Hramadskaja pałata Sajuznaj dziaržavy zaklikała biełaruskija ŭłady padtrymać «Viečiernij Mohilov»
Hrupa členaŭ Hramadskaj pałaty Sajuznaj dziaržavy Biełarusi i Rasii vystupiła ŭ padtrymku skandalnaj haziety «Viečiernij Mohilov», jakaja adznačyłasia šmatlikimi vypadami ŭ bok ŁHBT.
Svoj zvarot jany apublikavali ŭ № 63 haziety za 9 žniŭnia.
— Siabry Hramadskaj pałaty z tryvohaj i zaniepakojenaściu nazirajuć za raźvićciom padziej vakoł sudovaha pieraśledu haziety «Viečiernij Mohilov», — adznačajecca ŭ zvarocie.
Pa słovach pradstaŭnikoŭ Hramadskaj pałaty, u ich składvajecca ŭražańnie, što z dapamohaj Leninskaha RAUS Mahilova, Ministerstva infarmacyi i inšych dziaržorhanaŭ Biełarusi «adbyvajecca nieaściarožnaja padmiena paniaćciaŭ i skažeńnie sensaŭ».
— Adbyvajecca napampoŭvańnie imidžu pradstaŭnikoŭ ŁHBT supolnaści, jak asablivych pradstaŭnikoŭ pryvilejavanaj supolnaści, pačućcio nieprymańnia da jakich źjaŭlajecca apryjory niepravamiernym. Pry hetym nijak nie zhadvajucca ni našy narodnyja tradycyi, ni relihijnyja zabarony (va ŭsich biez vyklučeńnia relihijach), ni asnovatvornaje prava kožnaha čałavieka (u tym liku žurnalista) na adstojvańnie svajho mierkavańnia, chaj i admoŭnaha, na tuju ci inšuju padzieju ŭ hramadstvie. Takim čynam, u ludziej, asabliva maładych, składvajecca ŭražańnie nie tolki ab naturalnaści adnapołych adnosin, pryznańni na dziaržaŭnym uzroŭni pałavych vyčvareńniaŭ, ale i maralnaści tych, chto prapahanduje heta, nie saromiejučysia, vynosić u infarmacyjnaje pole, — adznačajecca ŭ zvarocie.
Zvarot padpisany Andrejem Leanidavičam Łapackim — «ad imia i pa daručeńni siabraŭ Hramadskaj pałaty Sajuznaj dziaržavy».
«Hramadskaja pałata Sajuznaj dziaržavy Biełarusi i Rasii» była ŭtvoranaja ŭ 2017 hodzie, uvajšli ŭ pałatu viadomyja ŭ Biełarusi i Rasii asoby: relihijnyja dziejačy, palityki, spartsmieny, kasmanaŭty. Usiaho bolš za 200 čałaviek. Ofis arhanizacyi znachodzicca ŭ Maskvie.
Siabrami pałaty taksama źjaŭlajucca atlet Fomačkin, jaki pranios rasijski ściah na adkryćci Paralimpijady ŭ Rya, Andrej Hieraščanka, jakoha zvolnili ŭ Viciebsku z pracy za admaŭleńnie niezaležnaści Biełarusi, paet-słavianafił Anatol Aŭrucin, viadomy svaimi impierskimi pohladami Siarhiej Baburyn, akcior Uładzimir Haściuchin, dačka Piatra Mašerava Natalla, kasmanaŭty Klimuk i Navicki, śviatar Usievaład Čaplin i mnohija inšyja.
«ZŠA chočuć narmalizacyi litoŭska-biełaruskich adnosin. Adsiul i ruchi z ofisam Cichanoŭskaj»9
Kamientary