NASA zapuścić na spadarožnik Saturna padvodnuju łodku dla daśledavańnia vuhlevadarodnych vadajomaŭ
Amierykanskija navukoŭcy z daśledčaha ŭniviersiteta Washington State University ŭ horadzie Pułman sumiesna sa śpiecyjalistami NASA raspracujuć «kaśmičnuju padvodnuju łodku» dla daśledavańnia vuhlevadarodnych vadajomaŭ naturalnaha spadarožnika płaniety Saturn Tytana, dzie tempieratura apuskajecca da -180ºS, paviedamlajecca na sajcie ŭniviersiteta.
Adznačajecca, što Tytan cikavy dla daśledčykaŭ praz zdolnaść zatrymlivać vadkaść na svajoj pavierchni. Na najbujniejšym spadarožniku Saturna jość reki, aziory i akijany, vypadajuć apadki, jakija składajucca z vuhlevadarodaŭ.
NASA płanuje adpravić aparat da Tytana na praciahu nastupnych 20 hadoŭ. Daśledčyki stvaryli ŭ łabaratoryi ŭmovy, padobnyja da ŭmovaŭ na spadarožniku: skanstrujavali śpiecyjalny reziervuar, u jaki źmiaścili vadkaść ź mietanu, etanu i inšych vuhlevadarodaŭ pry vielmi nizkaj tempieratury, a taksama zapuścili tudy svojeasablivy «makiet» submaryny.
Adnoj ź ciažkaściaŭ dla navukoŭcaŭ stała ŭtvareńnie burbałak azotu padčas pahružeńnia padłodki, bo taja vyłučaje ciapło. Heta moža mocna ŭskładnić praviadzieńnie fota- i videazdymki.
Tytan — najbujniejšy spadarožnik Saturna, a taksama druhi pa vieličyni spadarožnik u Soniečnaj sistemie (paśla spadarožnika Jupitera Hanimieda). Źjaŭlajecca adzinym, akramia Ziamli, ciełam u Soniečnaj sistemie, dla jakoha dakazana stabilnaje isnavańnie vadkaści na pavierchni, i adzinym spadarožnikam, jaki vałodaje ščylnaj atmaśfieraj. Niahledziačy na nizkuju tempieraturu, Tytan supastaŭlajecca ź Ziamloj na rańnich stadyjach raźvićcia, i nielha vyklučać, što na spadarožniku mahčyma isnavańnie najpraściejšych formaŭ žyćcia, u pryvatnaści, u padziemnych vadajomach, dzie ŭmovy mohuć być značna bolš kamfortnymi, čym na pavierchni.
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary