Mult pra hienacyd reptylij bahatymi žyviołami bje rekordy ŭ suśvietnym prakacie. Niekatoryja bačać aluziju na Paleścinu

Pieršy «Źvierapolis» vyjšaŭ jašče ŭ 2016 hodzie. Tady hledačam pradstavili hety horad-raj, dzie žyvuć roznyja sysuny. Žyvuć jany pa praviłach Homo sapiens: horad chacia i adaptavany pad asablivaści roznych źviaroŭ, ale ž u im lohka paznajecca zvyčajny čałaviečy miehapolis sa svajoj strukturaj hramadstva, słužbami, prafiesijami i zabavami.

Ale ž nas asabliva cikaviać dva žychary hetaha horada. Pierš za ŭsio, heta trusicha Džudzi Chobs. Ščyraja i trochi naiŭnaja, jana ź dziacinstva imknułasia pracavać u palicyi, i ŭ pieršym «Źvierapolisie» dasiahnuła svajoj mary dy jašče i vyratavała horad.

Joj u hetym dapamahaŭ lis Nik Uajłd, našmat bolš praktyčny i pryziemleny, čym pryhažunia Džudzi. Jany raspačynajuć sikveł multa ŭ jakaści naparnikaŭ, bo Nik taksama dałučyŭsia da palicyi i ciapier pracuje razam z Džudzi.

Jak i šmat jakija inšyja paśpiachovyja dysnejeŭskija i piksaraŭskija multfilmy, «Źvierapolis 2» stvarajecca adrazu na niekalkich uzroŭniach. Kaniečnie, jon pieradusim zrobleny dla dziaciej, ale režysiory śpiecyjalna pakidajuć bahata rassypanych žartaŭ dla darosłych, aluzij na darosłaje žyćcio i sacyjalnuju satyru. Tak i tut — trusicha Džudzi i lis Nik vymušanyja iści na hrupavuju psichaterapiju, kab razabracca ŭ tym, jak asabistyja adroźnieńni nie dajuć im spracavacca.

Pavialičyć

A ŭ horadzie tym časam rychtujuć śviata. Źvierapolisu 100 hadoŭ, i ŭ honar hetaha na śviatočnym viečary pakažuć dziońnik stvaralnika ścien stychij: za mudrahielistaj nazvaj chavajucca pryłady, jakija padzialajuć horad na čatyry klimatyčnyja zony. Na hetym viečary Džudzi i Nik znachodziać novaha siabra — źmiaju Hery Dy Snejk. A zaadno daviedvajucca, što hieroi ich horada, siamja stvaralnika tych samych ścien, nasamreč zusim nie tyja, kim prykidvajucca

Hery — pieršaja reptylija va ŭsioj sazie pra Źvierapolis. Kali hety horad — prajekcyja čałaviečaha hramadstva, to što značyć śviadomaje vyklučeńnie ź jaho takoj vialikaj hrupy žyviołaŭ? Nam pakažuć i adkaznych za heta, bahatuju siamju rysiaŭ pa proźviščy Linkśli, jakija imknucca kantralavać uvieś horad i zaadno faktyčna abviaścili vajnu reptylijam.

I tut važna adznačyć jašče adnu admietnaść «Źvierapolisa 2» i padobnych multfilmaŭ. Jany pa-raniejšamu miakkaja amierykanskaja siła, jakaja vučyć libieralnym kaštoŭnaściam — talerantnaści, pavahi da asabistaj svabody. Dzieci ŭsprymajuć heta na ŭzroŭni padśviadomaści, darosłyja starajucca sčytać zadumu režysioraŭ.

Pahladzieŭšy «Źvierapolis 2», niekatoryja hledačy namacali paralel siužeta z palityčnaj situacyjaj na Blizkim Uschodzie. Bahataja patryjarchalnaja siamja rysiaŭ (a kali chočaš, možna pryhledziecca i da pejsaŭ na pysie rysi!) faktyčna ŭčyniaje hienacyd reptylij i ŭ svaich intaresach sprabuje vysielić ich z nasiedžanaha miesca. Ničoha nie nahadvaje, kali hladzieć na situacyi z pazicyi zachodnich prychilnikaŭ Paleściny? 

Pavialičyć

Što nie vyklikaje nijakich sumnievaŭ, dyk heta ŭzrovień animacyi. «Źvierapolis 2» adpracoŭvaje ŭsie 150 miljonaŭ dalaraŭ, układzienyja ŭ jaho: vy ŭbačycie heta ŭ sotniach unikalnych žyvioł-piersanažaŭ, zroblenych tak fajna, što možna aceńvać ich akciorskuju pracu. Nie zabudźciesia i na toje, kab acanić detalizacyju samoha horada, što składajecca z tysiač drobnych elemientaŭ.

Pavialičyć

Studyi Disney, stvaralnikam «Źvierapolisa 2», niama pryčyn biedavać nakont vydatkavanych miljonaŭ. Mult akazaŭsia supierprybytkovym i za pieršy ŭik-end u suśvietnym prakacie sabraŭ 556 miljonaŭ dalaraŭ — heta najlepšy start u prakacie ŭ historyi animacyi.

Častka z hetych miljonaŭ pojdzie na hanarar Šakiry, bo muzyčnaja supierzorka znoŭ viarnułasia ŭ Źvierapolis. Jak i ŭ minuły raz, jana ahučyła rolu Hazeli — pop-zorki Źvierapolisa, a taksama zapisała dla multa pieśniu. U aryhinalnaj viersii multa hučać hałasy šmatlikich zorak kino nakštałt Žana Reno i Idrysa Elby, znajšłosia miesca navat dla Eda Šyrana. A kali vy budziecie hladzieć uvažliva, zaŭvažycie adsyłki da topavych kinaprajektaŭ nakštałt «Maŭčańnia jahniataŭ» ci «Ratatuja».

Pavialičyć

Ale nie heta hałoŭnaje ŭ suśviecie «Źvierapolisa 2». U abhortcy multa z šalonym biudžetam stvaralniki sikveła, jak i ŭ minuły raz, umudrylisia schavać hłybokija sensy, za jakija hetuju historyju lubiać miljony. Heta raskaz pra hramadstva, siabroŭstva i toje, što chacia my ŭsio źniešnie roznyja, unutry nas žyvie žadańnie padzialać hetaje žyćcio i svaje pačućci ź inšymi.

• 10
• 2
• 0
• 8
• 2
• 0
• 1
• 0