«Kadebist vyjšaŭ z pakoja i pakinuŭ śviataru pistalet». Što adbyvajecca z ksiandzom Akałatovičam, jakoha abvinavacili ŭ špijanažy

U čakańni suda Akałatovič pavodziŭ siabie vielmi badziora i rašuča, niahledziačy na prablemy sa zdaroŭjem — 65‑hadovy mužčyna pieranios infarkt, i ŭ jaho vydaleny straŭnik u suviazi z ankałahičnym zachvorvańniem.

«Za ŭsimi navinami sačyŭ, Ukrainu padtrymlivaŭ, łajaŭ pastajanna Łukašenku i Pucina ŭ kamiery. Tam usie bajalisia i słova skazać, bo prasłuchoŭka ŭ kožnaj kamiery i ludzi siadziać, jakija [padsłuchoŭvajuć]. A jon zusim nie bajaŭsia ničoha». 

Administracyja SIZA i śledčyja stavilisia da jaho nadzvyčaj drenna, bo vinu Akałatovič nie pryznavaŭ. Adnojčy Akałatoviča vyklikali na razmovu da supracoŭnika KDB. Toj vyjšaŭ z pakoja, dzie adbyvałasia sustreča, i pakinuŭ śviataru pistalet. «Chacieli pahladzieć, što ksiondz rabić budzie, pravakacyja takaja była: zastrelicca ci nie».

Adzin raz kadebist kazaŭ Akałatoviču: «My vaŭki, chočam miasa». Na heta śviatar vyrašyŭ napisać Ciercielu: spytaŭ, čaho heta KDB zarobki nie płacić, što jany miasa nie jaduć, i zaprasiŭ da siabie ŭ Vałožyn, kab nasmažyć im miasa i pačastavać.

Śledčy, jaki vioŭ spravu ksiandza, kazaŭ inšym źniavolenym, što toj «tolki prykidvajecca prastačkom, a nasamreč — špijon».

Da prysudu ksiondz staviŭsia spakojna. Raskazvaŭ inšym źniavolenym historyi śviataroŭ, jakija adsiadzieli ci prajšli HUŁAH u časy Savieckaha sajuza.

«Jaho bolš chvalavała, što siłaviki zabrali mašynu, jakuju parafii padaryŭ Papa. Kazaŭ: «Jak tak? Chaj sabie prysud, a što, buduć pisać, što Łukašenka zabraŭ padarunak Papy? Heta hańba zusim». 

Taksama ksiondz chvalavaŭsia, što siłaviki zabrali ŭ kaścioła hrošy, jakija vierniki źbirali na ramont budynku. Było tam «kiłahramaŭ 50 manietami» sabrana.

Vałožynskaha ksiandza Hienrycha Akałatoviča zatrymali ŭ listapadzie 2023 hoda. Siłaviki abvinavacili jaho ŭ «zdradzie dziaržavie». 30 śniežnia 2024 hoda mužčynu asudzili da 11 hadoŭ kałonii.

U pasłańni da viernikaŭ, jakoje śviatar dasłaŭ z-za krataŭ, jon napisaŭ, što, pa mierkavańni śledstva, udzielničaŭ u «špijanažy na karyść Polščy i Vatykana». Akałatovič tady padkreśliŭ, što nikoli nie byŭ nijakim špijonam, što jon — słuha Boha, a sudziać nasamreč nie jaho adnaho, a ŭsiu Katalickuju carkvu ŭ Biełarusi.

Inicyjatyva katolik.life raniej paviedamlała, što paśla prysudu Akałatoviču ŭ jaho i ŭ parafii kanfiskavali nie tolki hrošy, ale i ikony.

Hienrych Akałatovič naradziŭsia ŭ Novaj Myšy pad Baranavičami ŭ 1960 hodzie ŭ polskaj pa śviadomaści siamji.

Jon pryjšoŭ da śviatarstva jašče ŭ časy savieckaha ateizmu. Junakom Akałatovič vučyŭsia ŭ padpolnaj sieminaryi ŭ Niadźviedcy pad Lachavičami. Adsłužyŭ u armii, vyvučyŭsia na čyhunačnika, ale praciahvaŭ dabivacca ad uładaŭ prava na aficyjnaje navučańnie ŭ sieminaryi. Vyśviaciŭ jaho tajemna biskup Vincentas Sładkiavičus u 1984 hodzie.

Hienrych Akałatovič słužyŭ probaščam u Brasłavie, Rakavie, Niaśvižy, Babrujsku. Byŭ pieršym ksiandzom, jaki naviedaŭ Katyń. Heta było ŭ 1984 hodzie, ułady jaho za heta tam zatrymali i aštrafavali. Usiaho Saviety štrafavali jaho kala 30 razoŭ.

Rodny brat śviatara Leanard taksama ksiondz.

• 3
• 0
• 0
• 7
• 0
• 10
• 9
• 7