«Budziecie žyć u haścinicy, kolki spatrebicca». Mer Homiela sustreŭsia z žycharami paškodžanaha vybucham doma
Staršynia Homielskaha harvykankama Uładzimir Pryvałaŭ pravioŭ sustreču z žycharami doma №3 pa vulicy Kosarava, što paciarpieŭ ad vybuchu. Kiraŭnik adkazaŭ na pytańni pra płany adnaŭleńnia budynka i hrašovyja kampiensacyi.
U pačatku razmovy mer zaŭvažyŭ, što ŭ situacyi, jakaja skłałasia, samaje hałoŭnaje — nabracca ciarpieńnia, raskazvaje «Biełka».
«Paviercie, my robim usio mahčymaje, kab viarnuć ludziej da narmalnaha žyćcia. Raspracavany ałharytm dziejańniaŭ pa adnaŭleńni paciarpiełaha padjezda. Vykonvać raboty budzie Homielski DBK, jaki kaliści budavaŭ hety dom. Niešta kankretnaje pa terminach zaraz skazać ciažka, ale my prykładziom usie namahańni, kab zrabić usio jak maha chutčej».
Zaraz rychtujecca prajektna-kaštarysnaja dakumientacyja dla ŭmacavańnia doma i adnaŭleńnia jaho razburanaj častki.
Papiarednie padjezd budzie adnoŭleny ŭ pieršym kvartale 2026 hoda.
«Hałoŭnaja zadača haradskich uład u hety pieryjad, — praciahnuŭ Uładzimir Pryvałaŭ, — prykłaści maksimum namahańniaŭ, kab nichto z paciarpiełych nie adčuvaŭ siabie pakinutym abo pakryŭdžanym».
Žychary doma, kaho časova pasialili ŭ hateli «Sož», spytali, jak doŭha im možna budzie tam žyć. Z hetaj nahody chodziać roznyja čutki. «Budziecie žyć stolki, kolki spatrebicca» — skazaŭ Pryvałaŭ.
Spytali žychary paciarpiełych kvater i pra kampiensacyju.
Na hetyja mety, pavodle słoŭ Uładzimira Pryvałava, užo vydadziena bolš za miljon rubloŭ. U zaležnaści ad pamieru škody kožnaja siamja atrymaje ŭ siarednim kala 100 tysiač rubloŭ.
Padobnyja sustrečy Uładzimir Pryvałaŭ z žycharami doma na Kosarava paabiacaŭ pravodzić rehularna.
17 śniežnia ŭ vyniku vybuchu hazu ŭ adnoj z kvater abrynulisia plity siomaha i vośmaha pavierchaŭ.
Pry razbory zavałaŭ na šostym paviersie 22 śniežnia a 21:30 było znojdziena cieła žančyny.
Ź infarmacyi «NN», vybuch adbyŭsia pry ŭstanoŭcy naviasnoj stoli ŭ kvatery.
Kamientary