Mižnarodny valutny fond rekamienduje Biełarusi paskoryć reformy ŭ ekanomicy, paviedamiŭ siońnia žurnalistam kiraŭnik misii MVF pa Biełarusi Piter Dołman. «Heta dapamoža źnizić faktary ŭraźlivaści», — adznačyŭ jon.
Misija MVF u chodzie ciapierašniaha vizitu abmiarkuje ź Biełaruśsiu novuju kredytnuju prahramu, zajaviŭ Dołman.
«Adpaviednaje abmierkavańnie budzie prachodzić z pradstaŭnikami dziaržaŭnych orhanaŭ Biełarusi na nastupnym tydni. Naša asnoŭnaja zadača ŭ tym, kab hety praces išoŭ napierad», — zajaviŭ jon.
Kiraŭnik misii MVF pa Biełarusi nahadaŭ, što raniej u chodzie abmierkavańniaŭ z uradam vialikaje značeńnie nadavałasia reformam siektara dziaržpradpryjemstvaŭ. Pavodle jaho słoŭ, heta treba, kab «prynieści bolš jakasny mieniedžmient u siektar dziaržpradpryjemstvaŭ i zabiaśpiečyć ich bolš dakładnaje funkcyjanavańnie». Taksama raniej abmiarkoŭvalisia pytańni libieralizacyi koštaŭ i refarmavańnia taryfaŭ na žyllova-kamunalnyja pasłuhi. Pa słovach Dołmana, MVF ličyć pravilnym padychod ŭrada Biełarusi ŭ halinie raźvićcia asnoŭ hrašova-kredytnaj i padatkova-biudžetnaj palityki.
«Što tyčycca tekstu jakoha-niebudź mahčymaha kredytnaha pahadnieńnia pamiž MVF i ŭradam Biełarusi, to jano budzie raspaŭsiudžana tady, kali budzie hatova», - dadaŭ Piter Dołman.
***
Taksama MVF čakaje pačatku adnaŭleńnia ekanomiki Biełarusi ŭ 2018 h., havorycca ŭ pres-relizie MVF pa vynikach kansultacyj u adpaviednasci z Artykułam IV 2016 hoda ź Biełaruśsiu.
«Čakajecca dalejšaje skaračeńnie ekanomiki ŭ hetym i nastupnym hadach, što tłumačycca ŭsio jašče słabymi bałansami i strukturnymi pieraškodami.
Čakajecca, što abmiežavanaje adnaŭleńnie ekanomiki pačniecca ŭ 2018 hodzie, u toj čas jak u siarednieterminovaj pierśpiektyvie patencyjny temp rostu pavysicca pryblizna tolki da 1,75%», - havorycca ŭ zajavie fondu.
Pavodle prahnozaŭ MVF, što na praciahu nastupnych niekalkich hadoŭ inflacyja pastupova źnizicca da ŭzroŭniu nižej za 10%.
U pres-relizie adznačajecca, što praviadzieńnie bolš žorstkaj padatkova-biudžetnaj i hrašova-kredytnaj palityki na praciahu bolšaj častki 2015—2016 hadoŭ sadziejničała makraekanamičnaj stabilizacyi. Abmienny kurs ciapier stabilizavaŭsia, a spredy pa mižnarodnych ablihacyjach skaracilisia.
«Paśla pierachodu da bolš hnutkaha režymu abmiennaha kursu ŭ pačatku 2015 hodu rezervy stabilizavalisia, a ŭ apošnija miesiacy jany pačali raści. Deficyt rachunku biahučych apieracyj trochi pavysiŭsia ŭ hetym hodzie, ale znachodzicca na značna bolš nizkim uzroŭni, čym niekalki hadoŭ tamu», — skazana ŭ zajavie.
***
Jak paviedamlałasia, misija MVF na čale P. Dołmanam budzie pracavać u Biełarusi z 19 vieraśnia pa 1 kastryčnika. Da hetaha misija MVF naviedvała Minsk z 21 pa 30 červienia, kab pravieści acenku biahučaj ekanamičnaj palityki i štohadovyja kansultacyi z uładami pavodle Artykuła IV.
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary