Fatalnaja spakusa ŭvarvać durnicu ŭ Maskvy

Ukraina abvieściła, što nie harantuje pastavak rasijskaha hazu ŭ Jeŭropu. Ciapier stanovicca bolej zrazumiełaj pabłažlivaść Maskvy ŭ dačynieńni da Biełarusi. Adrazu dźvie hazavyja vajny — heta było b zanadta.

Krynica ŭ Kijevie šantažuje Maskvu pahrozaj kanfiskoŭvać z 1 studzienia haz, pryznačany dla Jeŭropy, kali nie budzie padpisany kantrakt z «Hazpromam».

Zaznačym, što i dla biełarusaŭ pytańnie pra canu hazu znoŭ na finišy hoda tradycyjna visić u pavietry. Učora z «Hazpromam» praviała pieramovy naša delehacyja. Ličby tak i nie ahučany.

Siońnia namieśnik kiraŭnika chołdynha Alaksandr Miadźviedzieŭ skupa paviedamiŭ: baki ŭdakładnili, «jak budzie pracavać formuła», i hości, maŭlaŭ, pajechali dadomu «ŭzhadniać heta».

Aficyjny pradstaŭnik «Hazproma» Siarhiej Kupryjanaŭ dadaŭ, što «nad nami nie kapaje» i niama patreby padpisvać kantrakt za dźvie chviliny da novaha hoda, bo pieraraźlik pavodle formuły možna zrabić u luby momant.

Sapraŭdy, choć pieramovy iduć, jak možna zdahadacca, nie zusim hładka, pa vialikim rachunku padstaŭ niervavacca niama, šokavaj terapii dla Minska (ni ŭ sensie ceńnika, ni ŭ sensie zakručvańnia vientyla) tut nie pradbačycca. Heta pieramovy vykanaŭcaŭ, na jakich šlifujucca detali. Pieršyja asoby dźviuch dziaržaŭ na sustrečy 22 śniežnia ŭ pryncypie parazumielisia. Haz choć i padaražaje, ale nienašmat, a ciaham 2009 hoda moža i patańnieć.

Inšaja reč, što košt hetaha parazumieńnia dla Biełarusi taksama achutany zmrokam tajamnicy. Tolki ekivoki aficyjnych asob dazvalajuć budavać viersii. Pa-pieršaje, vyhladaje na toje, što Maskva dacisnuła z padpisańniem pahadnieńnia pra adzinuju sistemu supraćpavietranaj abarony. Pa-druhoje, rasijcy damahajucca kompleksu vyhadnych im damoŭlenaściej u finansava-ekanamičnaj halinie. Havorka idzie pra valniejšy dostup ich tavaraŭ na naš rynak, udzieł u pryvatyzacyi, pašyreńnie raźlikaŭ u rasijskich rublach.

Tak ci inačaj, Maskva čarhovy raz adsunuła ŭbok raschvalenuju «jeŭrapiejskuju formułu» vyznačeńnia cany na «błakitnaje paliva». Pradstaŭnik «Hazproma» Kupryjanaŭ pryznaŭsia, što jano budzie dla biełarusaŭ tańniejšym, čym vymahała b čystaja matematyka. Karaciej, cana znoŭ palityčnaja.

Ale vyjhryš na ŭschodzie moža abiarnucca projhryšam na Zachadzie.

Naprykład, Jeŭrasajuzu i ZŠA dakładna nie spadabajecca imaviernaje pryznańnie Minskam Abchazii dy Paŭdniovaj Asiecii. Moža sapsavać dyjałoh z Bruselem i ŭciahvańnie našaj krainy u vajskova-palityčnyja hulni Kramla, asabliva ŭ «asimietryčny adkaz» na raźmiaščeńnie elemientaŭ supraćrakietnaj abarony ZŠA ŭ Čechii dy Polščy.

Vidavočna, što ŭłazić u hetyja niepryjemnyja rečy Minsk nie śpiašajecca. Ale ž i Maskva navučyłasia daciskać mietadyčna. Zaŭvažcie, jak adrazu papravili biełaruskaha kiraŭnika, kali toj pa viartańni ź biełakamiennaj zajaviŭ, što druhaja tranša novaha rasijskaha kredytu ŭ nas, ličy, u kišeni. E nie, skazała Maskva, nie kažy hop! Ranicaj — kresły, viečaram —hrošy.

Inačaj kažučy, biełaruski bok spačatku pavinien padpisać admysłovy miemarandum. Jaho źmiest nadta nie afišujecca. Ale, jak možna zrazumieć, dakumient musić harantavać Rasii ŭmacavańnie finansava-ekanamičnych pazicyj u Biełarusi.

Tak što adnosna tanny haz moža akazacca dla nas zusim nie tannym.

Pa vialikim rachunku, biełaruskaja ŭłada tak i zastajecca na razdarožžy, hučna nazyvajučy heta rolaju masta miž Rasijaj i Zachadam. Tak, jość spakusa pazbavicca ad jarłyka jeŭrapiejskaha izhoja.

Ale ci nie macniejšaja spakusa znoŭ uvarvać durnicu ŭ Maskvy. Prychapić jašče adzin danajski darunak.

• 0
• 0
• 0
• 0
• 0
• 0
• 0
• 0