Ekśpierty: Bolšaść ludziej zaradžaje smartfon niapravilna

Lityj-ijonnyja akumulatary ŭ smartfonach adčuvalnyja da tak zvanaha «stresu». Jak i ŭ ludziej, praciahły stres moža skaracić praciahłaść žyćcia batarei. U našych siłach źnizić nahruzki na pryładu i padoŭžyć termin jaje słužby.

Adklučajcie smartfon ad razietki, kali jon całkam zaradžany

Pakidać smartfon zaradžacca na ŭsiu noč — drennaja ideja. Batareja zaradzicca za 2-3 hadziny, paśla hetaha jana budzie atrymlivać enierhiju małymi dozami, kab padtrymlivać zarad na 100%. Heta budzie trymać akumulatar u stanie «napružańnia» i źmienšyć termin jaho žyćcia.

A voś toje, što batareja budzie zaradžacca ŭsie vosiem hadzin vašaha snu i zahinie ad pierahrevu — mif. Sučasnyja smartfony aŭtamatyčna pierastajuć zaradžacca, kali patreba ŭ hetym źnikaje. Načnaja zaradka dla akumulatara škodnaja, ale nie śmiarotna niebiaśpiečnaja.

Nie treba zaradžać batareju da 100%

«Niama nieabchodnaści całkam zaradžać lityj-ijonny akumulatar. Bolš za toje, heta niepažadana, — pišuć śpiecyjalisty Battery University. — Nasamreč lepš zaradzić batareju nie całkam, bo vysokaje napružańnie niehatyŭna ŭździejničaje na batareju».

Čakać 0% na ličylniku taksama nie treba.

«Padobna miechaničnym pryładam, jakija znošvajucca chutčej pry intensiŭnym vykarystańni, hłybinia razradki (DoD) vyznačajecca kolkaściu cykłaŭ batarei. Čym mienš razradka, tym daŭžej batareja prasłužyć».

U hetaha tezisa jość ekśpierymientalnaje paćvierdžańnie. Pa dadzienych Battery University, kali pry značeńni DoD 100% (poŭnaja razradka) batareja słužyć 300-500 cykłaŭ, to pry 50% DoD jaje chopić užo na 1200-1500 cykłaŭ.

Zaradžać niekalki razoŭ na dzień

Ekśpierty rajać pastajanna trymać zarad akumulatara pamiž 40 i 80 adsotkami. Heta značyć, što značna lepš zaradzić smartfon niekalki razoŭ karotkimi siesijami, čym pastavić jaho ŭ razietku na ŭsiu noč ci na ŭvieś dzień.

Jość raspaŭsiudžany mif pra toje, što pierad tym, jak padklučycca da razietki, treba dačakacca maksimalnaj razradki batarei, a zatym całkam jaje zaradzić. Chutčej za ŭsio, jon pajšoŭ z časoŭ papularnaści nikiel-kadmijevych i nikiel-mietał-hidrydnych akumulataraŭ — dla ich sapraŭdy była karysnaja «treniroŭka» z poŭnymi cykłami zaradki-razradki. Lityj-ijonnym batarejam takija praktykavańni nie patrebnyja.

Darečy, vielmi škodna dla batarei pakinuć jaje nadoŭha całkam razradžanaj. Kali jedziecie ŭ adpačynak — pakłapaciciesia pra toje, kab akumulatar byŭ zaradžany chacia b na 40—60%. Inakš paśla vašaha viartańnia jaho jomistaść moža prykmietna źmienšycca.

Razradžajcie batareju całkam chacia b raz na try miesiacy

Vyklučeńnie dla papiaredniaj parady — pieryjadyčnaja «pierazahruzka» akumulatara.

Z časam chimičnyja ŭłaścivaści batarei mianiajucca, jana pačynaje razradžacca chutčej. Adnak virtualnaja batareja — toje, jak smartfon «ujaŭlaje» kolkaść zaradu, — zastajecca niaźmiennaj.

Kali vy nikoli nie dapuskajecie poŭnaj razradki pryłady, dźvie hetyja škały buduć razychodzicca ŭsio dalej. Vaš davier da ličylnika moža pachisnucca: smartfon adklučycca na 3, 5 abo navat 10 pracentach zaradu.

Kab adkalibravać chimičnuju i virtualnuju batarei, treba čas ad času pravodzić poŭnuju razradku akumulatara. U hety momant pryłada skinie tak zvany nižni ściah zarada akumulatara i adkarektuje virtualnuju škału.

Analityki Battery University rajać rabić heta choć by raz u try miesiacy (abo kožnyja 40 častkovych cykłaŭ razradki). Tym, u kaho smartfon časam «pamiraje» vypadkova, pravodzić kalibroŭku nieabaviazkova.

Paźbiahajcie pierahrevu

Vysokaja tempieratura — luty vorah lityj-ijonnych akumulataraŭ, našmat bolš surjozny, čym 100% na ličylniku zarada. Adzin mocny pierahreŭ moža rezka skaracić termin słužby batarei.

Hraničnyja tempieratury, pry jakich mahčyma vykarystańnie akumulataraŭ: ad —40°C da +50°C. Dapuščalny dyjapazon zaradu mienšy: ad 10 da 30°C.

Nie dapuskajcie papadańnia na mabilnyja pryłady pramych soniečnych pramianioŭ, nie pakidajcie ich kala pramych krynic ciapła — i batareja budzie słužyć vam doŭha i ščaśliva.

• 0
• 0
• 0
• 0
• 0
• 0
• 0
• 0