Kalifarnijski rokier ź Biarozy: Uład Kucharčuk z top-30 maładych pradprymalnikaŭ
Uład Kucharčuk byŭ nazvany adnym z 30 maładych biełaruskich top-pradprymalnikaŭ. Jamu 28, žyvie ŭ San-Francyska. Śfiera dziejnaści — šou-biźnies. Dakładniej, muzyčny hurt Kiwi Time, u jakim Uład siadzić za ŭdarnymi i vykonvaje rolu mieniedžara.
Try biełaruskija akordy
Uvieś hurt rodam ź Biarozy, raspaviadaje Uład. Siabry ź dziacinstva. Razam z hitarystam Joham pačynali hrać pank-rok u bendzie ŽBDDB— spačatku ŭ Biarozie, potym u Minsku. Prajektu Kiwi Time tady nie było, muzyku hrali prosta ŭ svaju asałodu dla siabie i siabroŭ.
«U Biełarusi pazityŭnuju muzyku hrać nie vielmi chaciełasia», — tłumačyć Uład. Junacki maksimalizm, płej-list z Neuro Dubel, Lumen i «Hraždanskoj Oborony» dy suvoraje asiarodździe dali ŭ vyniku «sacyjalna skiravany» žanr. «Tudy nie chadzi, taho nie rabi, kožny namahajecca stavić pałki ŭ koły», — tak bačyŭ jon śviet vakoł siabie.
Jak kaža Uład, u Biełarusi ŭzrovień ich muzyki nie ros, raźvić svoj patencyjał było niemahčyma.
Pavodle jaho nazirańniaŭ, i publika ŭ Biełarusi bolš zakrytaja, čym u ZŠA. Kali biełarusu spadabaŭsia kancert, jon naŭrad ci pabiažyć za scenu kazać hurtu, jak kruta jon adyhraŭ. Amierykancy ŭ takich vypadkach, kaža Uład, naadvarot «u došku svaje».
Jon zhadvaje, što i ŭ biełaruskich škołach, naprykład, za pamyłku adrazu dematyvujuć: maŭlaŭ, u ciabie ničoha nie vyjdzie ŭ žyćci, adkul u ciabie ruki rastuć.
U Štatach ža naadvarot — pryniata matyvavać na dasiahnieńni, miarkuje Uład. Jon pryhadvaje, jak u śniežni hraŭ z suśvietna viadomym dramieram Uiłam Kełchunam — spačatku adčuvaŭ siabie niaŭtulna ad taho, što muzyka takoha ŭzroŭniu aceńvaje jaho ihru. U kancy dnia Uład spytaŭ Kełchuna, jak toj stavicca da pamyłak. «Rabi jak maha bolš pamyłak, tolki tak ty zmožaš stać lepšym».
Z Ahajo ŭ San-Francyska
U Amieryku Ułada pryviali, jak jon kaža, «cikaŭnaść i biezvychodnaść».
U 2007 hodzie jon upieršyniu trapiŭ u Štaty pa prahramie Work and Travel. «Pryjechaŭ, hladžu — usio kłasna, ludzi pazityŭnyja, usie mohuć parazumiecca adzin z adnym…» — Ułada ździviła amierykanskaja atmaśfiera. Paśla doŭhich rozdumaŭ jon vyrašyŭ pasprabavać znajści sabie miesca ŭ ZŠA.
Spačatku Uład trapiŭ u maleńkuju viosku u štacie Ahajo, dzie muzyka pracavaŭ na budoŭlach, «dachi rabiŭ». Sprabavaŭ hrać z roznymi ludźmi, dy było ciažka — nie adčuvaŭ «duchoŭnaj suviazi». Patrebny byli «svaje ludzi, ź jakimi nie treba ničoha abmiarkoŭvać: prosta siadaješ i hraješ».
«Miesca, dzie ja žyŭ u Ahajo, jak začaravany vostraŭ — kali ludzi z byłoha SSSR pačynajuć zarablać hrošy, jany zabyvajuć pra svaje mety i mary. I, jak vynik, zavisajuć na adnym miescy dy dehradujuć», — zhadvaje jon.
U chutkim časie vyrašyŭ pierajechać u San-Francyska, dzie znajšoŭ patrebnaje «kamjunici». Tam jon užo pracavaŭ hruzčykam, što «zdałosia pušynkaj u paraŭnańni z dachami Ahajo». Zaraz Uład kaža, što Biełaruś — jaho Baćkaŭščyna, ale San-Francyska — jaho dom.
