Arhanizatary «Bieśśmiarotnaha pałka» ŭ Minsku aburylisia dziejańniami biełaruskich uładaŭ
Ź inicyjatyvy kramloŭskich palittechnołahaŭ u haradach Rasii i niekatorych prylehłych krain 9 Maja prachodzić akcyja «Bieśśmiarotny połk».
Sutnaść u nastupnym — ludziam prapanujuć vyjści z partretami prodkaŭ, jakija vajavali ŭ Druhuju suśvietnuju vajnu.
Ideja sama saboj vartaja pavahi, adnak karcinka hetych šeściaŭ — bahatych na savieckija i rasijskija ściahi, hieorhijeŭskija stužki — robiacca instrumientam rasijskaj prapahandy.
Sioleta arhanizatary «Bieśśmiarotnaha pałka» sprabavali pravieści šeście ŭ Minsku, ale haradskija ŭłady admovili im u maršy pa praśpiekcie Niezaležnaści — dazvolili tolki dałučycca da ŭskładańnia kvietak na Płoščy Pieramohi. Dziaržaŭnyja kanały taksama praihnaravali mierkavanaje šeście, nijakaj rekłamy nie dali.
Mabilizacyjaj ludziej na akcyju ŭ sacyjalnaj sietcy «UKantakcie» zajmalisia aktyvisty arhanizacyi «Rumoł».
Jak na heta adreahavali pradstaŭniki prarasijskich ruchaŭ, jakija zajmalisia arhanizacyjaj «Bieśśmiarotnaha pałka» u Minsku?
Aktyvist rasijskaha «nacyjanał-vyzvalenčaha ruchu» (NOD) u Minsku Uładzimir Ryžankoŭ zrabiŭ videa z Płoščy Pieramohi, kudy ŭsio ž vyjšli ŭdzielniki «Bieśśmiarotnaha pałka».
Ryžankoŭ vielmi aburaŭsia, što im nie dali prajścisia pa praśpiekcie, a taksama zrabiŭ hutarki z arhanizatarami. Jon raspytvaŭ, jak da ŭsich hetych faktaŭ staviacca arhanizatary šeścia.
«Letaś my pravodzili na Linii Stalina, bo nam nie dazvolili tut, a sioleta u nas było poŭnaja tryvoha: «adbudziecca ci nie adbudziecca?», — adkazaŭ čarnasociencu Valeryj Drako. — Tamu što z harvykankama i Administracyi prezidenta šli takija adkazy, što nam nie zabaraniajuć, ale i nie dazvalajuć. I što my musim iści ŭ ramkach «Biełaruś pamiataje». Ja liču, što naš narod, dziakujučy nie našaj — biełaruskaj — presie, a rasijskamu telebačańniu zmoh z kuchniaŭ, z damoŭ, vyjści na płošču. My nie čakali takoha vychadu narodu. Pra što heta kaža? Kab u nas nie było padziej, jakija razharnulisia va Ukrainie».
Inšyja arhanizatary apielavali da taho, što «Bieśśmiarotny połk» zabaraniać nielha, bo jon pravodzicca «pa ŭsim śviecie» — praŭda, tut «uvieś śviet» treba razumieć jak tolki tyja harady, dzie majucca bujnyja ruskija dyjaspary.
U abmierkavańni ž u sacyjalnych sietkach niekatoryja ŭdzielniki praviali paraleli pamiž biełaruskimi ŭładami i «ŭkrainskimi fašystymi» praz zamienu hieorhijeŭskich stužak na jabłynievyja.
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty23
Kamientary