupiła bolš za 200 karoŭ. Ciapier finansavaja milicyja raźbirajecca z hetymi faktami. I kali milicyjanty apytvajuć haspadaroŭ, akazvajecca, ludzi viedać nie viedali, što kuplali karoŭ, — raspaviała karespandentu «HS» pra situacyju ŭ haspadarcy adna ź miascovych žycharak.
— Kali žychary pačali aburacca, my źviarnulisia ŭ Departamient finansavych rasśledavańniaŭ Słonimskaha rajona. Tam pa dakumientach karoŭ ludzi kuplali, ale nasamreč jany hetaha nie rabili. Na minułym tydni ja chadziŭ da načalnika finansavaj milicyi ŭ Słonimie, i jon paviedamiŭ, što ŭžo zaviedziena kryminalnaja sprava i jany pravodziać rasśledavańnie, — raspavioŭ karespandentu «HS» słonimski hramadski aktyvist Viktar Marčyk.
Pa hetych faktach, jakija mieli miesca ŭ 2019 hodzie, raspačata kryminalnaja sprava pa č. 2. art. 424 KK Respubliki Biełaruś — złoŭžyvańnie ŭładaj abo słužbovymi paŭnamoctvami. Sankcyi pa hetym artykule praduhledžvajuć pazbaŭleńnie voli na termin ad dvuch da šaści hadoŭ sa štrafam abo biez štrafu i z pazbaŭleńniem prava zajmać peŭnyja pasady abo zajmacca peŭnaj dziejnaściu, adznačyŭ u razmovie z karespandentam «HS» načalnik Słonimskaha MA UDFR Siarhiej Tuptała.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7676
Kamientary