Mitrapalit Pavieł u pieršym intervju: Našto vy naviazvajecie demakratyju?

Mitrapalit Pavieł, jakoha Śviaty Sinod Ruskaj Pravasłaŭnaj Carkvy pryznačyŭ mitrapalitam Minskim, daŭ svajo pieršaje intervju — uradavamu telekanału STV. «Mianie raduje, što Alaksandr Ryhoravič vydatna viedaje situacyju ŭ krainie, viedaje značeńnie carkvy i viery dla ludziej, — skazaŭ mitrapalit.

— Pry takim dobrym staŭleńni, viadoma, dumaju, budziem zajmacca surabotnictvom [pravasłaŭny vyraz, jaki aznačaje supracoŭnictva, sinierhiju — NN]: kožny budzie vykonvać svaju spravu, nieści svaju misiju. Ja bačyŭ vielizarnuju roźnicu, što jość u Biełarusi i tut u nas [u Rasii — NN]», — zajaviŭ mitrapalit Pavieł.

«U Minsku možna ŭ luby čas, i dniom, i nočču, vyjści, vy možacie chadzić biez achovy, na vas nichto nie napadzie, nie abrabuje. Ludzi ŭžo ŭbačyli pieramieny da lepšaha, i ja dumaju, što ludzi zrazumiejuć, chto ich kiraŭnik.

Ni ŭ koha, moža być, navat nie ŭźniknie dumki źmianić kirunak, pa jakim siońnia idzie biełaruski narod i Biełaruś u cełym.

Ja budu rabić usio mahčymaje, kab mir i błasłavieńnie pierabyvali na błasłavionaj biełaruskaj ziamli», — zajaviŭ mitrapalit Pavieł.

Adkazvajučy na pytańnie pra svajo staŭleńnie da zachodnich kaštoŭnaściaŭ, jon skazaŭ: «Kali heta demakratyja — zachodniaje dabro, našto vy tak naviazvajecie jaho roznymi šlachami i padkuplajecie? I Bałotnaja. A ciapier na Chryščaciku što dziejecca…

Kali zachodnija kaštoŭnaści nastolki dobryja dla ludziej, navošta vy ich naviazvajecie? Prapanujcie, i ludzi sami da vas pojduć. A pahladzicie na Juhasłaviju, na Liviju, Jehipiet… Kali heta dabro, pahladzicie, jak hetaje dobra chutka zakančvajecca».

«Tak što ja nie suprać zachodnich kaštoŭnaściaŭ maralnych ci duchoŭnych, ale nie treba nas zahaniać, — padsumavaŭ jon. — Pakul ža ruch na Zachad dla mitrapalita Minskaha i Słuckaha Paŭła abmiažujecca miežami Biełaruskaha ekzarchata Ruskaj pravasłaŭnaj carkvy», — pažartavaŭ jon.

Jon taksama zajaviŭ, što čytaŭ adzin artykuł u biełaruskich ŚMI z reakcyjaj na svajo pryznačeńnie. «Mnie pakazali artykuł, tam skazana, što da nas jedzie kansiervatar, jaki nienavidzić ateistaŭ, kamunistaŭ, hiejaŭ i Zachad. Vy viedajecie, heta niapravilna skazana. Ja nie mahu nienavidzieć abo pahardžać ludźmi, ja pavinien usich lubić. Ale jak pravasłaŭny śviatar ja pavinien skazać: siabry maje, ja vas nie asudžaju, ale škaduju, spačuvaju, što vy staicie na šlachu zhubnym», — adznačyŭ mitrapalit.

Jak viadoma, u rasijskaj i biełaruskaj aficyjnaj prapahandzie ŭziaty kurs na atajesamleńnie Zachadu z hiej-svabodami, i mitrapalit tut idzie ŭ tym samym rečyščy.

Mitr. Pavieł maje reputacyju kansiervatara i ruskaha nacyjanalista. Siard inšaha, jon zajaŭlaŭ, što Rasija moža «adkryć čarnobylski kranik», užyć jadziernuju i bakteryjałahičnuju zbroju ŭ vypadku pahrozaŭ sabie.

Pryznačeńnie mitrapalitam Minska ŭładyki, jaki nie biełarus i nikoli nie pracavaŭ u Biełarusi, vyklikała nieŭrazumieńnie i horyč ŭ biełaruskim pravasłaŭi. Tut spadziavalisia, što novy ŭładyka budzie čałaviekam ź Biełarusi. Adnak pry mitrapalitu Fiłaretu na pačatku 90-ch BPC, u adroźnieńnie ad Ukrainskaj pravasłaŭnaj carkvy Maskoŭskaha patryjarchata, nie dabivałasia prava samoj vybirać svajho pradstajaciela.

Zrešty, UPC toje prava zdabyła tamu, što źjaviłasia Ukrainskaja pravasłaŭnaja carkvy na čale z patryjarcham Kijeŭskim, i Maskva musiła prademanstravać, što jana nie abmiažoŭvaje pravoŭ ukrainskaha pravasłaŭja. Varta adznačyć, što i patryjarch Kijeŭski Fiłaret, i mitrapalit Kijeŭski i ŭsiaje Ukrainy Uładzimir, ačolnik UPC Maskoŭskaha patryjarchata — ukraincy, a mitr. Minski Fiłaret, jak i mitr. Pavieł — naradzilisia ŭ Rasii.

• 0
• 0
• 0
• 0
• 0
• 0
• 0
• 0