Paśla praciahłaj chvaroby ad raka pamior hienierał, były prezident Polščy Vojciech Jaruzelski. Pra heta ahienctvu RAR paviedamiŭ były prezident Alaksandr Kvaśnieŭski.
Jaruzelskamu było 90 hadoŭ. Niadaŭna jon pieranios insult. A apošnija dni znachodziŭsia ŭ vajskovym špitali ŭ Varšavie.
Hienierał byŭ rodam ź vioski Kuruŭ Lublinskaha vajavodstva. Jaho siamja žyła ŭ Litvie, a paśla dałučeńnia bałtyjskaj krainy da SSSR, siamja była represavanaj i adpraŭlenaja ŭ łahiery Krasnajarskaha kraja. U vysyłcy pamior baćka Vojciecha.
U 1943-m Vojciech Jaruzelski zapisaŭsia ŭ 1-ju polskuju piachotnuju dyviziju imia Tadevuša Kaściuški. Prymaŭ udzieł u vajennych apieracyjach na Viśle, pry vyzvaleńni Varšavy. Paśla vajny jon praciahnuŭ rabić sabie vajskovuju karjeru, dasłužyŭšysia da hienierała.
Byŭ ministram abarony Polščy (1969 – 1983). U vieraśni 1981-ha mienavita Jaruzelski ŭvodziŭ vajskovaje stanovišča ŭ Polščy, adbylisia zatrymańni lidaraŭ «Salidarnaści». U toj ža čas vystupaŭ suprać uviadzieńnia ŭ Polšču savieckich vojskaŭ.
Potym staŭ Pieršym sakratarom polskaj kampartyi – Abjadnananaj rabočaj partyi (1981-1989), apošnim prezidentam kamunistyčnaj Polščy (1989-1990).
U Jaruzelskaha była limfoma, uračy pravodzili kurs chimijaterapii. Padčas adnaho z znachodžańniaŭ hienierała ŭ balnicy jaho naviedaŭ Lech Valensa, lidar «Salidarnaści». Jaruzelski zaŭsiody chadziŭ u ciomnych akularach.
Jaruzelski byŭ apošnim žyvym kiraŭnikom sacyjalistyčnych krain Uschodniaj Jeŭropy.
Kamientary