Jany źviarnulisia da Sojmu partyi z prośbaj pierahledzieć rašeńnie ab źniaćci kandydataŭ.
Pad zvarotam padpisalisia piatnaccać ź dzieviatnaccaci vyłučencaŭ ad Partyi BNF. Heta Siarhiej Antusievič (bałatujecca ŭ Horadni), Leanid Aŭtuchoŭ (Haradok, Viciebskaja vobł.), Jarasłaŭ Biernikovič (Hłybokaje), Juraś Hubarevič (Biełaaziorsk), Uładzimier Kazieka (Dniepra‑Buhskaja akruha), Vital Karatyš (Łuniniec), Ryhor Kostusieŭ (Škłoŭ), Mikałaj Laščun (Łahojsk), Aleś Michalevič (Uruckaja akruha), Vadzim Sarančukoŭ (Horadnia), Stanisłaŭ Sudnik (Lida), Aleś Čyhir (Babrujsk), Źmicier Šymanski (Bieraście), Ivan Šeha (Słonim), Andrej Jurkoŭ (Horki).
«Zajaŭlajem ab svajoj hatoŭnaści i nastrojenaści pravieści poŭnamaštabnuju ahitacyjnuju kampaniju, uklučna z udziełam u hałasavańni. Adnačasova nie adkidajem mahčymaści źniaćcia kandydatur z ulikam dalejšaha raźvićcia sytuacyi ŭ kožnaj kankretnaj vybarčaj akruzie, a taksama pry dasiahnieńni salidarnaha rašeńnia ab źniaćci kandydatur ad ADS albo, jak minimum, usich kandydataŭ ad Partyi BNF», — havorycca ŭ zajavie.
Namieśnik staršyni Partyi BNF Juraś Hubarevič kaža:
«U pieršuju čarhu padčas pryniaćcia rašeńnia ab udziele ci niaŭdziele ŭ vybarach treba prysłuchoŭvacca da ludziej, jakija ŭdzielničajuć u parlamenckaj kampanii. Na Sojmie amal kožny vystupiŭ za mahčymaść praviadzieńnia paŭnavartasnaj ahitacyjnaj kampanii. Na žal, ich dumki nie byli ŭličanyja. Rašeńnie Sojmu BNF supiarečyć ahulnaj pazycyi ADS. Pazycyja frontaŭskaha kiraŭnictva taksama sutyknułasia z narakańniami miascovych lideraŭ rehijanalnaha ŭzroŭniu ź inšych partyj. Našy vyłučency zvyčajna vyjhravali miescy ŭ śpisie ADS na alternatyŭnaj asnovie. Na našu dumku rašeńnie ab źniaćci kandydataŭ nia jość karysnym dla Partyi, tamu my patrabujem admieny rašeńnia Sojmu».
Padčas telefonnych razmovaŭ z karespandentam «Našaj Nivy» Ja. Biernikovič, R. Kastusioŭ, Z. Šymanski paćvierdzili, što hatovyja ŭdzielničać u vybarčaj kampanii da kanca. Raniej pra admovu zdymacca z vybarčaj kampanii zajaŭlaŭ I. Šeha.
Adnak staršynia Partyi BNF Lavon Barščeŭski kaža, što na budučym Sojmie niama patreby razhladać takuju zajavu: «Heta zajava nie padpisanaja, nieaficyjnaja, jaje niama... Heta čystaja vydumka. Podpisaŭ tam niama i ich nia moža być, tamu što hetyja ludzi havaryli, što jany padpisvać nia buduć».
Kamientary