Barysa Chamajdu dziaržpresa nazvała stryptyzioram

U hazecie «Viciebski rabočy» peryjadyčna źjaŭlajucca abraźlivyja artykuły pra miascovych apazycyjaneraŭ.

Da apošniaha času na ich specyjalizavaŭsia vyklučna žurnalist Uładzimier Kaściukievič, jaki dazvalaŭ sabie nazvać pensijanerku‑aktyvistku Alenu Zalesskuju «staroj diemokratičieskoj karhoj», a raspaŭsiudnika niezaležnaj presy Barysa Chamajdu — «bamžom», jaki tolki što nie žabruje ŭ samym centry Viciebsku — kala tak zvanaha «siniaha domu», domu №28 pa vulicy Lenina, pobač z samym šmatludnym u horadzie transpartnym prypynkam.

Redaktarka «Viciebskaha rabočaha» taksama vyrašyła apisać zaniatak spadara Chamajdy, jaki, pavodle jejnych słovaŭ, «stamiŭšysia ad biespaśpiachovaha stajańnia kala «siniaha domu» i abyjakavaści haradžan da svajoj persony» vyrašyŭ pravodzić… sieansy stryptyzu. I adbyvajecca hetaje šoŭ, pavodle spadaryni Biehunovaj, jakraz u pamiaškańni budynku, dzie mieścicca hazeta «Viciebski rabočy», pryčym z raźlikam na «maścitych akułaŭ piara» — mienavita tak redaktarka charaktaryzuje svaich kalehaŭ i padnačalenych.

Sam «stryptyzior», 60‑hadovy piensyjaner Barys Chamajda, źjaŭleńnie abraźlivaha artykuła na staronkach abłasnoj dziaržaŭnaj hazety tłumačyć nastupnym čynam:

— U budynku pa vulicy Hohala mieścicca nia tolki hazeta «Viciebski rabočy». U pryvatnaści, tam aranduje pamiaškańnie adna firma, dzie mnie dazvalajuć pakidać na noč svaje rečy. Kab nia źmierznuć za 5‑6 hadzin pracy kala «siniaha domu», ja štoranicy zachodžu tudy, kab apranucca ŭ jašče adzin švedar i valonki. Adnojčy mianie padpilnavali fotakarespandenty «Viciebskaha rabočaha» i biez usialakich tłumačeńniaŭ pačali zdymać, jak ja zdymaju palito, potym apranaju šveder i ŭrešcie abuvaju valonki. Ja adrazu zrazumieŭ, što rychtujecca niejki padvoch, ale kab mianie na staronkach hazety nazvali «stryptyzioram» — nia moh navat sabie ŭjavić!

«Na vačoch u ahałomšanych naviednikaŭ spadar Chamajda, nie śpiašajučysia, spačatku raspranajecca, a potym hetaksama pryhoža i hracyjozna apranajecca ŭ staryja švedry, štany j valonki», — piša redaktarka. A naprykancy dadaje: «Niadaŭna sudom było adkładziena čarhovaja administracyjnaja sprava suprać Barysa Chamajdy, jaki zajaviŭ, što nie razumieje rasiejskaj movy, na jakoj ź im razmaŭlaje sudździa, i zapatrabavaŭ pierakładčyka. Chaciełasia b adznačyć, što z našymi žurnalistami «stryptyzior» vydatna dyskutavaŭ na čyściejšyj rasiejskaj movie», i navat nazvaŭ «lubuju» Biełaruś, za roskvit jakoj jon nibyta pieražyvaje, «krainaj niepałochanych idyjotaŭ».

Prademanstravaŭšy viedańnie specyfiki mužčynskaha stryptyzu, naprykancy artykuła redaktarka «Viciebskaha rabočaha» zadaje rytaryčnaje pytańnie, dziela jakoha, mabyć, i pisaŭsia hety tekst: dyk pra čyj ža dabrabyt usio‑tki dbaje arhanizatar šoŭ — svajoj radzimy abo ščodrych da jaho «apiekunoŭ»?

— Kali mianie bolš niama čym upiknuć za pryncypovuju palityčnuju pazycyju, jak tolki panošanym adzieńniem, dyk usim čytačam adrazu zrazumieła, ci jość u mianie «ščodryja apiekuny», — razvažaje Barys Chamajda. — A voś kali sama redaktarka abłasnoj hazety sprabuje praktykavacca ŭ palityčnaj satyry dy piša artykuł dla apošniaj 16‑j staronki, to mižvoli zkradajecca dumka: ci nie zamovili jaho jejnyja «ščodryja apiekuny»?

Apazycyjaner kaža: jamu škada spadaryniu Biehunovu, jakaja svoj litaraturny talent marnuje na takoha kštałtu artykuły. Tamu źviartacca ŭ sud z zajavaj pra abrazu asoby nie źbirajecca. A nakont taho, jak maładaja žančyna nadumałasia nazvać jaho «stryptyzioram», zhadvaje chiba znakamitaje vysłoŭje pra toje: kožny miarkuje pra śviet u mieru svaje razbeščanaści.

Alena Štral, bulletinonline.org

• 0
• 0
• 0
• 0
• 0
• 0
• 0
• 0