U San-Francyska jamu nie stavała tolki rodnych jamu ludziej, dy praz dva hady da jaho dałučylisia vakalistka Ania i kłavišnik-hitaryst Mikałaj — pačali hrać akustyčny prajekt. U 2011 hodzie hurt uźjadnaŭsia z pryjezdam hitarysta Johi. Takim čynam, syšło 4 hady, kab abjadnacca i adradzić Kiwi Time.
«Ciažkaja papsa»
Kali ŭvieś hurt sabraŭsia, paŭstała pytańnie: hrać dla siabie i siabroŭ ci pracavać pa-surjoznamu.
Jakraz u hety čas Uład paśla troch hod navučańnia ŭ haradskim kaledžy San-Francyska byŭ zaličany va Univiersitet štatu ŭ San-Francyska na Business Administration — toje, ab čym dla jaho maryli jaho baćki.
«Pryjšłosia abirać, ci zajmacca tym, što ty lubiš, ci tym, što pryniasie tabie finansavaje zadavalnieńnie», — kaža Uład. Jon i jaho hurt vyrašyli, što vyjście tolki adno: na čužynie siarod nieznajomcaŭ ŭsio roŭna treba pačynać usio z nula, tamu možna ryzyknuć.
Dakładnaha płanu znoŭ ža nie było, tolki mara. Uład «zaviazaŭ» z navučańniem i «pahoniaj za koračkaj» dy vyrašyŭ pryśviacić žyćcio muzycy, zaniatkam johaj i zdarovamu ładu žyćcia.
Jon kaža, što nie bajaŭsia taho, što ŭ Amierycy i bieź ich jość sotni tysiač muzykaŭ. «Šaniec jość va ŭsich, usio zaležyć ad śvietapohladu», — pierakonvaje jon.
Pieršy albom Kiwi Time, zapisany ŭłasnymi siłami hurta, chutčej nahadvaŭ biełaruskuju tvorčaść. Hrošy na jaho zapis sabrali praz achviaravańni na servisie IndieGoGo. Druhi albom pisali ŭžo z łejbłam — hety zapis zatym trapiŭ u ruki da pop-pradziusara Dena Šy (jaki, miž inšym, pracavaŭ z Marajaj Kiery, Dženifier Łopies i Sielin Dyjon). Jon prapanavaŭ dadać elektronnaha, tancavalnaha saŭndu — hurt zahučaŭ bolš «pa-kamiercyjnamu».
«Indie-dance-pop-rock — pa-biełarusku heta, napeŭna, žorstkaja papsa», — śmiajecca Uład. Ale dadaje: rabić pop ciažej, čym rok. Bolš času treba pravodzić u studyi, bolš układvać enierhii, kab zrabić chit.
Pryjemny biełaruski akcent
Viadoma, biełaruski akcent u siabroŭ zaŭvažny, niahledziačy na zaniatki z vykładčykam pa vakale. Na zapisach, što ciapier možna pasłuchać, adčuvajecca, jak vakał «rezali na šmatki» i źbirali ŭ frazy, kab hołas hučaŭ bolš «pa-amierykansku», śćviardžaje Uład.
«Kali havoryš pa-biełarusku ci pa-rusku, vykarystoŭvaješ zusim inšyja myšcy. Ciažka adnačasova dumać pra heta i skancentravacca na enierhietycy», — kaža jon. — Ale «practice makes perfect», jak kažuć amierykancy».
Dy trochi akcentu hurtu rekamiendavali pakinuć, kab było paznavalnaje i niepaŭtornaje hučańnie. «Jak u System of a Down ci Gogol Bordello?» — uźnikajuć asacyjacyi. Nie na stolki, adkazvaje Uład. System of a Down mieli dobruju startavuju placoŭku, niahledziačy na akcent: «U Łos-Andželesie armian chiba nie bolš, čym u Armienii». A Gogol Bordello biaruć nie tolki i nie stolki akcentam: «Takich hurtoŭ, što hrajuć cyhanski rok, mnoha, chiba nie ŭ kožnym horadzie jość. Ale Gogol Bordello — adzinyja, chto prakačaŭsia».
Biełaruski akcent Kiwi Time bolš prajaŭlajecca ŭ inšym. Na pačatku vystupaŭ Kiwi Time haśnie śviatło, vakalistka vykonvaje kuplet z «Kupalinki». Paśla hetaha ŭžo hrajuć bolš zvykłuju dla słuchača anhłamoŭnuju muzyku. A ŭ siaredzinie kancertu vykonvajuć ruskamoŭnuju pieśniu «Ljot dožd́». «Dla amierykancaŭ heta ekzatyčny šok», — kaža Uład.
Siarod płanaŭ hurtu i mierčandajz «z akcentam» — rečy ručnoj raboty z arnamientam ci vyšyŭkaj.
«Jość mierkavańnie, što pra Biarozu pavinien viedać uvieś śviet», — śmiajecca Uład.
Alternatyŭnaje myśleńnie dla Biełarusi
Ci maje hurt žadańnie viarnucca na radzimu? «Jość, ale nienadoŭha, — kaža Uład. — Nie liču siabie čałaviekam, jaki puskaje karani. Dy i meta maja ad miesca nie zaležyć».
Da Biełarusi jamu chaciełasia by danieści fiłasofiju inšaha, alternatyŭnaha myśleńnia. Na jaho dumku, u ZŠA bolšaść užo ŭźniała svoj dabrabyt da taho stanu, kali možna bolš uvahi nadavać unutranamu śvietu.
«U Biełarusi apošnija 25 hod usio mituśliva i niezrazumieła», — kaža jon. Jamu zdajecca, što biełarusy dumajuć bolš pra źniešniuju bačnaść dabrabytu, pra toje, jak siabie pradstavić.
Žyćcio ŭ ZŠA, kaža jon, dazvoliła inakš pahladzieć na śviet i na siabie samoha. Ź ciaham času Uład pačaŭ zajmacca nie tolki muzykaj, ale i johaj — ciapier padpracoŭvaje instruktaram.
Jon zhadvaje, što amierykanskaja atmaśfiera jaho pahłynuła nastolki, što, byŭšy niadaŭna ŭ Maskvie, jon adčuŭ siabie niby ŭ realici-šoŭ — nastolki ŭsio adčuvałasia nienaturalna, nastolki ludzi niezvyčajna chadzili i hladzieli adno na adnaho.
Što Uład robić u śpisie top-pradprymalnikaŭ?
Na hetaje pytańnie Uład nie maje adkazu: «Dahetul pytaju sam siabie pra pośpiech. Nie asabliva viedaju, što adbyłosia, što ja trapiŭ u toj śpis».
Pavodle apisańnia śpisu, u jaho ŭklučanyja siarod inšych «pradstaŭniki śfiery kultury, jakija majuć pierśpiektyvy i mahčymaści atrymańnia vysokich hanararaŭ i manietyzacyi vynikaŭ svajoj pracy ŭ budučyni».
«My z hurtom vielmi čakajem, kali heta adbudziecca. Na dadzieny momant hurt — heta jak startap, małady biźnies, što patrabuje niejmaviernych inviestycyj času i finansaŭ, — kaža Uład. — Ale ja liču, što, kab być paśpiachovym, treba prosta rabić toje, što lubiš, i nie zdavacca, a hrošy pryjduć, kali pryjdzie čas».
Jak kažuć Uładu słuchačy, vystupy Kiwi Time pa enierhietycy daŭno «pieraraśli» tyja zały, u jakich vystupaje hurt. Na dumku muzyki, pieršyja i śviežyja treki — «jak nieba i ziamla». «Vaŭkoŭ bajacca — u les nie chadzić. Hałoŭnaje tut asensoŭvać, nad čym treba pracavać, — kaža Uład. — Prychodzicca napružvacca, ale heta pryjemnaje napružańnie».
Nazva hurtu ź ciaham času nabyła novy sens i dla aŭdytoryi, i dla muzykaŭ. Sprava ŭ tym, što «kivi» ŭ Štatach nazyvajuć novaziełandcaŭ. Tamu i hurt časta prymajuć za novaziełandski. «Ale paśla kancertu ŭsie viedajuć, što jość takaja maleńkaja, ale pryhožaja kraina Biełaruś», — śćviardžaje Uład.
Sam hurt spačatku ličyŭ nazvu «džazavaj», u niečym padobnaj da Apple Tea. Ciapier ža nazva značyć prosta adkrytaść, svabodu i dobry nastroj.
«Hučyć jak kliše, ale na dadzieny momant heta jakraz adlustroŭvaje styl našaha žyćcia ŭ Kalifornii, — kaža Uład. — U peŭny momant ja prosta vyrašyŭ, što chopić dumać pra niehatyŭ. Čałaviek — heta toje, što jon jeść, pje, dumaje i robić, tak što viercie ŭ siabie, i ŭsio atrymajecca».
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary