Historyk Minska Chareŭski: «Politechničnaja» — dobraja nazva dla stancyi mietro, «Minsk-Mir» — poŭny treš
Ahučanyja mierkavanyja nazvy stancyj minskaha mietro na čaćviortaj linii. My parazmaŭlali pra heta z kulturołaham, znaŭcam historyi Minska Siarhiejem Chareŭskim.
«Ahulnyja ŭražańni značna lepšyja za papiarednija sproby, vyhladaje ŭsio vielmi niabłaha. Hetkija kroki pa dekamunizacyi i ŭmacavańniu ŭłasnaj identyčnaści. Takija voś «čałaviečyja» nazvy buduć havaryć ludziam pra niešta bolšaje, čym «Praletarskaja» ci «Maładziožnaja».
Całkam zhodny z nazvaj stancyja mietro «Politechničnaja». Jana apieluje da bolš čym 80-hadovaj historyi. Na hetym miescy Politechničny ŭniviersitet paŭstaŭ jašče naprykancy 1930-ch. To bok praz hadoŭ 12 hetaj naźvie i ŭniviersitetu budzie ŭžo 100 hadoŭ. Časam pra heta my prosta zabyvajem, što Minsk 50-ch — heta ž siaredzina minułaha (!) stahodździa. Całkam apraŭdanaja dla socień i tysiač ludziej, jakija spryčynilisia da hetaha ŭniviersiteta, nazva.
«Kijeŭski skvier», čamu nie nazvać prosta «Kijeŭskaja»? Tam pobač bulvar Šaŭčenki, kinateatr «Kijeŭ». U afarmleńni stancyi možna vykarystać ukrainskija elemienty, ci navat zaprasić z Kijeva dyzajnieraŭ paŭdzielničać u raspracoŭcy interjera. Uličvajučy našy hłybinnyja poviazi z Kijevam, to varta mieć u Minsku nie tolki «Kijeŭskuju stancyju», ale i vulicu, i praśpiekt.
«Alšeŭskaja». Pytańnie budzie zaŭsiody, chto taki hety Alšeŭski? Ja zaŭsiody byŭ suprać hetkaha paternalizmu, nazyvańnia niejkich abjektaŭ u honar kankretnych ludziej. Alšeŭski byŭ kamunistyčnym dziejačam, tut jaho rasstralali… Ja nie maju ničoha suprać Alšeŭskaha, u adroźnieńni ad Bieruta, vulica jakoha blizkaja da Alšeŭskaha. Ale takaja nazva pryviazanaja da kankretnaha proźvišča, vyklikaje peŭnyja nakładki.
Vydatnaja nazva «Civali». Tak zaviecca letniaja rezidencyja Papaŭ Rymskich. U Minsku, paśla Kapienhahiena, nazvali tak pieršy park zabavak. Byŭ taki majontak Civali, jaho arandavaŭ pad zabaŭki hramadzianin Prusii. Heta kłasnaja nazva, pra jakuju možna šmat pahavaryć, parazmaŭlać.
«Tučynka» — vydatnaja nazva, staraja, adnaŭlajecca pamiać pra ŭročyšča, jakoje tam było spradvieku. Dobraja nazva «Bieraściejskaja».
Mnie nie padabajecca nazva «Łakamatyŭnaja». Prahres na miescy nie staić. Siońnia łakamatyŭ — a zaŭtra budzie niešta inšaje. I takich anachraničnych nazvaŭ u nas chapaje. Čamu nie «Čyhunačnaja»?
«Minsk-Mir» — heta poŭny treš. Tak zaviecca płanavany «Iteraj» mikrarajon na miescy aeraporta «Minsk-1». Budzie takaja pampieznaja nazva. Choć, pa-mojmu, treba niejak padkreślić i zachavać, što tut byŭ pieršy aeraport stalicy. Moža być, «Aeradromnaja», tym bolš i vulica takaja jość.
Va ŭsim astatnim, što «Kozyrava», što «Viaśnianka», što «Staravilenskaja» — absalutna ŭsio słušna. Chacia, kali havorym pra «Staravilenskuju», to čamu nie nazyvać prosta «Vilenskaja». Tym bolš, što «Staravilenskaja» i «Navavilenskaja» vulicy pobač».
Ciapier čytajuć
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary