Kandydat u premjer-ministry Łatvii Marys Kučynskis paabiacaŭ partnioram pa mahčymaj kaalicyi pieravieści adukacyju, jakaja apłočvajecca dziaržavaj, vyklučna na łatyšskuju movu.
Marys Kučynskis źjaŭlajecca kandydatam na pasadu premjer-ministra Łatvii ad palityčnaha abjadnańnia «Sajuz zialonych i sialan» (SZS), jakoje ŭvachodzić va ŭradavuju kaalicyju. Akazać padtrymku Kučynskisu abiacaje taksama pravaje nacyjanalistyčnaje abjadnańnie «Nacbłok».
Sustaršynia «Nacbłoka» Rajvis Dzintars zajaviŭ žurnalistam, što ŭ abmien Kučynskis hatovy padtrymać pravych palitykaŭ pa pytańniach admovy ad pryjomu biežancaŭ i pieravodu ruskich škoł na łatyšskuju movu navučańnia. Praŭda, pa słovach Dzintarsa, u partyj razychodziacca mierkavańni adnosna terminaŭ realizacyi hetaha prajekta. Sam Kučynskis, u svaju čarhu, zapeŭniŭ, što ruskamoŭnym patrebnaja palepšanaja intehracyja.
Pa słovach staršyni praŭleńnia SZS Armanda Kraŭze, pytańnie pieravodu ruskich škoł i tak užo daŭno znachodzicca na paradku dnia ŭrada. «Tut ničoha nie mianiajecca, heta doŭhaterminovaja pierśpiektyva. Kankretnyja terminy my stavić nie žadajem, pryśpiešvać padziei — taksama. Ale hety praces užo idzie. Ruskamoŭnyja ŭsio čaściej addajuć dziaciej u łatyšskija škoły», — zajaviŭ jon.
Ciapier u łatvijskich škołach nacmienšaściaŭ 60% navučalnych pradmietaŭ vykładajecca na dziaržaŭnaj movie, 40% — na movie nacmienšaściaŭ. Va ŭradavaj dekłaracyi dahetul značyŭsia namier palitykaŭ ruchacca ŭ bok pierahladu hetaj praporcyi da 2018 hoda.
Druhim kandydatam na pasadu premjera źjaŭlajecca eks-ministr adukacyi i navuki, pradstaŭnik partyi «Adzinstva» Karlis Šadurskis, jaki ŭ svoj čas adstojvaŭ školnuju reformu, što praduhledžvaje častkovy pieravod škoł nacmienšaściaŭ na dziaržaŭnuju movu.
Kiraŭnik urada Łatvii Łajmdota Straŭjuma abviaściła ab adstaŭcy 7 śniežnia.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7676
Kamientary