Siońnia śpiecyjalnyja mabilnyja dadatki vielmi dapamahajuć žančynam vyličvać toj samy važny dzień cykła — dzień avulacyi. Adny vyličvajuć jaho, kab jak chutčej zaciažaryć, inšyja — naadvarot, kab tolki nie zaciažaryć. Praŭda, dakładna sprahnazavać jaho naŭrad ci mahčyma. Tym bolš, kali cykły «skačuć». Tamu treba być hatovym da taho, što kožnaja intymnaja suviaź u siaredzinie mienstrualnaha cykła moža ź vialikaj vierahodnaściu stać pačatkam novaha žyćcia.
Siońnia najbolš efiektyŭnymi srodkami kantracepcyi ličacca preziervatyvy i harmanalnyja preparaty. Ale preziervatyŭ moža parvacca, a tabletku možna zabyć vypić. Najčaściej praz hety strach pierad ułasnaj zabyŭlivaściu žančyny i admaŭlajucca ad harmanalnaj kantracepcyi, abirajučy alternatyŭnyja varyjanty.
«Śviečki majuć svaju nišu. Najpierš imi karystajucca žančyny, jakija bajacca harmanalnych preparataŭ, bo śviečki — chutčej antysieptyčny preparat. Jon źmianiaje asiarodździe, u im śpiermatazoid užo nie moža tak aktyŭna ruchacca. Praź źnižeńnie aktyŭnaści źnižajecca i imaviernaść praniknieńnia ŭ matku. Adpaviedna — i imaviernaść apładnieńnia, — tłumačyć zahadčyca adździaleńnia hiniekałohii miedycynskaha centra «Łade» Maryja Varabjova.
— Miascovyja śviečki rekamiendujuć vykarystoŭvać u pieryjad avulacyi tolki adnačasova z preziervatyvam. Čamu, zdavałasia b, takoje śmiešnaje spałučeńnie? Tamu što kali preziervatyŭ parviecca, to, mahčyma, jakraz najaŭnaść supraćzačatačnaha śpiermicydnaha srodku zmoža papiaredzić ciažarnaść».
Jak pravilna karystacca śviečkami?
Jość niekalki važnych niuansaŭ, ad jakich naŭprost zaležyć efiektyŭnaść śviečak.
Pa-pieršaje, treba pamiatać, što pa svajoj struktury jany źjaŭlajucca kisłotami. Pakolki absalutnaja bolšaść srodkaŭ hihijeny — myła, hieli — heta ščołač, to jany buduć niejtralizavać dziejnaje rečyva śviečak i ŭ razy źnižać jaho efiektyŭnaść.
Što heta značyć? Što pierad tym, jak uvodzić śpiermicydnuju śviečku, u jakaści hihijeničnaj pracedury lepš abmiežavacca prosta myćciom ciopłaj vadoj.
Pa-druhoje, srodak treba ŭvieści prykładna za 5-10 chvilin da pałavoha kantaktu. Hety čas patrebny na toje, kab preparat raŭnamierna raźmierkavaŭsia ŭ pochvie.
Pa-treciaje, nie varta adrazu paśla intymnaj blizkaści pravodzić hihijeničnyja pracedury z myłam. Preparat zachoŭvaje svaju aktyŭnaść na praciahu troch-čatyroch hadzin, i paśpiešnaje vymyćcio jaho — nie lepšaje rašeńnie, bo srodak moža jašče nie paśpieć likvidavać usie śpiermatazoidy.
I samaje hałoŭnaje: adna śviečka raźličanaja na adzin pałavy akt. Pierad paŭtornaj blizkaściu abaviazkova treba ŭvieści druhuju śviečku.
Ci mohuć śviečki abaranić ad bakteryj i virusaŭ?
Častkova mohuć. Heta jašče adna z pryčyn, čamu žančyny spyniajucca na hetym sposabie kantracepcyi. Dakładny pieralik virusaŭ, ad jakich zaścierahaje kantraceptyŭ, budzie ŭtrymlivacca ŭ instrukcyi kožnaha kankretnaha srodku. Ale jak adznačajuć daktary, ad surjoznych chvarob jak hanareja ci sifilis śviečki, na žal, nie abaroniać.
Ci mohuć śviečki zamianić naturalnuju zmazku?
Tak, sapraŭdy. Kali naturalnaj zmazki vydzialajecca niedastatkova, ci navat zusim nie vydzialajecca, to blizkaść moža prynieści šmat niepryjemnych adčuvańniaŭ. Śpiermicydnyja śviečki zdolnyja dapamahčy vyrašyć hetuju prablemu. Što praŭda, efiekt łubrykanta ŭ roznych śviečak prajaŭlajecca pa-roznamu: u adnych u bolšaj stupieni, u inšych — u mienšaj.
Darečy, mienavita praz hetuju ŭłaścivaść śviečki taksama abirajuć žančyny ŭ pieryjad, kali zhasaje repraduktyŭnaja funkcyja i źjaŭlajecca suchaść i dyskamfort u intymnaj zonie.
Ci možna vykarystoŭvać padčas karmleńnia?
Možna, na zdaroŭi dziciaci heta nijak nie adabjecca.
Harmanalnyja tabletki mohuć pranikać u hrudnoje małako, i ŭ hetym jość peŭnaja niebiaśpieka. Heta moža stać pryčynaj harmanalnaha zboju, parušeńnia rostu i raźvićcia. Pakolki ŭ niemaŭlaci amal usie sistemy orhanaŭ i tkanak dynamična raźvivajucca, to luboje źniešniaje ŭmiašańnie moža niehatyŭna adhuknucca.
Rečyva śpiermicydnych śviečak nie pranikaje ŭ hrudnoje małako, adpaviedna, takoj niebiaśpieki jany nie ŭjaŭlajuć.
Ci varta karystacca śviečkami pastajanna?
Param, u jakich blizkaść rehularnaja, daktary rajać źviarnuć uvahu na inšyja kantraceptyvy.
Śpiermicydnyja śviečki bolš pasujuć dla nierehularnych kantaktaŭ, pieryjadaŭ karmleńnia, pierachodaŭ z adnaho kantraceptyva na inšy, pierymienapaŭzalnaha pieryjadu i dadatkovaj abarony ŭ pieryjad avulacyi.
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie3
Kamientary