Naziralniki AAN paćvierdzili, što rasiejcy zaniali klučavuju čyhunačnuju stancyju Senaki na zachadzie Hruzii. MUS Hruzii paviedamlaje taksama pra zachop Zuhdzidzi.
Naziralniki AAN paćvierdzili, što rasiejcy zaniali klučavuju čyhunačnuju stancyju Senaki na zachadzie Hruzii. Namieśnik hiensaka AAN rychtuje dakład Radzie biaśpieki nakont hetaha.
Paśla taho jak sprava była vyniesienaja na razhlad Rady biaśpieki AAN, Minabarony Rasiei zajaviła pra vykanańnie pastaŭlenaj zadačy i vyvad vojskaŭ z Senaki.
MUS Hruzii paviedamlaje taksama pra zachop Zuhdzidzi. Nadychodziać supiarečlivyja infarmacyi nakont losu horadu Hory, što za 60 kilametrach ad Tbilisi. Žychary praktyčna pakinuli horad paśla trochdzionnych bambiožak. Pad adnu ź ich trapiŭ u paniadziełak prezydent Micheił Saakašvili, što naviedvaŭ horad u supravadžeńni mižnarodnych žurnalistaŭ.
Uviečary Saakašvili ŭ televystupie zajaviŭ, što
rasiejskija častki padzialili krainu napałam, pierarezaŭšy ŭ Senaki hałoŭnuju mahistral, što źviazvaje zachad i ŭschod krainy.
Ministerstva abarony Rasiei paćvierdziła zaniaćcio Senaki i abvierhła infarmacyju ab akupacyi Hory. «Planaŭ ruchacca ŭ bok Tbilisi ŭ nas nie było i niama», — zajaviŭ pradstaŭnik ministerstva. Rasieja zajaŭlaje, što aperacyja na terytoryi Hruzii patrebnaja, kab zapabiehčy novym hruzinskim atakam u Paŭdniovaj Asiecii.
Ź inicyjatyvy Hruzii siońnia ŭnačy ŭ čarhovy raz źbiarecca Rada biaśpieki AAN.
«Rasieja jasna pakazała, što źjaŭlajecca metaj hetaj aperacyi, — skazaŭ Saakašvili. — Meta hetaj aperacyi — nia tolki zachapić častku hruzinskaj terytoryi, ale, jak jany jasna skazali, źmianić režym u Hruzii. Kančatkovym vynikam hetaj aperacyi rasiejskich siłaŭ maje być etničnaja začystka i źniščeńnie hruzinskaha nasielnictva ŭ Abchazii». «My ŭ pryncypie nazirajem zaplanavanaje, spakojnaje, zahadzia zadumanaje zabojstva małoj krainy», — skazaŭ Saakašvili.
Tym časam rasiejski premjer-ministar Uładzimir Pucin skazaŭ siońnia ŭ Maskvie, što sytuacyja z kanfliktam vyhladaje zusim nia tak: «Ździŭlaje maštab hetaha cynizmu, ździŭlaje ŭmieńnie vydavać biełaje za čornaje, čornaje za biełaje, umieńnie sprytna pakazvać ahresaraŭ u jakaści achviaraŭ ahresii i ŭskładać adkaznaść za nastupstvy na samich achviaraŭ».
Rasieja admoviłasia padpisvać pahadnieńnie ab spynieńni ahniu, prapanavanaje ministrami zamiežnych spravaŭ Francyi i Finlandyi. Saakašvili jaho padpisaŭ. Rasieja pahadžajecca padpisać pieramirje tolki ŭ tym vypadku, kali ŭ dadatak Hruzija padpiša damovy ab nieŭžyvańni siły z prarasiejskimi ŭradami Abchazii i Asiecii. Dla Tbilisi heta amal nieprymalnaja prapanova, bo heta aznačała b pryznańnie ich jurysdykcyi.
Zachop Senaki adbyŭsia paśla taho jak Rasieja ŭviała dadatkovuju desantnuju dyviziju ŭ Abchaziju ŭ składzie 10 tysiačaŭ vajskoŭcaŭ, padmacavanych 350 adzinkami braniatechniki. Maskva nazyvaje heta «ŭzmacnieńniem miratvorčaha kantynhientu», a svaje dziejańni «aperacyjaj prymušeńnia da miru».
Dziejańni Rasiei vyklikajuć usio bolšuju zaniepakojenaść Zachadu. Faktyčna, Rasieja demanstruje, što Hruzija jość zonaj jaje ŭpłyvu.
«Patrebnaja vielmi mocnaja reakcyja Eŭropy», — zajaviŭ ministar zamiežnych spravaŭ Švecyi Karł Bildt. Jon adkinuŭ arhumenty Maskvy, jakaja tłumačyć umiašańnie ŭ Paŭdniovaj Asiecii nieabchodnaściu abarony rasiejskich hramadzianaŭ. «Majem padstavy pryhadać, što paŭstahodździa tamu Hitler užyvaŭ tuju samuju daktrynu, kab dačapicca i atakavać značnuju častku Centralnaj Eŭropy», - napisaŭ Bildt u svajoj zajavie.
Siońnia vice-prezydent ZŠA Dyk Čejni ŭ telefonnaj razmovie ź Micheiłam Saakašvili vykazaŭ tamu padtrymku i asudziŭ rasiejskaje ŭvarvańnie. Adnak krainy Zachadu vymušana abmiažoŭvajucca palityčnaj padtrymkaj, ab vajennaj dapamozie havorka nie idzie.
Siońnia taksama praciahvalisia bai ŭ rajonie Cchinvali i bambiožki rasiejskaj avijacyi. Hruzija zajaŭlaje ab 19 źbitych rasiejskich samalotach. Maskva paćviardžaje tolki 4 źbityja samaloty.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary