60‑hadovaja pjanaja biełaruska pieratvaryła palot z Paryža ŭ Vilniu ŭ kašmar
Uviečary 8 kastryčnika rejs avijakampanii Ryanair z Paryža ŭ Vilniu nadoŭha zastaniecca ŭ pamiaci jaho pasažyraŭ. Pjanaja hramadzianka Biełarusi, jakaja bujaniła na borcie, pieratvaryła palot u sapraŭdny kašmar. Adnak nijakaha pakarańnia za incydent jana nie paniasie — palicyja, jakaja sustreła jaje ŭ aeraporcie, prosta praviała žančynu z budynka i adpuściła, piša lrytas.lt.
Pra zdareńnie na borcie samalota Ryanair, jaki lacieŭ z Paryža ŭ Vilniu, redakcyi Lrytas.lt paviedamili vidavočcy. Adzin z pasažyraŭ raskazaŭ, što incydent spravakavała prykładna 60‑hadovaja ruskamoŭnaja žančyna.
«Jana kryčała, łajałasia, pavodziła siabie absalutna nieadekvatna, ekipaž sprabavaŭ jaje supakoić. Była vidavočna pjanaja, napałochała dziaciej. Pobač siadzieła žančyna z dvuma małymi, i ekipaž vymušany byŭ pierasadzić ich dalej ad hetaj bujanaj pasažyrki. Potym, užo ŭ aŭtobusie, ja čuŭ, jak dzieci ŭsio jašče havaryli maci, što im strašna, a maci ich supakojvała», — raskazaŭ vidavočca.
Paśla pasadki samalota ŭsich pasažyraŭ paprasili zastavacca na svaich miescach. Nieŭzabavie ŭ sałon uvajšli palicejskija i vyvieli žančynu.
Jak vyśvietliłasia padčas rasśledavańnia Lrytas.lt, bujaniła hramadzianka Biełarusi, jakaja, pavodle papiarednich danych, maje dazvoł na žycharstva ŭ Italii.
Ekipaž jašče padčas palotu paviedamiŭ naziemnym słužbam pra nieadekvatnyja pavodziny pjanaj žančyny. Tamu paśla pryziamleńnia samalota jaho ŭžo čakali pamiežniki, supracoŭniki słužby hramadskaj biaśpieki, achova aeraporta i palicyja Vilni.
Jak paviedamili Lrytas.lt u Hałoŭnym upraŭleńni palicyi Vilenskaha rehijona, vyklik u aeraport pastupiŭ 8 kastryčnika kala 23:49. Supracoŭnik aeraporta paviedamiŭ, što ekipaž prosić dapamohi z-za nieadekvatnych pavodzin žančyny na borcie samalota, jaki lacić z Paryža.
Palicyja była prainfarmavanaja, što samalot užo pryziamlajecca ŭ Vilni. Paśla prybyćcia da borta jany vyvieli vidavočna pjanuju hramadzianku Biełarusi.
«Žančyna była praviedziena z aeraporta. Nichto nie padaŭ zajavu adnosna jaje pavodzin», — paviedamiła palicyja Vilni.
Pieršapačatkova mierkavałasia, što zajava budzie padadzienaja, ale kali palicejskija ŭvajšli ŭ samalot, žančyna ŭžo supakoiłasia i pavodziła siabie narmalna.
U suviazi z hetym, a taksama z adsutnaściu zajavy, u palicyi nie było padstaŭ zatrymlivać jaje daŭžej. Tamu jaje adpuścili, paviedamili ŭ palicyi.
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary