Chaj Eŭropa pacałuje ŭ dyjafrahmu

Mieniej za ŭsio možna było čakać, što nazaŭtra paśla davoli žorstkaha papiaredniaha zaklučeńnia naziralnaj misii ABSE Alaksandar Łukašenka sustreniecca z madam Lizen.

Bolej čakanym byŭ by matyŭ «no surovo brovi my nasupim». Napačatku spoŭksmen MZS tak inercyjna i zrabiŭ, papiknuŭšy misiju, što nie acaniła jak śled demakratyčnaha ščyravańnia Miensku.

Ale potym byŭ namacany bliskučy pijar-chod (niaŭžo znoŭ łord? :). Biełaruskaje načalstva stała rabić vyhlad, što ŭ papiaredniaj spravazdačy naziralnikaŭ ABSE usio cip-top.

Ź viečarovaha repartažu «Panaramy» hladač moh zrabić vysnovu, što toj dakład — amal što kamplimentarny. Pryčym kančatkovaja spravazdača (niedzie cieraź miesiac) moža akazacca jašče lepšaj. Bo haspadar sustrečy miakka pastaviŭ adpaviednyja zadačy pierad funkcyjanerkaj z Eŭropy, nibyta pierad Sidorskim ci Prakapovičam :). Prahučała: «My, viadoma ž, čakajem ad vas bolšaha, čym vy skazali papiarednie...».

Darečy, dziaržaŭnyja medyi zrabili vyhlad, što nie isnuje suvoraha ambasadara Arensa z BDIPČ, jaki ŭ misii de-fakta «starejšy pa zvańni». A samavitaja madam (što była tolki kaardynatarkaj karotkaterminovych naziralnikaŭ ABSE) u zaklučnym kadry atrymała ad haspadara šykoŭny bukiet, i atrymaŭsia sapraŭdny chepi-end, chiba što biez pacałunka ŭ dyjafrahmu.

Raźlik hienijalny. Nu chto z paspalitaha ludu budzie vyšukvać pieršakrynicu-dakład? Zatoje mnohija hladzieli tok-šoŭ, kali spn. Jarmošyna zajaviła, što vysnovy naziralnikaŭ ABSE «vyklikajuć aptymizm».

U vyniku naiŭnyja biełarusy ščyra pavierać: Eŭropie vybary ŭvohule spadabalisia, nu a kali tam trochi nosam i kruciać, dyk my vystrenčvać nia budziem. Jany nam jašče za karyčnievuju čumu vinnyja…

Va ŭmovach medyjnaj manapolii vydatna pracujuć «infarmacyjnyja technalohii» z oruełaŭskaj antyŭtopii.

Heta kali kazać pra ŭnutrany kantekst. Dy i zamiežny kantekst spryjaje.

Eŭropa pierad hałasavańniem stolki sakatała pra «stanoŭčyja syhnały» ź Miensku, što ciapier — jak myła źjeŭšy. Treba zachoŭvać tvar.

Nu nia skažaš ža, što, voś, byli zakulisnyja damoŭlenaści — i nas «kinuli». Nia toj słenh dla šanoŭnaha sp. Salany :).

Tak što intaresy biełaruskaj viarchoŭki dy zachodnich funkcyjaneraŭ tut paradaksalna supali. Abodva baki vyrašyli na spravazdaču naziralnikaŭ ABSE — skažam tak — nadta nie zvažać.

Nia tolki ź Vilni (što całkam čakana), ale i z Bruselu, i navat z Vašynhtonu prahučali zajavy z kanstrukcyjaj «niahledziačy na…». Kaniečnie, maŭlaŭ, tryjumfu prazrystaści nie było, ale ad dyjalohu my nie admaŭlajemsia. Budziem ciarpliva vychoŭvać biełaruski ŭrad u duchu demakratyi.

Nu to chaj zapasajucca ciarpieńniem :)

Darečy, jašče dva pijar-chady. Łukašenka dydaktyčna pieraściaroh spn. Lizen, kab Zachad nie vymahaŭ zbližeńnia koštam paharšeńnia dačynieńniaŭ z Rasiejaj. A ŭ Cchinvali na imia Kakojty ad biełaruskaha kiraŭnika pajšoŭ list z abiacańniem, što novy parlament razhledzić viadomaje pytańnie (biez anijakich, zaŭvažcie, harantyjaŭ stanoŭčaha rašeńnia).

I tut usio zrazumieła: 6 kastryčnika ŭ Miensk prylataje Pucin, kab pahavaryć pra haz dy kredyt. Tamu treba i našym i vašym.

Torh na dva baki doŭžycca. Pryčym Miensk virtuozna handluje pavietram.

Alaksandar Kłaskoŭski

Videa Jarasłava Ściešyka

• 0
• 0
• 0
• 0
• 0
• 0
• 0
• 0