U ZŠA pachavajuć biełaruskaha piśmieńnika, jaki źnik bieź źviestak u 1976 hodzie
Mikoła Celeš prapaŭ bieź źviestak amal 50 hadoŭ tamu.
24 kastryčnika, amal praz 50 hadoŭ paśla śmierci adbudziecca pachavańnie biełaruskaha piśmieńnika Mikoły Celeša. Jon źnik bieź viestak u 1976 h.
Niadaŭna jahonaje cieła, znojdzienaje, jak vyśvietliłasia, jašče ŭ 1991 h., zmahli identyfikavać i ciapier jano budzie pachavanaje na mohiłkach carkvy Žyrovickaj Božaj Maci BAPC u Ist-Branśviku (štat Ńju-Džersi), paviedamiła ŭ svaim fejsbuku daśledčyca biełaruskaj emihracyi Natalla Hardzijenka.
U piatnicu, 24 kastryčnika, a 10.00 adbudziecca adpiavańnie ŭ Pachavalnym domie Mališeŭskaha, a potym ułasna pachavańnie na mohiłkach u Ist-Branśviku.
Padrabiaznaściaŭ hetaj spravy niama. Natalla Hardzijenka ŭ kamientarach da svajho dopisu napisała, što na pachavańni buduć palicejskija, a jana pasprabuje daviedacca padrabiaznaści.
Mikoła Celeš naradziŭsia 25 lipienia 1900 h. u vioscy Zazierje (ciapier Lepielski rajon). Vučyŭsia ŭ Białynickaj narodnaj vučelni da 1914 h., kali baćku adpravili ŭ vojska. Ad 1916 h. žyŭ u Varoniežy, pracavaŭ na pošcie, potym pierabraŭsia ŭ Kadzijeŭku va Ukrainie. U 1919 h. skončyŭ ahulnaadukacyjnyja kursy i byŭ mabilizavany ŭ Čyrvonuju Armiju. Demabilizavaŭsia ŭ 1922 h. i pryjechaŭ u Minsk.
Ad 1929 h. pačaŭ drukavacca ŭ pieryjodykach. Pracavaŭ u časopisie «Palaŭničy Biełarusi», vydaŭ knihi apaviadańniaŭ, u tym liku j dla dziaciej: «Apaviadańni palaŭničaha» (1931), «Sa strelbaj i sabakam» (1932), «Kuryłka: zapiski vučnia carkoŭnaprychodskaj škoły» (1935, 1938), «Znachodka» (1939) i «Buśka» (1939).
U časie niamieckaj akupacyi Mikoła Celeš pracavaŭ u «Biełaruskaj hazecie». Ad leta 1944 h. žyŭ na emihracyi. Spačatku — u Niamieččynie. U 1949 h. vyjechaŭ u ZŠA. Žyŭ u Ńju-Jorku. Zarablaŭ fizičnaj pracaj.
Byŭ siabram Biełaruska-amierykanskaha zadzinočańnia. Na emihracyi vyjšli «Dziesiać apaviadańniaŭ» (1965) i paśmiarotna vydadzieny Biełaruskim instytutam navuki j mastactva zbor tvoraŭ «Chmary nad Baćkaŭščynaj» (układzieny Lavonam Jurevičam, 1995). Pisaŭ pad psieŭdanimam Marcin Lucič.
Biasśledna prapaŭ u 1976 hodzie.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja45
Kamientary
Chmary nad Baćkaŭščynaj
https://kamunikat.org/khmary-nad-batskawshchynay-tselesh-mikola
Lepšaje što ja mahu zrabić , heta pačytać .
Viečnaja pamiać.