Novy paŭdniovy cykłon, jaki pryjdzie ŭ Biełaruś u subotu, 16 studzienia, pryniasie vialikija śniehapady i pa intensiŭnaści budzie padobny na cykłon «Danieła», ź jakim kraina sutyknułasia ŭ minuły aŭtorak. Pra heta paviedamiŭ načalnik słužby hidramietearałahičnych prahnozaŭ Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Dźmitryj Rabaŭ.
Pavodle jaho słoŭ, vyšynia śniežnaha pokryva pa krainie, jak miarkujecca, pavialičycca na 10-15 sm. Śnieh budzie iści pa ŭsioj krainie, ale centr cykłona budzie znachodzicca nad Homielskaj vobłaściu. «U subotu cykłon pačnie źmiaščacca z Karpackich hor na paŭdniovy ŭschod Biełarusi i pojdzie na poŭnač pa ŭschodzie krainy, tamu i najbolš składanym nadvorje budzie na paŭdniovym uschodzie», — adznačyŭ sinoptyk.
U hety dzień u krainie płanujecca abjavić aranžavy ŭzrovień niebiaśpieki. «Takoha ŭrahannaha vietru nie budzie, jak pry «Chaŭjery» (cykłon 2013 hoda, jaki adnosicca da najvyšejšaha, čyrvonaha, uzroŭniu niebiaśpieki), kali jon dasiahaŭ 25 m/s, ale ŭsio roŭna budzie miacielica i paryvy da 14 m/s», — raskazaŭ Rabaŭ.
Na bolšaj častcy Biełarusi ŭ subotu čakajecca śnieh, mokry śnieh, u asobnych rajonach miescami mocny śnieh, miacielica, na darohach śniežnyja zanosy, pa paŭdniovym uschodzie — nalipańnie mokraha śniehu i hałalod, paryvisty viecier. Tempieratura pavietra pa krainie budzie kantrastnaj — nočču ad minus 2°S pa poŭdni da minus 15°S pa poŭnačy, dniom čakajecca ad 0 — minus 2°S pa poŭdni da minus 10°S pa poŭnačy.
U Minsku taksama prahnazujecca śnieh, ranicaj i dniom časam mocny, miacielica, paryvisty viecier. Tempieratura nočču minus 6—8°S, dniom minus 4—6°S.
U niadzielu cykłon pačnie sychodzić u Ćviarskuju vobłaść Rasii, jaho ŭpłyŭ na Biełaruś jašče zachavajecca, ale, pavodle słoŭ sinoptyka, nadvorje «naładzicca i budzie ŭžo bolš spakojnym».
Najbolšyja ciažkaści, pavodle słoŭ Rabava, umovy nadvorja stvorać vadzicielam i słužbam elektrazabieśpiačeńnia.
Śpiecyjalist taksama adznačyŭ, što ŭ novaha cykłona pakul niama nazvy, bo imia prysvojvajecca Svabodnym instytutam Bierlina niepasredna paśla ŭtvareńnia cykłona. Miarkujecca, što cykłon źjavicca na mietearałahičnych kartach u piatnicu.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie5
Kamientary