Viadučy Vadzim Hihin u efiry ANT pasprabavaŭ prynizić analityka Juryja Caryka
Na telekanale ANT 14 listapada vyjšła čarhovaja pieradača «Sprava pryncypu». Na hety raz prahrama była pryśviečanaja temie amierykanskich prezidenckich vybaraŭ. Bolšaść haściej efiru byli ŭ zachapleńni ad asoby Donalda Trampa.
«Ja taksama za Trampa zaŭzieŭ, kali ŭžo Klint Istvud za Trampa, to kudy nam dziecca», — skazaŭ viadučy pieradačy, historyk Vadzim Hihin.
Humaryst, člen ŁDPB Jaŭhien Kryžanoŭski ŭ svaju čarhu adznačyŭ, što tančyŭ ad radaści paśla taho, jak byli abvieščanyja vyniki. Sprava ŭ tym, što Kryžanoŭski paspračaŭsia sa śpievakom Alaksandram Saładucham adnosna nastupnaha prezidenta ZŠA. Kryžanoŭski pastaviŭ na Trampa, a Saładucha — na Klintan. Spračalisia na skryniu kańjaku.
Adnak najbolš cikavaj padałasia sproba Vadzima Hihina złavić na niasłušnych prahnozach staršyniu naziralnaj rady Centra stratehičnych i zamiežnapalityčnych daśledavańniaŭ Juryja Caryka. Rychtavałasia heta zahadzia, bo na ekran navat byli vyviedzienyja słajdy z cytatami Caryka.
U pryvatnaści, u śniežni 2015 hoda Caryk napisaŭ, što radykalizm nie dazvolić Donaldu Trampu stać pieramožcam vybaraŭ, a najbolš imaviernym prezidentam stanie Chiłary Klintan. U toj samaj publikacyi Caryk prahnazavaŭ, što cana na naftu ŭ 2016 hodzie składzie ad 20 da 30 dalaraŭ (na siońnia cana kala 45 dalaraŭ), a kurs rasijskaha rubla ŭ dačynieńni da dalara — 90—100 (u toj čas jak ciapier 65 rubloŭ).
«Ničoha z pradkazańniaŭ 2015 hoda nie zbyłasia. Moža być, palityčnym analitykam śledam za Sakratam treba kazać: «Ja viedaju, što ničoha nie viedaju», kab ludziej, pa-biełarusku kažučy, nie ŭvodzić u zman, čym kožny raz sprabavać trapić palcam u nieba», — žorstka kamientavaŭ Hihin.
«Palityčnyja prahnozy — heta niaŭdziačnaja sprava. Ja moh by nazvać niekalki dziasiatkaŭ prahnozaŭ, jakija spraŭdzilisia», — adkazaŭ Juryj Caryk.
«A navošta hetyja pradkazańni pastajanna publikujucca, kab paŭpłyvać na ludziej?» — nie supakojvaŭsia viadučy «Spravy pryncypu».
Jak adznačajuć stałyja hledačy pieradačy ŭ sacyjalnych sietkach, hetak padłavić i prynizić aŭtarytet Vadzim Hihin raniej nie sprabavaŭ navat haściej z apazicyjnaha łahiera.
Juryj Caryk sumiesna z Arsieniem Sivickim aŭtary dakładu «Biełaruś u kantekście supraćstajańnia Rasija—NATA», u jakim aŭtary nazvali najvažniejšaj zadačaj biełaruskich uładaŭ paźbiahać uciahvańnia Minska ŭ zamiežnapalityčnyja avantury Kramla.
«Rasijski bok robić niezvyčajnyja kroki pa naroščvańni vajskovaj prysutnaści na zachodnim i paŭdniova-zachodnim kirunkach dla supraćstajańnia z NATA, jakija ŭ tym liku stvarajuć ryzyku dla suvierenitetu, niezaležnaści i nacyjanalnaj biaśpieki Respubliki Biełaruś», — havoryłasia ŭ dakładzie.
Juryj Caryk byŭ adnym z tych palitołahaŭ, blizkich da ŭłady, chto adkryta vykazvaŭsia suprać prysutnaści na terytoryi našaj krainy vajskovych bazaŭ inšych dziaržavaŭ.
«Voś taki achviarny adychod ad temy pieradačy dla vysokaj mety kanstatacyi pamyłak u prahnozie. Vidać, takoje było zadańnie», — adpisaŭsia ŭ fejsbuku spadar Caryk.
-
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniaja ŭciečka była ŭ 2026-m, a zasnavalniki — rasijanie
-
«Pakul ja ŭ Biełarusi, ja ŭ stanie abaraniać Sajuz palakaŭ». Pačobut patłumačyŭ, čamu choča viarnucca ŭ Biełaruś
-
MZS Rasii pachvaliłasia rasijskaj akcyjaj «Bieśśmiarotny połk» u Minsku
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniaja ŭciečka była ŭ 2026-m, a zasnavalniki — rasijanie34
Kamientary