Pazbavili baćkoŭskich pravoŭ ciažarnuju žančynu ź Minska, čyja starejšaja dačka dvojčy sprabavała skončyć žyćcio samahubstvam
Maci jašče i patrabavała ŭ jaje hrošy, jakija taja atrymlivaje ad dziaržavy jak dzicia, što znachodzicca na dziaržzabieśpiačeńni.
U 36‑hadovaj minčanki dvoje dziaciej — 17‑hadovaja dačka i 5‑hadovy syn. Zaraz jana ciažarnaja trecim dziciem. U pole zroku orhanaŭ apieki i papiačycielstva administracyi Savieckaha rajona siamja trapiła jašče ŭ 2022 hodzie: dvojčy pravodzili sacyjalnyja rasśledavańni pa faktach užyvańnia maci śpirtnych napojaŭ, skandałaŭ z sužycielem i pakidańnia dziaciej biez nahladu. U studzieni 2023‑ha vyrašyli, što brat ź siastroj znachodziacca ŭ sacyjalna niebiaśpiečnym stanoviščy, pišuć «Minsk-Naviny».
Nieŭzabavie siamja pačała mianiać miescy žycharstva — na zdymnych kvaterach jany žyli pa niekalki miesiacaŭ, a paśla źjazdžali, nie raspłaciŭšysia. U lutym 2025 hoda maci pakinuła maleńkaha syna ŭ internacie kaledža, u jakim navučajecca dačka, i źnikła na niekalki dzion. Dzicio dahladali rabotniki internata.
U vieraśni pjanuju maci z synam, apranutych nie pa nadvorji, sustreli na prypynku hramadskaha transpartu ŭ centry horada. Jana zajaviła, što im niama kudy iści.
Viadoma, što minčanka pryciahvałasia da administracyjnaj adkaznaści za sprobu ździajśnieńnia drobnaha kradziažu, mieła sudzimaść za złosnaje chulihanstva. Niespryjalnaja abstanoŭka ŭ siamji, kanfliktnyja adnosiny z maci akazali niehatyŭny ŭpłyŭ na psichičny stan starejšaj dački — u kancy 2024‑ha padletak ździejśniła dźvie sproby suicydu.
Dziaciej adabrali — dziaŭčyna žyvie ŭ internacie kaledža, a jaje brat znachodzicca ŭ sacyjalna-piedahahičnym centry z prytułkam. Maci ŭładkavali aficyjantkaj, ale jana pastajanna prahulvała pracu biez pryčyn.
Akramia taho, patrabavała ŭ dački hrošy, jakija taja atrymlivaje ad dziaržavy jak dzicia, što znachodzicca na dziaržzabieśpiačeńni. Dziaŭčyna nie raz addavała joj najaŭnyja. U niadbajnaj maci nazapasilisia daŭhi — za arendu žylla, utrymańnie dziaciej, taksama jość nieapłačanyja kredyty i štrafy.
Upraŭleńnie pa adukacyi administracyi Savieckaha rajona źviarnułasia ŭ sud ź iskam ab pazbaŭleńni minčanki baćkoŭskich pravoŭ. Taja była suprać, čarhovy raz abiacała vypravicca, adnak sud zadavoliŭ zajaŭlenyja ŭ isku patrabavańni.
Kamientary
Masavaja ałkahalizacyja nasielnictva - dziaržaŭnaja palityka režymu Łukašenki.