«Chopić hetych reformaŭ u adukacyi — treba ŭdaskanalvać toje, što jość», — zajaviŭ Alaksandr Łukašenka, zasłuchaŭšy 9 žniŭnia dakład čynoŭnikaŭ urada ab chodzie pryjomnaj kampanii i padrychtoŭcy sistemy adukacyi da novaha navučalnaha hoda.
«Treba dać narmalnyja padručniki, pierš za ŭsio, padručniki historyi ŭ škoły, kab dzieci razumieli, što adbyvałasia ŭčora ŭ našaj krainie. Pohlad u minułaje — heta pohlad u budučyniu. Nie mnie vas vučyć. A my pačynajem zajmacca nie tymi pytańniami, jakija siońnia nieadkładnyja, nadzionnyja dla našaj sistemy adukacyi», — cytuje Łukašenku pres-słužba prezidenta.
U pryvatnaści, adznačyŭ jon, nieabchodna «akuratna stavicca» da Bałonskaha pracesu. Nieabdumanyja rašeńni ŭ hetym kirunku prosta razburać staruju narmalnuju sistemu adukacyi, a na jaje miescy ničoha nie źjavicca, dadaŭ Łukašenka.
«Nas užo zachodniki papiaredžvajuć: vy adzinyja ŭ byłym sacyjalistyčnym łahiery, nie kažučy pra Saviecki Sajuz, zastalisia, chto nie razburyŭ sistemu adukacyi, i jana daje vam efiekt, nie pałamicie jaje. Asabliva nas papiaredžvajuć našy zachodnija susiedzi — uschodnie-jeŭrapiejskija dziaržavy, jakija mieli padobnuju sistemu adukacyi», — padkreśliŭ kiraŭnik dziaržavy.
Jašče adnym važnym pytańniem u sistemie adukacyi, pavodle jaho słoŭ, źjaŭlajecca padrychtoŭka vučniaŭ da škoły. «Majo patrabavańnie adno, jano zychodzić ad hramadstva: usie dzieci pavinny być u roŭnych umovach i pavinny pajści ŭ škołu «adnolkava». Jany pavinny być apranutyja, jak usie. Jość biadniejšyja płasty nasielnictva, jość siarednija, bahatyja i hetak dalej, ale dzieci ŭ hetym nie vinavatyja. Jany pavinny być apranuty i padrychtavany: partfieli, rukzaki i inšaje, što nieabchodna, ad płastylinu i ałoŭkaŭ da adzieńnia — usio pavinna być adnolkavaje. Dzie brać hrošy, ja ŭžo dziesiać razoŭ pra heta kazaŭ u papiarednija hady», — dadaŭ Łukašenka.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie5
Kamientary