Nobieleŭski tydzień Śviatłany Aleksijevič: škoła ŭ imihranckim rajonie, «mišlenaŭski» restaratar i zorka z enierhijaj letniaha sonca

Śviatłana Aleksijevič prybyła ŭ Stakholm 5 śniežnia naŭprostavym rejsam ź Miensku. Žyć nobeleŭskaja laŭreatka budzie ŭ Hrandhateli ŭ centry švedzkaj stalicy. Abaviazki nobeleŭskaha ataše vykonvaje były ambasadar Švecyi ŭ Biełarusi Stefan Eryksan, jaki sustreŭ piśmieńnicu ŭ aeraporcie z bukietam ad Švedzkaj akademii. Jon kuryruje ŭsiu prahramu Nobeleŭskaha tydnia Śviatłany.

6 śniežnia rankam usie laŭreaty adpraŭlajucca ŭ Nobeleŭski muzej. A a 15 hadzinie pavodle mienskaha času adbudziecca pieršaja publičnaja padzieja z udziełam Śviatłany Aleksijevič — presavaja kanferencyja ŭ vialikaj zali Švedzkaj akademii.

7 śniežnia ŭ paniadziełak a 19.30 pavodle mienskaha času Śviatłana Aleksijevič pračytaje svaju Nobeleŭskuju lekcyju. Vystupać Śviatłana budzie ŭ kaściumie z štanami. «Budzie dziŭna, kali ja budu ŭ viečarovaj sukiency i dekalte raspaviadać pra takija žorstkija rečy, jak Čarnobyl, vajna ŭ Afhanistanie, — patłumačyła laŭreatka.

Paśla lekcyi Švedzkaja akademija ładzić u honar laŭreatki ŭračystuju viačeru.

8 śniežnia a 21.00 hadzinie pavodle mienskaha času pačniecca znakamity nobeleŭski kancert. Dyryhavać arkiestram zaprasili Franca Velzera-Miosta, a saliravać — małodoha rasiejskaha pijanista Daniiła Tryfanava. Kvitok na kancert kaštavaŭ kala 150 eŭra.

9 śniežnia Śviatłana Aleksijevič vypravicca ŭ škołu ŭ stakholmskim pryharadzie Rynkiebiu. Pieravažnaja bolšaść vučniaŭ škoły — mihranty z roznych krainaŭ. Škołu ŭžo nazyvajuć adnoj z samych paśpiachovych madelaŭ intehracyi. Dla Nobeleŭskaha laŭreata heta tradycyjny vizyt.

Na cyrymoniju ŭznaharodžańnia zaprašajuć 10 śniežnia ŭ 18.30 (mienski čas). Dyryhavać Karaleŭskim Stakholmskim filarmaničnym arkiestram padčas jaje ŭpieršyniu budzie žančyna Ana-Maryja Chelsinh, a saliravać — tenar Daniel Juchansan. Nobeleŭski bankiet pačniecca a 21-j (pavodle mienskaha času). «Bankietnaja» pramova ŭ Śviatłany Aleksijevič budzie ŭžo pra sučasnaść. «Tut užo budzie pra sytuacyju, u jakoj apynułasia Biełaruś, usie my», — raspaviała Aleksijevič.

Udzieł u bankiecie kaštuje achvočym 2 700 kron (kala 280 eŭra). Meniu abiacajuć apublikavać tolki ŭ toj samy dzień, ale ŭžo viadoma, što karmić laŭreataŭ i haściej buduć kulinarnyja navatary Sajan Isaksan i Daniel Rus. Isaksan kiruje restaranami Shibumi i Råkultur, a taksama ŭhanaravanaj mišlenaŭskaj zorkaj restaracyjaj Esperanto. Danijel Rus adkazvaje na bankiecie za deserty ŭžo druhi hod zapar. Jon kiruje restaranam K-märkt i kampanijaj Pastry Design. Meniu zasnavanaje na miascovych skandynaŭskich praduktach z akcentam na harodninu. «Chacia Sajan damahajecca elehanckaha vyhladu stravaŭ, jon hatuje tak, kab vykarystać inhredyjenty najbolš karysnym čynam», — pišuć u pres-relizie. Kali ŭ kaho z haściej jość admysłovyja patrabavańni da ježy, pra heta prosiać paviedamlać zahadzia.

Spažyvać kulinarnyja vynachodnictvy hości buduć pad muzyčnaje supravadžeńnie Any Ternchiejm, Sejnabu Sej i kamernaha choru Hustava Serkvista. Hučać budzie švedzkaja muzyka.

Zabaŭlalnuju prahramu jak zaŭždy trymajuć u sakrecie. Adkazvaje za jaje kampanija Grumpy Production, jakoj kirujuć Mats Jankiel i Pjer Rozenhren.

Kvietkavaje azdableńnie Stakholmskaj ratušy davieryli flarystu Peru Bendžaminu.

U honar Nobeleŭskaha tydnia nad stalicaj Švecyi zapalili zorku. Mastackaja praca pad nazvaj «Tvaja zorka» dacka-iślandzkaha mastaka Alafura Elijasana symbalizuje novyja viedy, mary i śviatło. Instalacyja składajecca sa śvietładyjodnych lampaŭ, jakija pracujuć na ŭznaŭlalnych krynicach enerhii, sabranaj padčas letniaha śviata Soncazvarotu. Enerhija «nazapašvałasia ŭsio leta, i ciapier Vašaja Zorka budzie davać trochi letniaha śviatła ŭ zimovaj ciemry», — kažuć arhanizatary.

Zaviaršacca mierapryjemstvy nobeleŭskaha tydnia 13 śniežnia.

• 0
• 0
• 0
• 0
• 0
• 0
• 0
• 0