Iłaryjonaŭ: Pucin atrymaŭ usio, što chacieŭ

Adziny stanoŭčy vynik Minskich pratakołaŭ — mahčymaje spynieńnie ahniu.

U astatnim Pucin atrymaŭ praktyčna ŭsio, što chacieŭ.

Pry hetym nie ŭziaŭ na siabie nijakich abaviazacielstvaŭ.

Usie abaviazacielstvy ŭziała na siabie Ukraina.

Pryčym hetyja ŭkrainskija abaviazacielstvy ciapier jašče padmacavanyja abaviazacielstvami Hiermanii i Francyi.

Adzinym značnym stanoŭčym vynikam pryniatych dakumientaŭ stała damoŭlenaść ab spynieńni ahniu i raźmiežavańni supraćlehłych bakoŭ. Heta daje šaniec na spynieńnie krovapralićcia, hibiel ruskich i ŭkraincaŭ, mirnych žycharoŭ, dobraachvotnikaŭ, vajskoŭcaŭ. Adnak naściarožvaje abvieščanaja data pieramirja — 15 lutaha. Nie vyklučajem, što troje sutak, jakija zastajucca ŭ rasparadžeńni Pucina, mohuć być vykarystany dla pravakacyj, u tym liku ŭ rajonie Debalcava. Naprykład, pa varyjancie «kalidoraŭ dla vychadu» ŭkrainskich vajskoŭcaŭ z akružeńnia pad Iłavajskam, prapanavanych im u žniŭni.

Asnoŭny źmiest pryniatych dakumientaŭ.

— Mižnarodnaja izalacyja kramloŭskaha režymu, jakaja ŭzrastała z Brysbenskaha samitu G20, prarvanaja.

— Pucin znoŭ staŭ rukapaciskalnym udzielnikam mižnarodnych sustreč i ciapier sumiesna ź lidarami demakratyčnych dziaržaŭ moža padpisvać sumiesnyja dakumienty.

— Rasija nie pryznanaja bokam kanfliktu.

— Rasijskaja ahresija suprać Ukrainy nie pryznanaja.

— Znachodžańnie rasijskich vojskaŭ na terytoryi Ukrainy nie asudžanaje.

— Patrabavańnie vyvadu rasiejskich vojskaŭ z terytoryi Ukrainy adsutničaje.

— Mahčymyja pastaŭki abarončaj zbroi Ukrainie sarvanyja.

— Akupavany Krym u pryniatych dakumientach naohuł nie zhadany.

— Admienienaje mahčymaje ŭviadzieńnie novych ekanamičnych sankcyj suprać ahresara.

— Patrabavańni rasśledavańnia terarystyčnych aktaŭ (MN-17, Vałnavacha, Maryupal, inšyja) i pakarańnia terarystaŭ adsutničajuć.

— Terarystam i bandytam harantavanyja pamiłavańnie i amnistyja.

— Adsutničajuć jakija-niebudź harantyi praviadzieńnia na akupavanych terytoryjach svabodnych vybaraŭ u adpaviednaści z ukrainskim zakanadaŭstvam.

— Ukraina abaviazvajecca da kanca 2015 hoda pravieści kanstytucyjnuju reformu z faktyčnymi harantyjami zachavańnia terarystyčnaha režymu Łuhandonii.

— Ukraina abaviazvajecca pravieści kanstytucyjnuju reformu i abmiarkoŭvać pytańni praviadzieńnia miascovych vybaraŭ ź ciapierašnimi pradstaŭnikami terarystyčnaha režymu Łuhandonii.

— Ukraina abaviazvajecca harantavać paŭnamoctvy «deputataŭ miascovych savietaŭ i słužbovych asob, abranych na daterminovych vybarach», hetyja paŭnamoctvy nie mohuć być daterminova spynienyja.

— Ukraina abaviazvajecca pryznać siłavuju viertykal Łuhandonii — «orhany prakuratury i sudoŭ», «atrady narodnaj milicyi», stvoranyja terarystyčnym režymam Łuhandonii.

— Kantrol za mižnarodna pryznanaj ukrainska-rasijskaj miažoj u ciapierašni čas ukrainskamu boku nie pieradadzieny. Jaho pieradača adniesiena «da kanca 2015 hoda pry ŭmovie vykanańnia punkta 11 — u kansultacyjach i pa ŭzhadnieńni z pradstaŭnikami asobnych rajonaŭ Danieckaj i Łuhanskaj abłaściej u ramkach Trochbakovaj kantaktnaj hrupy», pry ŭmovie praviadzieńnia miascovych vybaraŭ i ažyćciaŭleńnia kanstytucyjnaj reformy va ŭsioj Ukrainie. Heta značyć — abo nikoli, abo pry pryznańni palityčnaha režymu Łuhandonii i źmienie kanstytucyjnaha ładu Ukrainy.

— Vyzvaleńnie N.Saŭčanki i inšych vajennapałonnych / zakładnikaŭ, jakija znachodziacca na terytoryi Rasii, nie praduhledžana.

— Harantavany praciah praniknieńnia na terytoryju Ukrainy rasiejskich «humkanvojaŭ».

— Abaviazacielstvy pa finansavańni piensij i inšych vypłat u Łuhandonii uskładzienyja na Ukrainu i zbolšaha na zachodnija krainy.

— Reanimavany antyŭkrainski Zakon Ukrainy «Ab časovym paradku miascovaha samakiravańnia ŭ asobnych rajonach Danieckaj i Łuhanskaj abłaściej».

— Ustanoŭlenyja abaviazacielstvy dla Viarchoŭnaj Rady Ukrainy dla vyznačeńnia «terytoryj, na jakija raspaŭsiudžvajecca admysłovy režym» (heta značyć, na terytoryju Łuhandonii).

— Ukraina harantuje vyklučeńnie Łuhandonii z ahulnanacyjanalnaha režymu ažyćciaŭleńnia źniešnieekanamičnych suviaziaŭ.

— Ukraina i Zachad harantujuć pačatak pieramovaŭ pamiž ES, Ukrainaj i Rasijaj pa praktyčnych pytańniach uviadzieńnia ŭ dziejańnie padpisanaha Ukrainaj Pahadnieńnia ab zonie svabodnaha handlu ź Jeŭrasajuzam (h.zn. faktyčna pieradajuć Pucinu kluč ad pracesu jeŭraintehracyi Ukrainy).

Jašče raz, hałoŭnaje:

— Rasija nie ŭziała na siabie nijakich abaviazacielstvaŭ.

Druhoje hałoŭnaje:

— Ukraina ŭziała na siabie vialikuju kolkaść abaviazacielstvaŭ, pierš za ŭsio pa pryznańni terarystyčnaha režymu Łuhandonii.

Treciaje hałoŭnaje:

— Usie abaviazacielstvy Ukrainy ciapier harantavanyja abaviazacielstvami lidaraŭ Hiermanii i Francyi.

Adziny prymalny adkaz patryjatyčnych sił Ukrainy ŭ dadzienaj situacyi — heta:

— Paśla ŭzajemnaha spynieńnia ahniu zajavić ab admovie Ukrainy vyrašać prablemu vyzvaleńnia Uschodniaha Danbasa vajennym šlacham;

— Nacelić VSU na abaronu novych linij raźmiežavańnia z akupavanymi terytoryjami Ukrainy (uklučajučy linii raźmiežavańnia pa Pierakopie i Čanhary), a taksama učastkaŭ mižnarodna pryznanaj ukrainska-rasijskaj miažy, jakija znachodziacca pad ukrainskim kantrolem;

— Vyjści z naviazanaj Ukrainie falšyvaj hulni ŭ «terytaryjalnuju cełasnaść», haračym prychilnikam jakoj raptam akazaŭsia Pucin;

— Nieadkładna pryznać Uschodni Danbas, taksama jak i Krym, časova akupavanaj terytoryjaj;

— Admovicca ad jakich-niebudź dziaržaŭnych abaviazacielstvaŭ pierad arhanizacyjami i ŭstanovami na akupavanych terytoryjach (Krym, Łuhandonija);

— Maksimalna sadziejničać evakuacyi na svabodnuju terytoryju Ukrainy ŭsich ukrainskich hramadzian, jakija žadajuć pakinuć akupavanyja terytoryi;

— Źviarnucca da suśvietnaj supolnaści i pierš za ŭsio da harantaŭ terytaryjalnaj cełasnaści Ukrainy pa Budapiešckim miemarandumie, vykarystoŭvać usie mahčymyja dypłamatyčnyja i inšyja nievajennyja srodki dla vyzvaleńnia ŭsich zachoplenych ukrainskich hramadzian, u tym liku jakija znachodziacca na terytoryi Rasii, i ŭsich akupavanych ukrainskich terytoryj.

Daviedačna:

Dekłaracyja Prezidenta Rasijskaj Fiederacyi, Prezidenta Ukrainy, Prezidenta Francuzskaj Respubliki i Kanclera Fiederatyŭnaj Respubliki Hiermanija ŭ padtrymku Kompleksu mier pa vykanańni Minskich pahadnieńniaŭ, pryniataha 12 lutaha 2015

12 lutaha 2015 hoda

Prezident Rasijskaj Fiederacyi Uładzimir Pucin, Prezident Ukrainy Piatro Parašenka, Prezident Francuzskaj Respubliki Fransua Ałand i Kancler Fiederatyŭnaj Respubliki Hiermanija Anhieła Mierkiel paćviardžajuć poŭnuju pavahu suvierenitetu i terytaryjalnaj cełasnaści Ukrainy. Jany ćviorda pierakananyja ŭ biezalternatyŭnaści vyklučna mirnaha ŭrehulavańnia. Jany całkam hatovyja raspačać lubyja mahčymyja miery jak paasobku, tak i sumiesna ŭ hetych metach.

U hetym kantekście lidary ŭchvalajuć Kompleks mier pa vykanańni Minskich pahadnieńniaŭ, pryniaty i padpisany ŭ Minsku 12 lutaha 2015 hoda usimi, chto taksama padpisaŭ Minski pratakoł ad 5 vieraśnia 2014 hoda i Minski miemarandum ad 19 vieraśnia 2014 hoda. Lidary buduć ŭnosić układ u hety praces i vykarystoŭvać svoj upłyŭ na adpaviednyja baki, kab spryjać vykanańniu hetaha Kompleksu mier.

Hiermanija i Francyja akažuć techničnuju padtrymku dla adnaŭleńnia siehmienta bankaŭskaj sistemy ŭ zakranutych kanfliktam rajonach, mahčyma, šlacham stvareńnia mižnarodnaha miechanizmu dla sadziejničańnia ažyćciaŭleńniu sacyjalnych vypłat.

Lidary padzialajuć pierakanańnie ŭ tym, što ŭmacavańnie supracoŭnictva pamiž Jeŭrapiejskim Sajuzam, Ukrainaj i Rasijaj budzie sadziejničać urehulavańniu dadzienaha kryzisu. U hetych metach jany padtrymlivajuć praciah trochbakovych pieramovaŭ pamiž Jeŭrapiejskim Sajuzam, Ukrainaj i Rasijaj pa pytańniach enierhietyki z tym, kab ažyćciavić kroki ŭ raźvićcio «zimovaha hazavaha pakieta».

Jany taksama padtrymlivajuć trochbakovyja pieramovy pamiž Jeŭrapiejskim Sajuzam, Ukrainaj i Rasijaj u metach vypracoŭki praktyčnaha vyrašeńnia pytańniaŭ, jakija vyklikajuć zaniepakojenaść Rasii, u suviazi z vykanańniem Pahadnieńnia ab hłybokaj i ŭsioabdymnaj zonie svabodnaha handlu pamiž Ukrainaj i Jeŭrapiejskim Sajuzam.

Lidary pa-raniejšamu addanyja idei stvareńnia ahulnaj humanitarnaj i ekanamičnaj prastory ad Atłantyki da Cichaha akijana na asnovie poŭnaha pavahi mižnarodnaha prava i pryncypaŭ ABSIE.

Lidary buduć i nadalej addanyja vykanańniu Minskich pahadnieńniaŭ. Z hetaj metaj jany damovilisia ab stvareńni kantrolnaha miechanizmu ŭ «narmandskim farmacie», jaki budzie pravodzić sustrečy z rehularnaj pieryjadyčnaściu, jak praviła, na ŭzroŭni starejšych słužbovych asob, jakija pradstaŭlajuć ministerstva zamiežnych spraŭ.

Kompleks mier pa vykanańni Minskich pahadnieńniaŭ

12 lutaha 2015 hoda

1. Nieadkładnaje i usioabdymnaje spynieńnie ahniu ŭ asobnych rajonach Danieckaj i Łuhanskaj abłaściej Ukrainy i jaho strohaje vykanańnie pačynajučy z 00 h. 00 chv. (kijeŭski čas) 15 lutaha 2015 hoda.

2. Advod ŭsich ciažkich uzbrajeńniaŭ abiedźviuma bakami na roŭnyja adlehłaści ŭ metach stvareńnia zony biaśpieki šyrynioj minimum 50 km adzin ad adnaho dla artyleryjskich sistem kalibram 100 mm i bolš, zony biaśpieki šyrynioj 70 km dla RSZA i šyrynioj 140 km dla RSZA «Tarnada-Z», «Urahan», «Śmierč» i taktyčnych rakietnych sistem «Kropka» («Kropka U»):

— Dla ŭkrainskich vojskaŭ: ad faktyčnaj linii sudakranańnia;

— Dla ŭzbrojenych farmiravańniaŭ asobnych rajonaŭ Danieckaj i Łuhanskaj abłaściej Ukrainy: ad linii sudakranańnia zhodna ź Minskim miemarandumam ad 19 vieraśnia 2014 hoda.

Advod vyšejpieraličanych ciažkich uzbrajeńniaŭ pavinien pačacca nie paźniej druhoha dnia paśla spynieńnia ahniu i zaviaršycca na praciahu 14 dzion.

Hetamu pracesu budzie sadziejničać ABSIE pry padtrymcy Trochbakovaj kantaktnaj hrupy.

3. Zabiaśpiečyć efiektyŭny manitorynh i vieryfikacyju režymu spynieńnia ahniu i advodu ciažkaha ŭzbrajeńnia z boku ABSIE ź pieršaha dnia advodu, z vykarystańniem usich nieabchodnych techničnych srodkaŭ, uklučajučy spadarožniki, BPŁA, radyjołakacyjnyja sistemy i inš.

4. U pieršy dzień paśla advodu pačać dyjałoh ab madalnaściach praviadzieńnia miascovych vybaraŭ u adpaviednaści z ukrainskim zakanadaŭstvam i Zakonam Ukrainy «Ab časovym paradku miascovaha samakiravańnia ŭ asobnych rajonach Danieckaj i Łuhanskaj abłaściej», a taksama pra budučy režym hetych rajonaŭ na padstavie nazvanaha zakona.

Nieadkładna, nie paźniej za 30 dzion z daty padpisańnia hetaha dakumienta, pryniać pastanovu Viarchoŭnaj Rady Ukrainy z ukazańniem terytoryi, na jakuju raspaŭsiudžvajecca admysłovy režym u adpaviednaści z Zakonam Ukrainy «Ab časovym paradku miascovaha samakiravańnia ŭ asobnych rajonach Danieckaj i Łuhanskaj abłaściej» na asnovie linii, ustalavanaj u Minskim miemarandumie ad 19 vieraśnia 2014 h.

5. Zabiaśpiečyć pamiłavańnie i amnistyju šlacham uviadzieńnia ŭ siłu zakona, jaki zabaraniaje pieraśled i pakarańnie asob u suviazi z padziejami, što mieli miesca ŭ asobnych rajonach Danieckaj i Łuhanskaj abłaściej Ukrainy.

6. Zabiaśpiečyć vyzvaleńnie i abmien usich zakładnikaŭ i asob, što niezakonna ŭtrymlivajucca, na asnovie pryncypu «usich na ŭsich». Hety praces pavinien być zavieršany najpaźniej na piaty dzień paśla advodu.

7. Zabiaśpiečyć biaśpiečny dostup, dastaŭku, zachoŭvańnie i raźmierkavańnie humanitarnaj dapamohi tym, chto hetaha patrabuje, na asnovie mižnarodnaha miechanizmu.

8. Vyznačeńnie madalnaściaŭ poŭnaha adnaŭleńnia sacyjalna-ekanamičnych suviaziaŭ, uklučajučy sacyjalnyja pieravody, takija jak vypłata piensij i inšyja vypłaty (pastupleńnia i dachody, svoječasovaja apłata ŭsich kamunalnych rachunkaŭ, adnaŭleńnie padatkaabkładańnia ŭ ramkach pravavoha pola Ukrainy).

U hetych metach Ukraina adnović kiravańnie siehmientam svajoj bankaŭskaj sistemy ŭ rajonach, zakranutych kanfliktam, i, mahčyma, budzie stvorany mižnarodny miechanizm dla palahčeńnia takich pieravodaŭ.

9. Adnaŭleńnie poŭnaha kantrolu nad dziaržaŭnaj miažoj z boku ŭrada Ukrainy va ŭsioj zonie kanfliktu, jakoje pavinna pačacca ŭ pieršy dzień paśla miascovych vybaraŭ i zaviaršycca paśla ŭsioabdymnaha palityčnaha ŭrehulavańnia (miascovyja vybary ŭ asobnych rajonach Danieckaj i Łuhanskaj abłaściej na padstavie Zakona Ukrainy i kanstytucyjnaja reforma) da kanca 2015 hoda pry ŭmovie vykanańnia punkta 11 — u kansultacyjach i pa ŭzhadnieńni z pradstaŭnikami asobnych rajonaŭ Danieckaj i Łuhanskaj abłaściej u ramkach Trochbakovaj kantaktnaj hrupy.

10. Vyvad usich zamiežnych uzbrojenych farmiravańniaŭ, vajennaj techniki, a taksama najmitaŭ z terytoryi Ukrainy pad nahladam ABSIE. Razzbrajeńnie ŭsich niezakonnych hrup.

11. Praviadzieńnie kanstytucyjnaj reformy ŭ Ukrainie z ustupleńniem u siłu da kanca 2015 hoda novaj kanstytucyi, jakaja praduhledžvaje ŭ jakaści klučavoha elemienta decentralizacyju (z ulikam asablivaściaŭ asobnych rajonaŭ Danieckaj i Łuhanskaj abłaściej, uzhodnienych z pradstaŭnikami hetych rajonaŭ), a taksama pryniaćcie pastajannaha zakanadaŭstva ab asablivym statusie asobnych rajonaŭ Danieckaj i Łuhanskaj abłaściej u adpaviednaści ź mierami, nazvanymi ŭ zaŭvazie, da kanca 2015 hoda. (hł. Zaŭvahu.)

12. Na padstavie Zakona Ukrainy «Ab časovym paradku miascovaha samakiravańnia ŭ asobnych rajonach Danieckaj i Łuhanskaj abłaściej» pytańni, jakija tyčacca miascovych vybaraŭ, buduć abmiarkoŭvacca i ŭzhadniacca z pradstaŭnikami asobnych rajonaŭ Danieckaj i Łuhanskaj abłaściej u ramkach Trochbakovaj kantaktnaj hrupy. Vybary buduć praviedzienyja z zachavańniem adpaviednych standartaŭ ABSIE pry manitorynhu z boku BDIPČ ABSIE.

13. Intensifikavać dziejnaść Trochbakovaj kantaktnaj hrupy, u tym liku šlacham stvareńnia rabočych hrup pa vykanańni adpaviednych aśpiektaŭ Minskich pahadnieńniaŭ. Jany buduć adlustroŭvać skład Trochbakovaj kantaktnyja hrupy.

Zaŭvaha:

Takija miery ŭ adpaviednaści z Zakonam «Ab admysłovym paradku miascovaha samakiravańnia ŭ asobnych rajonach Danieckaj i Łuhanskaj abłaściej» uklučajuć nastupnaje:

— Vyzvaleńnie ad pakarańnia, pieraśledu i dyskryminacyi asob, źviazanych z padziejami, što mieli miesca ŭ asobnych rajonach Danieckaj i Łuhanskaj abłaściej;

— Prava na moŭnaje samavyznačeńnie;

— Udzieł orhanaŭ miascovaha samakiravańnia ŭ pryznačeńni kiraŭnikoŭ orhanaŭ prakuratury i sudoŭ u asobnych rajonach Danieckaj i Łuhanskaj abłaściej;

— Mahčymaść dla centralnych orhanaŭ vykanaŭčaj ułady zaklučać z adpaviednymi orhanami miascovaha samakiravańnia pahadnieńnia adnosna ekanamičnaha, sacyjalnaha i kulturnaha raźvićcia asobnych rajonaŭ Danieckaj i Łuhanskaj abłaściej;

— Dziaržava akazvaje padtrymku sacyjalna-ekanamičnamu raźvićciu asobnych rajonaŭ Danieckaj i Łuhanskaj abłaściej;

— Sadziejničańnie z boku centralnych orhanaŭ ułady transhraničnamu supracoŭnictvu ŭ asobnych rajonach Danieckaj i Łuhanskaj abłaściej z rehijonami Rasijskaj Fiederacyi;

— Stvareńnie atradaŭ narodnaj milicyi pa rašeńni miascovych savietaŭ z metaj padtrymańnia hramadskaha paradku ŭ asobnych rajonach Danieckaj i Łuhanskaj abłaściej;

— Paŭnamoctvy deputataŭ miascovych savietaŭ i słužbovych asob, abranych na daterminovych vybarach, pryznačanych Viarchoŭnaj Radaj Ukrainy hetym zakonam, nie mohuć być daterminova spynienyja.

• 0
• 0
• 0
• 0
• 0
• 0
• 0
• 0