Kolki kaštuje pajeści ŭ elitnym francuzskim restaranie Viktara Łukašenki?
Vytančanaje francuzskaje bistro Le Château 27, jakoje faktyčna naležyć staršyni NAK Viktaru Łukašenku, adkryłasia ŭ Minsku sioleta ŭ mai.
Šef-kuchar u Le Château 27 toj samy, što i ŭ «Lebiadzinym», — Mikita Čychačoŭ. Sioleta jon vyjhraŭ załaty miedal na mižnarodnym konkursie Chef of the world, jaki prachodziŭ u Kitai.
U asnoŭnym mieniu restarana ceny takija: ślimakoŭ možna pajeści za 21 rubiel, adna vustryca z dadatkam — 19‑21 rubiel, sałaty — za 31‑35 rubloŭ, supy — za 19‑29 rubloŭ. Samaja darahaja z hałoŭnych straŭ — heta stejk rasini z fua-hra i bułačkaj bryjoš, jaki kaštuje 59 rubloŭ. Samaja tannaja — heta kaŭbasa z kački i fua-hra ź piure i sousam žu za 37 rubloŭ.
Desierty ŭ Le Château 27 kaštujuć ad 12 da 21 rubla.
Kolki kaštujuć brančy? Minskaja błohierka, jakaja zazirnuła ŭ restaran na branč ź siabroŭkaj, zakazała na dvaich niašmat — pa «rybnym śniadanku» i adzin čajnik fruktovaj harbaty na dvaich. U toj śniadanak za 29 rubloŭ uvachodzić ryjet (heta nakštałt paštetu) i tartar sa stronhi, krem-avakada, jajka, špinat, bułačka bryjoš.
Ahulny rachunak u vyniku skłaŭ 73 rubli.
Kali brać na śniadanak jaječniu — kaniešnie, jana tut budzie nie prosta ź piercam, a jašče i z chamonam z kački — heta abydziecca ŭ 23 rubli. A, naprykład, francuzski tost z tartaram ź jałavičyny dy musam bry ŭsie 33.
Za kruasan z apielsinavym džemam prosiać 10 rubloŭ, a za vareniki ź višniami i rykotaj — 19.
Ciapier restaran udzielničaje ŭ prajekcie vysokaj kuchni i prapanuje naviedvalnikam vytančany set pa canie 99 rubloŭ (raźličanyja porcyi na adnaho čałavieka). Dapoŭnić jaho prapanoŭvajuć šampanskim (35 rubloŭ za 125 mililitraŭ) ci kańjakom (21 rubiel za 40 mililitraŭ).
Rekłamavać Le Château užo prylataŭ Apci Azijeŭ — biełaruski dyzajnier, jaki staŭ suśvietna viadomym dziakujučy svaim virusnym videa ŭ sacyjalnych sietkach. Jon nachvalvaŭ burhier z tuncom za 55 rubloŭ.
U roliku Apci ŭ svajoj tradycyjnaj maniery spačatku nieachajna pje napoj, raźlivajučy jaho, zatym tak ža nieachajna pichaje burhier sabie ŭ rot, a potym i aficyjantcy. Vyhladaje davoli abraźliva, ale rekłama ŭ instahramie Apci pryniesła restaranu kala 380 tysiač prahladaŭ.
Ciapier čytajuć
Zahinuŭ biełaruski dobraachvotnik Vasil «Dzir» Rapicki11
Kamientary