Čym niebiaśpiečnaja mabilnaja prahrama FaceApp, jakaja sastarvaje vašy tvary

U apošnija dni druhuju chvalu virusnaj papularnaści atrymała prahrama FaceApp, jakaja ŭmieła moža sastaryć vašy tvary. Ci moža stajać za niavinnaj zabavaj niebiaśpieka dla vašych danych na telefonie?

Pavialičyć

Jašče ŭ 2017 hodzie zachodnija ŚMI pisali pra ryzyki, źviazanyja z hetaj prahramaj. Prablema z hetym dadatkam (jak i z mnohimi inšymi) na vašym telefonie ŭ tym, što niezrazumieła, što adbyvajecca z usimi danymi, jakija vy jamu dajacie.

Padobnyja prahramy źbirajuć vielizarnyja abjomy piersanalnych danych, i my pakul što nie viedajem, jak hetyja danyja zmohuć vykarystoŭvacca ŭ budučyni. Varyjantaŭ masa: jany mohuć vykarystoŭvacca nie tolki dla tarhietavańnia rekłamy, ale i dla manipulacyjaj hramadskaj dumkaj na vybarach.

Advakat Majkł Bredli, kiraŭnik Marque Lawyers, u intervju ABC Australia raspavioŭ, što ŭ palitycy pryvatnaści FaceApp ničoha nie havorycca pra toje, što adbudziecca z vašymi danymi, kali vy pierastaniecie karystacca servisam.

«Heta śviedčyć ab tym, što, kali jany pradaduć svoj biznes, vašyja danyja buduć apracoŭvacca, i vy daście zhodu na heta», — skazaŭ jon.

«Raspaznańnie tvaraŭ chutka stanovicca adnym z klučavych elemientaŭ ličbavaj identyčnaści, tamu ludzi pavinny razhledzieć mahčymaść abarony svajho tvaru hetak ža, jak jany pavinny abaraniać inšyja elemienty svajoj identyčnaści — takija, jak data ich naradžeńnia i h.d.», — ličyć Džon Łoŭrens, vykanaŭčy dyrektar Electronic Frontiers.

Taksama zaniepakojenaść vyklikaje toje, što servis FaceApp maje rasijskija karani — jaho stvaryŭ vychadziec z «Jandeksa» Jarasłaŭ Hančaroŭ, dyrektar rasijskaj Wireless Lab, kampanii-raspracoŭnika prahramy.

Praŭda, śpiecyjalisty adznačajuć, što palityka pryvatnaści FaceApp mała adroźnivajecca ad taho, što robiać inšyja padobnyja kampanii.

Li Manson, daśledčyk biaśpieki ŭ Comparitech, zajaviŭ:

«Heta standartnaja palityka pryvatnaści — kampanija pieradaje niekatoryja abmiežavanyja danyja treciamu boku, moža pieradać prava ŭłasnaści, kali kampanija budzie pradadzienaja, i hetak dalej», — skazaŭ jon IBTimes UK. «Nie asabliva kruta dla karystalnikaŭ, zaniepakojenych pryvatnaściu, ale ničym nie adroźnivajecca ad taho, što robiać 99,999% inšych kampanij».

U palitycy pryvatnaści FaceApp havorycca, što jany mohuć źbirać infarmacyju pra toje, jakimi servisami vy jašče karystajeciesia, ź jakoj mienavita pryłady zachodzicie, jakija sajty naviedvajecie, i niekatoruju inšuju infarmacyju z braŭziera i hetak dalej.

Nasamreč, ničoha takoha, čaho nie źbirajuć bolšaść inšych prahram, toj ža Facebook, roznyja miesiendžary, prahramy dla redahavańnia fota i h.d. Možna skazać, vy płacicie svaimi danymi za toje, kab karystacca takimi prahramami.

• 0
• 0
• 0
• 0
• 0
• 0
• 0
• 0