Mierkavańnie z Maskvy: «Kreml rana radujecca pieramozie Trampa»
Nasupierak emacyjnym paraŭnańniam z Łukašenkam i navat Hitleram, Tramp nia maje mahčymaści zrabicca dyktataram.
Kaniečnie ž, samaje pryjemnaje ad pieramohi Trampa — heta nazirać za šokam amerykanskich levych «liberałaŭ». Elitarnaja i namenklaturnaja lavackaja idealohija atrymała pierakanaŭčy adkaz ad prostych vybarcaŭ. Heta važny ŭrok, ź jakoha, budziem spadziavacca, usie zrobiać słušnyja vysnovy.
Paśla vybaraŭ usie pradkazvali kryzis u respublikancaŭ — ale ŭ vyniku kryzis budzie i na levym flanhu taksama. Amerykanskaja palityčnaja systema staić pierad šeraham vyklikaŭ, i jana budzie da ich adaptoŭvacca.
Nasupierak emacyjnym paraŭnańniam z Łukašenkam i navat Hitleram, Tramp nia maje mahčymaści zrabicca dyktataram.
I Biełaruś u 1994 h., i Niamieččyna ŭ 1932 h. byli biednyja krainy na ekzystencyjnych rostaniach, biaz zamacavanaj demakratyčnaj palityčnaj systemy. Ameryka 2016 h. takoj krainaj nie źjaŭlajecca.
Plusam Hiłary Klintan była peŭnaja pradkazalnaść: jana była da mozhu kaściej čałaviekam ź isteblišmentu, byłaja First Lady i byłaja dziaržaŭnaja sakratarka i senatarka ad štatu Ńju-Jork. Heta byŭ by pravierany i zrazumieły varyjant a-la «stary koń».
Ale pieramoha Trampa — heta na čysta symbaličnym uzroŭni jość pieramoha nad peŭnymi ledź nie feŭdalnymi trendami ŭ tamtejšaj palitycy, jakija dla mižnarodnaj supolnaści dasyłali niadobryja syhnały i słužyli niadobrym prykładam.
U kancy minułaha stahodździa ŭžo zdarałasia tak, kali prezydentam rabiŭsia syn raniejšaha prezydenta: Džordž Buš-małodšy paśla Džordža Buša-starejšaha. Ciapier Ameryka była ŭ kroku ad taho, kab prezydentam zrabiłasia žonka raniejšaha prezydenta Biła Klintana. Dla hihanckaj trochsotmiljonnaj krainy, jakaja dahetul zastajecca ŭzoram i nadziejaj dla mnohich ludziej u śviecie, heta nieprystojna.
Varta taksama adznačyć, što rasiejskaja palityčnaja lumpen-hramadzkaść rana radujecca i daremna dumaje, što Tramp — ahient Kramla i što na vybarach pieramoh Pucin.
Tramp — apartunist, jaki navat na praciahu ŭłasnaj pieradvybarčaj kampanii niekalki razoŭ mianiaŭ svaju pazycyju pa cełym šerahu pytańniaŭ.
Tolki što nastupiŭ toj momant, kali Donald Tramp, abrany prezydentam ZŠA, staŭ hałaŭniejšym za Ŭładzimira Pucina, lidara biednaj peryferyjnaj krainy. Pucin i jahonaja padtrymka pierastali być patrebnyja Trampu. Navat kali zaŭtra rasiejskija specsłužby praź jakiś Wikileaks apublikujuć jakijaś abiacanyja seks-videa z Trampam abo jakiś inšy kampramat — Trampu ad hetaha ŭžo ničoha asablivaha nia budzie.
Navat naadvarot.
Prezydent Tramp — nia častka staroha palityčnaha isteblišmentu. Ale jamu z hetym isteblišmentam ciapier daviadziecca supracoŭničać i šukać uzajemaparazumieńnia.
I pucinski režym moža akazacca vielmi lohkaj raźmiennaj manetaj u hetym torhu, uzamien na padtrymku pa ŭnutryamerykanskich pytańniach.
U astatnim — pažyviom i pabačym. Nieba na ziamlu nie zvaliłasia, amerykanskija instytuty i systema strymak i supraćvahaŭ nikudy nie padzielisia. Heta demakratyja, tut na vybarach byvajuć i niepradkazalnyja vyniki.
Kamientary