Viačorka patrabuje zabłakavać «Našu Nivu»

Uzhadanaja ŭ artykule pra dziaciej lidaraŭ biełaruskaj apazicyi Radasłava Viačorka patrabuje zabłakavać sajt «Naša Niva». Chostar, jaki absłuhoŭvaje damien nn.by, atrymaŭ ad jaje adpaviedny zvarot.

Viačorka choča, kab «Naša Niva» vydaliła infarmacyju pra jaje.

Radasłavie Viačorcy, dačce palityka, eks-kiraŭnika Partyi BNF Vincuka Viačorki, u tekście byŭ pryśviečany adzin skaz — pra toje, što jana pierajechała ŭ Ispaniju. Viačorka śćviardžaje, što heta ŭmiašańnie ŭ jaje pryvatnaje žyćcio.

Padobnuju ścisłuju infarmacyju — dzie vučyŭsia, dzie pracuje, dzie žyvie — «Naša Niva» apublikavała i pra čatyry dziasiatki inšych dziaciej lidaraŭ apazicyi z metaj atrymańnia statystyčnaha partreta situacyi.

Baćka Radasłavy Vincuk Viačorka dahetul udzielničaje ŭ hramadskim žyćci. Paŭmiesiaca tamu jon byŭ łaŭreatam premii češskaha Instytuta daśledavańnia tatalitarnych režymaŭ za svabodu, demakratyju i pravy čałavieka — «za hodnaje pierajmańnie dziejnaści ŭ abaronie pryncypaŭ demakratyi, svabody i pravoŭ čałavieka».

«Naša Niva» raniej nieadnarazova paviedamlała čytačam i pra členaŭ siemjaŭ biełaruskich čynoŭnikaŭ. My pierakananyja, što hetyja źviestki ŭjaŭlajuć hramadski intares. Ludzi, jakija kirujuć (ci raźličvajuć kiravać) krainaj, musiać być adkrytyja dla hramadskaści. U bazavych źviestkach pra ich i ich siemji nie moža być tajamnicy pryvatnaha žyćcia.

Radasłavu Viačorku aburyŭ taksama fakt publikacyi jaje fotazdymka. 

Reč u tym, što ŭ jakaści ilustracyi da publikacyi «Naša Niva» vykarystała zastavačnuju karcinku ź jaje akaŭnta ŭ fejsbuku, dastupnuju ŭsim achvotnym. Radasłava Viačorka miarkuje, što pry publikacyi zdymka ź jaje vyjavaj byli parušanyja jaje aŭtarskija pravy. 

Što ž, situacyja tut takaja. U Biełarusi ŚMI — nie tolki «Naša Niva», usie ŚMI — svabodna vykarystoŭvajuć tyja fota z sacyjalnych sietak, jakija stajać u adkrytym dostupie. «Naša Niva» nie vykarystoŭvaje fota, jakija stajać «pad zamkom». Kali biełaruskaje zakanadaŭstva ŭ hetym pytańni źmienicca, my prystasujemsia, ale pakul zakon nie zabaraniaje ŚMI vykarystoŭvać adkryty źmiest sacyjalnych sietak. (I, na našu dumku, na siońnia heta pravilna, bo pavyšaje prazrystaść hramadstva.)

Tamu, viadoma, spadaryni Viačorcy nie ŭdasca «spynić akazańnie pasłuh chostynha dla hetaha damiena» (inšymi słovami — spynić dostup da nn.by). 

Nam zastajecca vykazać škadavańnie z nahody takoha staŭleńnia z boku Viačorki. «Naša Niva» nie atrymlivała nivodnaj skarhi ci pretenzii ad dziaciej čynoŭnikaŭ na svaje anałahičnyja materyjały. 

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0