Ksienija Sabčak pakinuła Rasiju, mierkavana, 14 sakavika. Pra heta piša rasijskaja hazieta «Kommiersant».
33-hadovaja Sabčak — viadomaja rasijskaja televiadoŭca i śvieckaja lvica. Jana dačka adnaho ź lidaraŭ rasijskaha demakratyčnaha ruchu 1980-90-ch, mera Pieciarburha Anatolija Sabčaka, u kamandzie jakoha pačynaŭ svoj uźlot Uładzimir Pucin. Sabčak-baćka pamior ad infarktu pry dziŭnych abstavinach praź miesiac paśla pieradačy ŭłady ad Jelcyna Pucinu. Ksienija ž paśla pavarotu Pucina da šavinizmu asudziła jaho palityku. Jana padtrymlivała antypucinski ruch intelektualna i finansava. Siarod inšaha, jana rezka vykryvała ahresiju Rasii va Ukrainie. Čałaviek zdolny, jana pracavała ŭ tym liku na adziny niezaležny ŭ Rasii telekanał «Dožd́».
Jak piša «Kommiersant», pra svajo rašeńnie časova vyjechać z krainy Sabčak paviedamiła na viačery ŭ honar vychadu novaha numara časopisa L'Officiel — pieršaha pad jaje kiraŭnictvam.
«Admianić premjeru śpiektakla «Žanićba» ŭ Teatry nacyj ja nie mahła, jak i hetuju viačeru, ale zaŭtra ž pakinu Rasiju na niekatory čas», — skazała Sabčak.
Blizkija siabry nieaficyjna tłumačyli, što źjazdžaje jana pa rekamiendacyi śpiecsłužbaŭ.
Haspadyniu viečara, zaznačaje «Kommiersant», supravadžali troje mužčyn: muž, akcior Maksim Vitarhan, i dvoje achoŭnikaŭ.
10 sakavika «Novaja hazieta» paviedamiła, što prezidentu RF Uładzimiru Pucina paśla zabojstva Barysa Niamcova dałažyli, byccam by isnuje «rasstrelny śpis», u jakim Ksienija Sabčak, hałoŭred «Echo Moskvy» Alaksiej Vieniadziktaŭ i Michaił Chadarkoŭski. Nibyta kožnaha ź ich źbirajecca zabić asobnaja hrupa kileraŭ z Čačni. Pres-sakratar prezidenta Rasii Dźmitryj Piaskoŭ nazvaŭ hetuju infarmacyju absurdam.
Nielha vyklučać, što šlacham raspaŭsiudu takim čutak pucinskija śpiecsłužby prosta imknucca vycisnuć z krainy znakavych asobaŭ apazicyi.
3 sakavika kala Sacharaŭskaha centra, dzie prachodziła pachavańnie Barysa Niamcova, da Ksienii Sabčak padyšoŭ nieviadomy i skazaŭ: «Majcie na ŭvazie, vy nastupnaja, Ksienija». U suviazi z hetym MUS pačaŭ pravierku.
Kamientary