Sudziać anarchistaŭ, jakija niaŭdała sprabavali dakinuć «kaktejl Mołatava» da Vaładarki. Škoda — 1,5 rubla FOTY
U sudzie Savieckaha rajona Minska pačaŭsia praces pa spravie dvuch anarchistaŭ. Mikitu Jemialjanava i Ivana Komara vinavaciać u dźviuch akcyjach, ich mohuć pasadzić na termin da 12 hadoŭ.
Abodvum pa 19 hadoŭ. Komar da zatrymańnia pracavaŭ stalarom, Jemialjanaŭ pracavaŭ kurjeram.
Abodva junaki pad vartaj z kastryčnika 2019 hoda. Pa viersii śledstva, Jemialjanaŭ i Komar u vieraśni zakidali budynak Minskaha haradskoha suda lampačkami z farbaj, a ŭ kastryčniku kinuli «kaktejl Mołatava» ŭ SIZA na Vaładarskaha. Takim čynam chłopcy vykazali pratest suprać suda nad inšym anarchistam — Źmitrom Palijenkam.
Ciapier Jemialjanava i Komara mohuć pakarać pa dvuch artykułach kryminalnaha kodeksa: vytvorčaść i vykarystańnie taho «kaktejla Mołatava» i zamach na naŭmysnaje paškodžańnie historyka-kulturnaj kaštoŭnaści, ździejśnienaje hrupaj asob. Pakarańnie suvoraje: ad 3 da 12 hadoŭ.
Jašče kali chłopcy byli ŭ SIZA, ich paplečniki paviedamlali, što ad pakazańniaŭ i supracy sa śledstvam Jemialjanaŭ admoviŭsia, u adroźnieńnie ad Komara.
Škodu budynku suda ad dziejańniaŭ chłopcaŭ acanili ŭ 140 rubloŭ, Vaładarka ž «paciarpieła» na 1,5 rubla, bo haručaje rečyva ŭ «kaktejli Mołatava» nie zaharełasia. Darečy, usiu škodu jany ŭžo apłacili, ale vinu nie pryznajuć.
Padtrymać anarchistaŭ pryjšli Mikoła Dziadok, Jaŭhien Afnahiel, Volha Mikałajčyk i paru dziasiatkaŭ siabroŭ. U svaju čarhu, milicyja vystaviła až dźvie ramki mietałašukalnikaŭ na ŭvachodzie, kožnaha dahladali pierad załaj suda, kala budynka dziažuryŭ AMAP, a vakoł kletki z abvinavačanymi stajała ažno piaciora milicyjantaŭ u broniekamizelkach. Takija miery biaśpieki nie prymianiajucca navat na pracesach nad zabojcami.
Ciapier čytajuć
U biełaruski ŭ Italii zabrali dvuch synoŭ — bo jana nie pryznavała dziaržavu i nie adpuskała dziaciej u škołu i da doktara6
Kamientary