Jak biełarus pabudavaŭ chatu ź piasku i hliny za $1000 i zastaŭsia ŭ joj zimavać FOTY
Mazyrčuk Jaŭhien Rajeŭski vyrašyŭ pierajechać u viosku i pabudavać sabie chatu z ekałahična čystych materyjałaŭ, pryčym amal nieapracavanych. Na ŭsio jamu spatrebiłasia nie bolš za tysiaču dalaraŭ.
Sakretami budaŭnictva jon dzielicca ŭ sacyjalnych sietkach, u tym liku viadzie videabłoh na jutubie.
Jaŭhien pierakanany, što varta budavać takija damy, u jakich nie tolki zručna i ŭtulna žyć, a jakija pavinny zabiaśpiečyć čałavieku naturalnyja ŭmovy pražyvańnia.
Tamu jon pryjšoŭ da idei budavać chaty z materyjałaŭ, jakija znachodziacca pobač. Asnoŭnymi budaŭničymi materyjałami stali piasok, hlina, vada, sałoma i drovy.
Bolej za ŭsio času pryjšłosia vydatkavać na ŭźviadzieńnie vonkavych ścienaŭ ź piasku, hliny i sałomy — niekalki miesiacaŭ. Krychu chutčej byli pabudavanyja ŭnutranyja pieraharodki z drovaŭ i hliny. Usia kanstrukcyja trymajecca na draŭlanym karkasie.
U chacie majecca ŭsio nieabchodnaje dla žyćcia, u tym liku kuchnia, nievialičkaja pieč-mazanka i łožak pobač ź joj. Ahulnaja ž płošča doma — kala 45 kvadratnych mietraŭ.
«Paŭnavartasnaje elektryčnaści ŭ domie niama, — kaža Jaŭhien. — Prosta ad susieda praciahnuŭ padaŭžalnik, kab była mahčymaść siłkavać noŭtbuk. Płanuju ŭ najbližejšy čas afarmlać dom i padłučacca da ŁEP».
Nievialičkija kruhlavyja akiency, a taksama najaŭnaść travy na dachu robiać chatu padobnaj da žytła chobitaŭ.
Vialikaje akno majecca taksama ŭ centry dachu.
Na pieršy pohlad dom moža zdacca chałodnym i nie prystasavanym dla zimovaha žyćcia. «Miž tym, choć tearetyčna padłoha i źjaŭlajecca chałodnaj, hetaha zusim nie adčuvajecca: na ziamlu pakładzieny płast cehły, a na jaje — dubovyja biarviony taŭščynioj 12 sm», — raspavioŭ «Našaj Nivie» haspadar chaty.
Niadaŭna Jaŭhien pafarbavaŭ svaju «pryrodnuju» chatu ŭ bieły koler, što nie spadabałasia niekatorym jahonym padpisčykam. Ciapier, kali vypaŭ śnieh, chłopiec padzialiŭsia novymi fotazdymkami i napisaŭ:
«Mnie vielmi šmat pisali: «Navošta ty dom u bieły koler pafarbavaŭ? Piasočny koler byŭ lepšy». Ja sam nie viedaŭ tołkam, navošta jaho pafarbavaŭ u bieły koler, prosta voś zachaciełasia».
Z nadychodam zimy ŭźnikła i pytańnie stvareńnia kamfortnaje tempieratury ŭ žylli. Stol Jaŭhien uciapliŭ piłavińniem (płast taŭščynioj 20—30 sm). A voś sa ścienami prablema vyrašyłasia nastupnym čynam:
«Z uschodu, poŭnačy i zachadu ŭ domie znachodziacca pamiaškańni, jakija na zimu začyniajucca, žyły zastajecca tolki centralny pakoj ź piečču. U hety momant na vulicy 0…-2, tempieratura ŭ domie trymajecca na ŭzroŭni 20 hradusaŭ. Kali palu pieč, to tempieratura padymajecca da 22—23 hradusaŭ», — raspaviadaje Jaŭhien Rajeŭski.
Pravieści zimu chłopiec płanuje ŭ svajoj «pryrodnaj» chacie, a na nastupny hod užo zapłanavana budaŭnictva doma pa takoj ža technałohii na susiednim učastku.
-
Falsifikacyi ŭ daśledavańniach chvaroby Alchiejmiera. Jak vyniki pryviali nie tudy
-
Biełaruskija vučonyja pachvalilisia papiarovymi kubačkami, vyrablenymi pa novaj technałohii. Takija to rabili daŭno, ale našy dadali inšaje rečyva
-
«Hetaja partyja prajhranaja». Biełaruskija daśledčyki — pra toje, u što pieratvaryłasia Akademija navuk
Ciapier čytajuć
Na kupianskim kirunku zahinuŭ biełaruski dobraachvotnik Alaksiej «Ryžy» Aŭdziej13
Na kupianskim kirunku zahinuŭ biełaruski dobraachvotnik Alaksiej «Ryžy» Aŭdziej
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie66
Kamientary