Zajava Rady BNR nakont apošnich padziej va Ukrainie

Zajava Rady BNR z nahody niebiaśpieki ŭzbrojenaha kanfliktu na terytoryi Ŭkrainy

3 sakavika 2014 h.

Rada Biełaruskaj Narodnaj Respubliki,

Zvažajučy na raźvićcio palityčna-vajennaj situacyi ŭ adnosinach Rasiei i Ukrainy, ź jakimi maje supolnyja miežy Biełaruś;

· Bieručy pad uvahu dźvubakovyja i šmatbakovyja mižnarodna-damoŭnyja abaviazki Biełarusi, a taksama abaviazki, pryniatyja ad imia Biełarusi ŭładami pad kiraŭnictvam A. Łukašenki;

· Z uvahi na najvyšejšyja intaresy Biełarusi ŭ zachavańni svajoj nacyjanalnaj biaśpieki, u tym liku adnaŭleńnie ŭ svaim rehijonie stanovišča, jakoje vyklučaje paŭstańnie vajny;

· Vitajučy postup ukrainskaha narodu da demakratyi, asacyjacyi z demakratyčnaj supolnaściu eŭrapiejskich nacyjaŭ, i ŭ pazbaŭleńni ukrainskim hramadztvam ad nastupstvaŭ savieckaha panavańnia i ŭ supraćstajańni post-savieckaj karupcyi;

· Na ŭniosak Sakrataryjatu Vonkavych Spraŭ i Sakrataryjatu dla spravaŭ Abarony:

1) Vitaje i całkam padtrymlivaje zachady Ukrainy pa zachavańni terytaryjalnaj cełaści i suverenitetu pierad abliččam zbrojnaj ahresii.

2) Śćviardžaje, što, pravodziačy palityku zbrojnych avanturaŭ, kiraŭnictva Rasiejskaj Federacyi zaśviedčyła, što Rasiejskaja Federacyja pry jaje sučasnaj palityčnaj rečaisnaści nia zdolnaja być partneram u abarončym sajuzie, jaki spryjaŭ by nacyjanalnaj biaśpiecy Biełarusi. Z uvahi na heta i dziela vykanańnia Art. 18 Kanstytucyi RB, uvažaje nieabchodnym nieadkaładna prypynić dziejańnie i vyjści z usich uhodaŭ z Rasiejaj u vajenna-palityčnaj halinie.

3) Vyražaje zakłapočanaść z humanitarnych nastupstvaŭ zbrojnych avanturaŭ Kramla dla naroda Rasiejskaj Federacyi.

4) Zaklikaje ŭrady krain-padpisantaŭ Budapeštckaha memarandumu 1994 h. zabiaśpiečyć vykanańnie zapeŭnieńniaŭ biaśpieki, dadzienych Ukrainie, a taksama zaklikaje ŭrady ŭsich krainaŭ-padpisantaŭ inšych datyčnych dvuchbakovych i šmatbakovych damovaŭ, Arhanizacyju Abjadnanych Nacyjaŭ i ŭsie datyčnyja mižnarodnyja arhanizacyi, vykanać svaje abaviazki, što nieabchodna dla zachavańnia ad razbureńnia samoj systemy mižnarodnaha prava, utvoranaj paśla 1945 h.

5) Vykazvaje zaściarohi adnosna statusu i dastatkovaści Budapešckaha memarandumu 1994 h. ab harantyjach biaśpieki dla Biełarusi. Zaklikaje ŭsie biełaruskija palityčnyja siły na Baćkaŭščynie i ŭ zamiežžy dałučycca i zasiarodzić pracu na metach Memarandumu narady staršyniaŭ i kiraŭnikoŭ biełaruskich palityčnych i hramadzkich arhanizacyjaŭ sa Staršynioj Rady Biełaruskaj Narodnaj Respubliki «Ab zachadach dla zabieśpiačeńnia niezaležnaści Biełarusi» ŭ Vilni 3 listapada 2012 h.

6) Źviartaje ŭvahu na niebiaśpieku dla nacyjanalnych intaresaŭ Biełarusi pałažeńniaŭ ab režymie źniešnich miežaŭ Eŭrazijskaha mytnaha sajuzu, jakija mohuć być užyty Rasiejaj u jakaści instrumenta ekanamičnaha abo vajenna-palityčnaha cisku ŭ kanflikcie z trecimi bakami nasupierak ułasnym intaresam Biełarusi.

7) Zajaŭlaje pra nieabchodnaść raśśledvańnia i pryciahnieńnia da adkaznaści słužbovych asobaŭ, niezaležna ad dziaržaŭnaj prynaležnaści, za mižnarodnyja złačynstvy suprać miru i padrychtoŭku ci zamach na ździajśnieńnie hetkich. Vyražaje zakłapočanaść časam i źmiestam niadaŭniaha terminovaha razhlału ŭładami načale z A. Łukašenkam novaj redakcyi zakonu ab vajskovym stanoviščy.

8) Śćviardžaje, što nadańnie prytułku abo hramadzianstva asobam, jakija znachodziacca ŭ vyšuku Ukrainaj za złačynnyja dziejańni padčas pratestaŭ 2013-2014 hh., nie pavinna zachoŭvać jurydyčnaj mocy i takija asoby pavinny padlahać ekstradycyi novymi ŭładami Biełarusi pa sproščanaj pracedury.

9) Asabliva zaścierahaje panoŭnyja ŭ Biełarusi ŭłady ad luboha naŭprostaha ci ŭskosnaha ŭdziełu u rasiejskaj zbrojnaj avantury suprać Ukrainy, u tym liku praz dapuščeńnie vykarystańnia Rasiejaj biełaruskaj pavietranaj prastory. Słužbovyja asoby, jakija by sankcyjanavali rašeńni ab advarotnym, pavinny buduć być pryciahnuty da adkaznaści za saŭdzieł u mižnarodnych złačynstvach: złačynstvach suprać miru, a taksama lubych vajennych złačynstvach, jakija ŭ vyniku imavierna mohuć być ździejśnieny rasiejskim bokam. Takija słužbovyja asoby buduć taksama nieści asabistuju kryminalnuju i hramadzianskuju adkaznaść za nastupstvy dla jurydyčnych i fizyčnych asob u Biełarusi ŭ vyniku luboha ŭdziełu Biełarusi ŭ vajennaj avantury Rasiei.

Rada BNR budzie vitać adpaviednyja dziejsnyja miery mižnarodnaj supolnaści pa zabieśpiačeńni terytaryjalnaje cełaści i suverenitetu Ukrainy.

Rada ŭvažaje, što biełarusy, jakija vyrašyli by asabista zrabić luby ŭniosak u humanitarnuju dapamohu ŭsim paciarpiełym va Ŭkrainie, a taksama luby ŭniosak u padtrymku vysiłkaŭ ukrainskaj dziaržavy pa zachavańni suvereniteta i adbićciu ahresii, buduć dziejničać taksama i nakaryść doŭhaterminovych intaresaŭ nacyjanalnaj biaśpieki Biełarusi.

• 0
• 0
• 0
• 0
• 0
• 0
• 0
• 0