Jeŭrapiejcy kuplali ŭ Kitai ŭsio, ciapier pačali kuplać i aŭtamabili. Pramysłovaść Hiermanii abvaliłasia da ŭzroŭniu 2005 hoda
Naviny z Hiermanii, ekanamičnaha łakamatyva ŭsiaho Jeŭrasajuza, vyklikajuć usio bolšuju tryvohu. Apošnija danyja pakazali, što pramysłovaja vytvorčaść krainy abvaliłasia da ŭzroŭniu amal 20‑hadovaj daŭniny. Čamu tak adbyłosia, raźbirałasia Financial Times.
Pavodle aficyjnaj statystyki, u žniŭni pramysłovaść Hiermanii skaraciłasia na 4,3% u paraŭnańni ź lipieniem. Heta našmat horš za lubyja prahnozy analitykaŭ. Ale sapraŭdny šok — heta ličby pa aŭtamabilnaj halinie: vytvorčaść tut abrynułasia na niejmaviernyja 18,5% usiaho za adzin miesiac.
Kali nie brać u raźlik karotkija pieryjady suśvietnych kryzisaŭ (jak u 2008 hodzie ci padčas pandemii), to niamieckija zavody siońnia pracujuć na ŭzroŭni 2005 hoda. A vytvorčaść aŭtamabilaŭ apuściłasia da minimumu z 2000 hoda.
Ekśpierty bjuć tryvohu. «Pramysłovaja vytvorčaść Hiermanii lacić u prorvu», — tak emacyjna apisaŭ situacyju Karsten Bžeski (Carsten Brzeski), kiraŭnik makraekanamičnaha adździeła banka ING. Pavodle jaho, kraina znoŭ apynułasia za krok ad «techničnaj recesii» — heta kali ekanomika skaračajecca dva kvartały zapar.
Kłaŭs Vistesien (Claus Vistesen), hałoŭny ekanamist pa jeŭrazonie ŭ kansałtynhavaj kampanii Pantheon Macroeconomics, nazvaŭ danyja «žachlivymi», ale adznačyŭ, što na ličby mahli paŭpłyvać i razavyja faktary.
Pavodle niamieckaha statystyčnaha ŭpraŭleńnia, «rezkaje źnižeńnie» vytvorčaści aŭtamabilaŭ častkova vyklikana bolš poźnimi štohadovymi adpačynkami na zavodach i pieranaładkaj vytvorčych linij.
Čamu ŭsio tak kiepska z ekanomikaj u Hiermanii?
Jak ličać analityki, reč nie ŭ letnich adpačynkach na zavodach. Havorka idzie pra ceły kompleks hłybokich strukturnych vyklikaŭ.
Pa-pieršaje, niamieckija hihanty BMW, Volkswagen i Mercedes vidavočna spaźniajucca ź pierachodam na elektrakary i pačynajuć prajhravać kankurencyju.
Pa-druhoje, kardynalna źmianiłasia rola Kitaja: z adnaho z najbujniejšych rynkaŭ zbytu jon pieratvaryŭsia ŭ mahutnaha kankurenta. Jak vynik, prodažy niamieckich aŭto ŭ samim Kitai značna ŭpali, a kitajskija elektramabili ŭžo aktyŭna zachoplivajuć nie tolki svoj, ale i jeŭrapiejski rynak.
Akramia taho, pa niamieckim eksparcie bjuć amierykanskija impartnyja myty. U vyniku ŭsiaho hetaha ekanomika Hiermanii, mocna zaležnaja ad ekspartu pramysłovaj pradukcyi, užo bolš za try hady znachodzicca ŭ stanie stahnacyi, abo, praściej kažučy, topčacca na miescy.
Ci jość nadzieja na palapšeńnie ekanamičnaj situacyi ŭ Hiermanii?
Niahledziačy na zmročnuju karcinu, Asacyjacyja niamieckich bankaŭ prahnazuje, što haspadarka krainy da 2026 hoda vierniecca da rostu. Na ich dumku, značnaje pavieličeńnie dziaržaŭnych vydatkaŭ na abaronu i infrastrukturu moža zabiaśpiečyć rost VUP na 1,4% u nastupnym hodzie paśla ścipłych 0,2% u 2025-m.
«My narešcie bačym tryvałuju asnovu dla značnaha ekanamičnaha rostu ŭ nastupnym hodzie», — zajaviŭ kiraŭnik asacyjacyi Chajnier Chierkienchof (Heiner Herkenhoff).
Adnak pakul što heta tolki prahnozy. Siońnia ž vidavočna adno: ekanamičny ruchavik Jeŭropy daŭ surjozny zboj. U bližejšyja dni kancler Hiermanii Frydrych Mierc terminova sustreniecca z kiraŭnikami aŭtamabilnych kancernaŭ, kab abmierkavać šlachi vychadu z kryzisu.
Prodažy «Tesły» ŭ Jeŭropie katastrafična ŭpali. I vinavaty ŭ hetym kitajcy
Kitajski aŭtapram imkliva zavajoŭvaje Jeŭropu. Zamiest svaich lehiend jeŭrapiejskija zavody vypuskajuć aŭto z Padniabiesnaj
Patreby NATA mianiajuć ekanomiku Jeŭropy. Ale jeŭrapiejskaj abaroncy nie chapaje šerahu krytyčna važnych praduktaŭ
Kamientary