6 maja stała viadoma pra vykanańnie śmiarotnaha prysudu ŭ dačynieńni da žychara Rečycy Siarhieja Ivanova. U sakaviku 2015 hoda jon pryznany vinavatym u žorstkim zabojstvie znajomaj dziaŭčyny i pryhavorany da rasstrełu.
Kaardynatar kampanii «Pravaabaroncy suprać śmiarotnaha pakarańnia» Andrej Pałuda paviedamiŭ BiełaPAN, što Ivanova vyvieli z kamiery SIZA № 1 Minska ŭ noč z 17 na 18 krasavika. Pra toje, što śmiarotny prysud pryviedzieny ŭ vykanańnie, svajakam paviedamili paśla 1 maja.
«Najbližejšym časam jany pavinny zabrać paśviedčańnie ab śmierci. Asabistyja rečy asudžanaha pakul nie viarnuli», — adznačyŭ pravaabaronca.
Zhodna ź biełaruskim zakanadaŭstvam, svajakam nie vydajuć cieła asudžanaha, a taksama nie paviedamlajuć pra miesca jaho pachavańnia.
Viadoma, što Ivanoŭ źviartaŭsia z prašeńniem ab pamiłavańni na imia Alaksandra Łukašenki i nakiroŭvaŭ skarhu ŭ Kamitet pa pravach čałavieka AAN. Adkaz ź mižnarodnaj struktury pakul nie pastupaŭ. Niahledziačy na heta, prysud pryviedzieny ŭ vykanańnie.
Zaraz u «kalidory śmierci» u SIZA № 1 znachodziacca try čałavieki, pryhavoranyja da vyklučnaj miery pakarańnia: Ivan Kuleš (žorstkaje zabojstva troch čałaviek), Hienadź Jakavicki (žorstkaje zabojstva adnaho čałavieka), Siarhiej Chmialeŭski (žorstkaje zabojstva troch čałaviek).
Biełaruś zastajecca adzinaj krainaj u Jeŭropie i na ŭsioj postsavieckaj prastory, dzie da hetaha času ŭžyvajecca śmiarotnaje pakarańnie. Z 1991 hoda da rasstrełu pryhavorana bolš za 400 čałaviek, Łukašenka pamiłavaŭ tolki adnaho asudžanaha.
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary