Pavieł Sieviaryniec u Biełastoku: Hady źniavoleńnia stali dla mianie pracaj nad pamyłkami

Sieviaryniec vystupiŭ u Biełastoku — centry Padlašša, rehijona Polščy, dzie advieku žyvuć i biełarusy.

Nahodaj dla sustrečy stała prezientacyja knihi «Biełaruskaja hłybinia», składzienaj z ese, jakija Pavieł Sieviaryniec pisaŭ u «Našaj Nivie» ŭ časie adbyćcia trochhadovaha pakarańnia za padziei Płoščy-2010. Adnak bolšaja častka sustrečy z sustaršyniom arhkamiteta pa stvareńni partyi BCHD pryśviečana była aktualijam.

«Uvieś rehijon ad Bałtyki da Čornaha mora pryjšoŭ u ruch, – skazaŭ Sieviaryniec. — u ruch histaryčny, hieapalityčny. I ŭ hetym ruchu adno z pytańniaŭ – jaki dalejšy šlach abiare biełaruski narod. Stanovišča Biełarusi na hetym ukrainskim razłomie vyznačajecca tym, što šmat rasiejskaj prapahandy, ludzi hladziać rasiejskija telekanały, i ŭ vielmi značnaj stupieni stan demakratyčnych sił u Biełarusi pahoršaŭ, bo ciapier lubaja aktyŭnaść, luby zaklik da pieramienaŭ usprymajecca jak skažony praz rasiejskija telekanały zaklik da hvałtu, da kryvi.

Z druhoha boku, navat Łukašenka zrazumieŭ, što žarciki skončylisia, što nastupnaj moža być Biełaruś. Možna kazać pra tyja znaki ci sihnały, što sam Łukašenka ci niekatoryja hubiernatary pačynajuć razmaŭlać krychu pa-biełarusku. Ale možna kazać i pra toje, što sutnaść režymu nie źmianiłasia, nijakich źmienaŭ unutry režymu, jakich-niebudź zruchaŭ u bok Jeŭropy, u kirunku adździaleńnia ad Rasiei pakul nie bačna. Jak nie bačna i pavarotu da demakratyi.

U takim stanie my padychodzim da 2015 hoda, jaki ŭ Biełarusi jość hodam prezidenckich vybaraŭ, niachaj tak nazaviom jaho. Łukašenka kaža, što heta vybary, my razumiejem, što nijakich vybaraŭ u Biełarusi niama. Jość tolki palityčnaja kampanija, jakaja paklikana čarhovy raz paćvierdzić, što sfalsifikavany 80 ci 90% hałasoŭ, jakija nibyta padtrymali Łukašenku i jahony režym.

Adziny lidar biełaruskich demakratyčnych siłaŭ. Pierad kožnaj tak zvanaj prezidenckaj kampanijaj hetaje pytańnie ŭzdymajecca. U 2001 i 2006 hodzie demakratyčnym siłam udavałasia vyłučyć adzinaha. U 2010 hetaha nie było. Paśla 2010-ha bolšaja častka palityčnych lidaraŭ, jakija ŭdzielničali jak kandydaty ŭ prezidenty, apynulisia ŭ turmie.

Dla mianie hady źniavoleńnia byli svojeasablivaj pracaj nad pamyłkami. Ja vynies z hetaha ideju pra toje, što ŭ Biełarusi musić być adziny lidar ad apazicyi, jaki musić nieści adkaznaść i kazać adnym hołasam. Tamu hetaja zadača stała pierad kiraŭnikami demakratyčnych sił, siarod jakich na siońnia Biełaruski Narodny Front, Ruch «Za svabodu», Abjadnanaja hramadzianskaja partyja, «Spraviadlivy śviet», «Havary praŭdu!», sacyjał-demakraty i, kaniečnie ž, Biełaruskaja chryścijanskaja demakratyja, što biaruć udzieł u kansultacyjach.

Na dadzieny momant u nas jość 5-staronkavy ŭzhodnieny dakumient pracedury Kanhresa demakratyčnych sił, jakim moža być abrany hety lidar. Jość 2 niaŭzhodnienyja abzacy, pa jakich my nie možam pryjści da supolnaha rašeńnia. Ale spadziajusia, što napačatku vosieni my vyznačymsia z kandydatam, stratehijaj ci chacia b praceduraj abrańnia hetaha adzinaha kandydata.

My vierym u toje, što Biełaruś rana ci pozna, ale pryjdzie da sistemy, charakternaj dla śpiełych demakratyjaŭ. Heta kali jość dźvie mocnyja partyi. Adna ź ich, skažam, pravacentrysckaja, bolš prajeŭrapiejskaja chryścijanskaja demakratyja, a druhaja – sacyjalistyčnaja ci sacyjał-demakratyčnaja, bližejšaja pa aryjentacyi da Rasiei, jak heta, u pryncypie, i jość u rehijonie. Nu, i my jak Biełaruskaja chryścijanskaja demakratyja pracujem užo ciapier nad hetym, kab takaja płatforma ŭžo była padrychtavana dla Biełarusi», — raskazaŭ Sieviaryniec.

• 0
• 0
• 0
• 0
• 0
• 0
• 0
• 0