17 studzienia ŭ Minsku pasolstva Niderłandaŭ arhanizavała dypłamatyčny pryjom. Siarod inšych, tudy zaprasili i biełaruskich apazicyjnych palitykaŭ.
Była i staršynia Centrvybarkam Lidzija Jarmošyna.
Mnohija rabili ź joj sełfi, ale Jarmošyna nastojliva prasiła nikudy tyja fota nie vykładać.
Ale pasłuchali nie ŭsie. «U toj samy čas, kali vybarčaja kamisija Pieršamajskaha rajona razhladaje dakumanty ab rehistracyi mianie kandydatam u deputaty Minharsavieta. Pieradaŭ vitańnie ad usich kandydataŭ, jakija nie prajšli sita «demakratyčnych» vybaraŭ», — napisaŭ staršynia «Ruchu za svabodu» Juryj Hubarevič pad fota.
Taćciana Karatkievič ža supravadziła karcinku analityčnymi razvahami.
«Učora byŭ cikavy viečar. Lidzija Jarmošyna pryjšła na pasolski pryjom, na jakim była amal usia apazicyja. Pry hetym nichto nie biŭsia, nie skandaliŭ. Navat fota rabili. Heta značyć, što jana hatovaja havaryć z kožnym zadavolenym i niezadavolenym u niefarmalnaj abstanoŭcy. Jana hatova. Nie tolki adstojvać svaje pazicyi, ale i pahadzicca z tym, što moža nie mieć racyju. Heta dyjałoh. Mahčymaść dyjałohu robić palityku cikaviejšaj. U krainie vybary ŭ miascovyja saviety. Učora i siońnia rehistrujuć i nie rehistrujuć kandytataŭ. U mnohich novych ludziej nie atrymajecca ŭdzielničać. Ludziam vašaj kamandy admaŭlajuć u rehistracyi, a vy možacie pra heta pahavaryć u niefarmalnaj abstanoŭcy sa staršynioj CVK. Ci značyć heta, što ŭ na hety raz mnohija rašeńni za miascovaj uładaj? Pahladzim. Mirnyja pieramieny iduć», — napisała Karatkievič.
Kamientary