Spajs dabraŭsia da dziaciej: 13-hadovy školnik trapiŭ u reanimacyju
Vypadak adbyŭsia ŭ Maładziečnie.
U škole, dzie vučyŭsia 13-hadovy chłopčyk, paśla hetaha zdareńnia dzieciam pierastali dazvalać vychodzić u čas urokaŭ, paviedamiŭ «Rehijanalnaj haziecie» adzin z vučniaŭ.
Tydzień tamu ŭ reanimacyju dziciačaj balnicy z padazreńniem na atručvańnie narkotykam pastupiŭ 13-hadovy padletak.
Paśla škoły jon razam ź siabram nakiroŭvaŭsia dadomu. Pa darozie jany spynilisia, chłopčyk spažyŭ sumieś i… straciŭ prytomnaść.
Jaho siabar, pierapałochaŭšysia nie na žart, vyklikaŭ «chutkuju» i paklikaŭ na dapamohu nastaŭnikaŭ, raspaviali ŭ RAUS.
Chłopčyka dastavili ŭ reanimacyjnaje adździaleńnie dziciačaj balnicy. Miedyki praviali ŭsie nieabchodnyja analizy, ale vyśvietlić skład rečyva, jakim atruciŭsia školnik, tak i nie ŭdałosia.
Padletak sutki pralažaŭ u reanimacyi, zatym jaho pieraviali ŭ piedyjatryčnaje adździaleńnie i chutka adpuścili dadomu.
Zahadčyk dziciačaj balnicy Siarhiej Ryłaŭ adznačaje, što sioleta heta pieršy vypadak na Maładziečanščynie. Raniej takoje zdarałasia, ale, jak i ciapier, paćvierdzić, što heta było mienavita narkatyčnaje atručvańnie, nie zmahli. Skład rečyva zastavaŭsia nieviadomym, dahetul jaho nie sustrakali.
Navat paśla pieršaha ŭžyvańnia spajsu čałaviek varjacieje i ŭ niekatorych vypadkach nie prychodzić u normu navat paśla miesiaca stacyjanarnaha lačeńnia, papiaredžvaje hałoŭny pazaštatny psichijatr-narkołah Maładziečanskaha rajona Alaksandr Bažko.
Narkotykami truciacca štomiesiac
Z takim vypadkam načalnik adździaleńnia pa narkakantrolu i supraćdziejańniu handlu ludźmi Dźmitry Suchocki sustrakajecca ŭpieršyniu.
U takim małym uzroście narkatyčnaha atručvańnia raniej nie zdarałasia. I choć dakładna vyznačyć rečyva nie atrymałasia, ekśpierty miarkujuć, što heta spajs.
«Pieravažna narkotyki ŭžyvaje moładź 16-19 hadoŭ, — udakładniaje Dźmitry Suchocki. — Amal kožny miesiac z takimi atručvańniami adzin-dva maładyja čałavieki traplajuć u reanimacyju. A naprykancy minułaha hoda byŭ i śmiarotny vypadak».
Letaś 22 śniežnia student-pieršakurśnik Biełaruskaha nacyjanalnaha techničnaha ŭniviersiteta z Maładziečna pamior u internacie ad pieradaziroŭki.
«Užyŭšy narkotyk, — praciahvaje Dźmitry Suchocki, — čałaviek prosta pierastaje štości razumieć. Jon pavodzić siabie jak zombi, navat moža vyjści ŭ adčynienaje akno».
Surazmoŭca taksama zaŭvažyŭ: tyja, chto atruciŭsia narkotykam, viedali, što ŭžyvajuć. Pra nastupstvy ŭžyvańnia spajsaŭ im raskazvali va ŭstanovach, dzie jany vučacca. Na pytańnie, čamu ž vy ŭžyvali ich, adkazvali adnolkava: «Chacieŭ pasprabavać».
Kamientary