Biełarusy viarnulisia z Katyni: supravadžała milicyja, u Smalensk nie puścili
Biełaruskija aktyvisty naviedali Katyń i viarnulisia da biełaruska-rasijskaj miažy, paviedamlaje pres-słužba arhkamiteta pa stvareńni partyi «Biełaruskaja chryścijanskaja demakratyja».
Usiu darohu aktyvistaŭ supravadžała milicejskaja mašyna z uklučanaj mihałkaj. Zajazdžać u Smalensk im było zabaroniena. U Katyni aktyvistaŭ pastajanna zdymali na videa. Pa pryjeździe da miažy jany źbiralisia pajechać u Rudniu, dzie ŭtrymlivajucca Volha Zavadskaja i jašče adzin člen kamandy, adnak heta akazałasia zabaroniena.
Nahadajem, 23 žniŭnia na miažy z Rasijaj pad Smalenskam byŭ zatrymany aŭtobus z pradstaŭnikami roznych biełaruskich ruchaŭ i partyj, jakija jechali ŭ Katyń ušanavać pamiać zahinuŭšych. 23 žniŭnia - Dzień pamiaci achviaraŭ stalinizmu i nacyzmu.
Hrupa vyjechała ranicaj i była spynienaja ŭ 12.30. Pradstaŭnik rasijskaj pahransłužby zapatrabavaŭ ad usich zdać pašparty, ale hramadzianie Biełarusi admovilisia zdavać dakumienty. Pamiežnik pierapisaŭ źviestki.
Kala 15.00 aŭtobus praciahvaŭ zastavacca na miažy. Byli zatrymanyja dva čałavieki - Volha Zavadskaja, maci źnikłaha žurnalista Dźmitryja Zavadskaha, i jašče adzin aktyvist. Ich pavieźli dla vyśviatleńnia asoby. Aktyvista «BCHD» Jaŭhiena Baturu prymusili źniać majku z nadpisam «Stop - Pucin».
Aŭtobus pratrymali na miažy niekalki hadzin i adpuścili tolki za 20 chvilin da zakryćcia miemaryjalnaha kompleksu «Katyń», u jaki nakiroŭvalisia aktyvisty. Niahledziačy na poźni čas, aŭtobus nakiravaŭsia pa raniejšamu maršrucie. Jaho supravadžała mašyna rasijskaj darožna-patrulnaj słužby.
Biełaruskija hramadskija aktyvisty płanavali ŭskłaści kvietki da miemaryjała achviaram trahiedyi 1940, a taksama na miescy hibieli uradavaj delehacyi Polščy ŭ 2010 hodzie.
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary