U Biełarusi zapačatkavana novaja litaraturnaja premija «Prazrysty EOŁ», nazvany pieršyja łaŭreaty 

22 sakavika ŭ Minsku ŭ Halerei TUT.BY adbyłosia ŭračystaje ŭhanaravańnie pieršych u historyi łaŭreataŭ premii «Prazrysty EOŁ». Pryzy aŭtarstva skulptara Paŭła Vajnickaha byli ŭručanyja ŭ šasnaccaci katehoryjach.

Pavialičyć

Vioŭ imprezu Maksim Žbankoŭ. Pryzy ŭručyli siabry Virtualnaj Litaraturnaj Akademii Ihar Babkoŭ, Źmicier Višnioŭ, Alaksandr Fiaduta, Taćciana Barysik, Viktar Žybul, Maryja Roŭda, Kaciaryna Barysienka, Barys Piatrovič, Hanna Sieviaryniec, Źmicier Bartosik, Artur Klinaŭ, Uładzimir Arłoŭ.

Śpiecyjalny pryz redakcyi časopisa «LitRAŽ» za ŭniosak u biełaruskuju virtualnuju litaraturu atrymała internet-biblijateka «Kamunikat»za šmathadovaje spryjańnie prysutnaści biełaruskaj litaratury ŭ siecivie. Pryz ad redaktara «LitRAŽa» Ŭładzimira Hłazava pryniaŭ stvaralnik «Kamunikatu» Jarasłaŭ Ivaniuk.

U astatnich piatnaccaci katehoryjach pieramožcaŭ vyznačała Virtualnaja Litaraturnaja Akademija ŭ tajnym elektronnym hałasavańni, jakoje adbyvałasia ŭ dva tury.

Najlepšym litaraturnym veb-vydańniem pavodle mierkavańnia Akademii staŭ sam zasnavalnik premii časopis «LitRAŽ».

Najlepšaj elektronnaj knihaj prozy 2018 była abvieščanaja kniha Siarhiej Kalendy «Časam panki pamirajuć», debiut jakoj taksama adbyŭsia na staroncy litrazh.org.

U žanry non-fikšn «EOŁa» za najlepšuju elektronnuju knihu atrymała «Klinika kitajskaha dantysta» Źmitra Bartosika, a za najlepšy pierakładny non-fikšn — kniha Marcina Połaka «Zatušavanyja krajavidy» ŭ pierakładzie Viery Dziadok.

U katehoryi «Najlepšy litaraturny veb-prajekt hoda» byŭ uhanaravany Jan Maksimiuk za stvareńnie fiejsbuk-supołki «Tolki pra litaraturu». Aŭdyjoraman Siarhieja Šupy «Padarožža ŭ BNR» atrymaŭ «EOŁa» jak najlepšy litaraturny aŭdyjozapis hoda.

Sieciraturnym adkryćciom hoda było pryznanaje vyznačeńnie dakładnaj daty napisańnia vierša Alesia Dudara «Pasiekli kraj naš napałam», plon daśledčyckaj pracy piśmieńnicy Hanny Sieviaryniec.

U astatnich katehoryjach (onłajn-publikacyi) daminavaŭ časopis «LitRAŽ» z čatyrma pieramožcami: najlepšaja pjesa («Turemščyk» Źmitra Dziadzienki), najlepšaje ese («Vosieński leksikon ptušak i ryb» Ihara Babkova), najlepšy pierakład paezii («Śpieŭ pra mianie» Uołta Uitmiena ŭ pierakładzie Maksa Ščura) i najlepšaja prazaičnaja publikacyja («Piensija» Vincesia Mudrova).

Byli adznačanyja taksama publikacyi inšych veb-vydańniaŭ i sajtaŭ. Nasta Kudasava (darečy, adna ź inicyjatarak stvareńnia premii «Prazrysty EOŁ») pieramahła ŭ katehoryi «Najlepšaja paetyčnaja publikacyja hoda» z padborkaj vieršaŭ «Bieh pa niaŭmolnaj vadzie», jakaja źjaviłasia na sajcie časopisa «Dziejasłoŭ».

Najlepšym krytyčnym artykułam hoda była pryznanaja publikacyja Iryny Šaŭlakovaj «Luboŭ (da) čytača jak (nie)nahoda dla aptymizmu», jakaja źjaviłasia ŭ tydnioviku «Litaratura i mastactva» i na sajcie zviazda.by.

Piśmieńnik Pavał Kaściukievič byŭ uhanaravany za najlepšy pierakład prozy: akademiki VŁA adznačyli apaviadańni Uzi Vajla, apublikavanyja časopisam pierakładnoj litaratury «Prajdziśviet».

Jak najlepšy litaraturaznaŭčy tekst hoda Akademija acaniła artykuł Viktara Žybula «TAVIZ: pa śladach lehiendarnaha lit'abjadnańnia», napisany dla časopisa «Połymia».

Pry kancy imprezy viadoŭca Maksim Žbankoŭ vykazaŭ ad imia arhanizataraŭ nadzieju, što i ŭ nastupnym hodzie «Prazrystyja EOŁy» znojduć svoj šlach da łaŭreataŭ, i što prapanova biełaruskich elektronnych knih, onłajn-litaratury i litaraturnych miedyja-prajektaŭ budzie bolš šyrokaj i raznastajnaj. U takim razie Virtualnaj Litaraturnaj Akademii ŭdasca ŭručyć pryzy ŭva ŭsich praduhledžanych pavodle Statutu premii katehoryjach.

Praca Sakrataryjatu premii pa adsočvańni ŭ bajnecie najcikaviejšych e-bukaŭ i onłajn-publikacyj i pa stvareńni Rekamiendacyjnaha śpisu premii «Prazrysty EOŁ»-2019 užo idzie. Takim čynam, da sustrečy ŭ nastupnym hodzie!

• 0
• 0
• 0
• 0
• 0
• 0
• 0
• 0