Miaśnikovič: Pakazčyki pa pavieličeńni abjomaŭ vytvorčaści, razhruzcy składoŭ nie vykonvajucca

Pakazčyki pa pavieličeńni abjomaŭ vytvorčaści, a taksama skaračeńni zapasaŭ hatovaj pradukcyi ŭ krainie, na žal, nie vykonvajucca,

zajaviŭ 10 vieraśnia na pasiadžeńni prezidyuma Savieta ministraŭ prem'jer-ministr Biełarusi Michaił Miaśnikovič.

Jak paviedamlaje pres-słužba prezidenta, u hetaj suviazi premjer «daručyć vypracavać adpaviednyja rašeńni» i zaklikaŭ staršyniaŭ abłvykankamaŭ uziać aktyŭny ŭdzieł u kalektyŭnaj vypracoŭcy adpaviednych rašeńniaŭ pa vypraŭleńni situacyi.

Daručeńniu premjera papiaredničała spravazdača ministra pramysłovaści Dźmitryja Kaciaryniča, jaki paviedamiŭ, što, pačynajučy z druhoha kvartała hetaha hoda, pradpryjemstvam Minprama ŭ asnoŭnym udałosia spynić rost składskich zapasaŭ. «Z maja hetaha hoda namieciłasia stabilnaja tendencyja pa ich źnižeńni.

Pa vynikach hoda čakajecca źnižeńnie amal na 40% ad krasavickaha značeńnia.

Pry hetym suadnosiny zapasaŭ da siaredniamiesiačnaha abjomu vytvorčaści składuć 111,8%», — skazaŭ jon. Taksama, pavodle słoŭ ministra, pradpryjemstvam udałosia pavialičyć ekspartnyja pastaŭki i hetaja dynamika budzie zachavanaja da kanca hoda.

Što ž da nievykanańnia prahnoznych pakazčykaŭ, to heta źviazana z pracaj vałaŭtvaralnych pradpryjemstvaŭ — aŭta- i sielhasmašynabudavańnia, mietałurhii, padkreśliŭ Kaciarynič. Tak, najbujniejšyja vytvorcy pramysłovaj pradukcyi sistemy Minprama zmohuć zabiaśpiečyć pa vynikach hoda nastupnyja tempy rostu pradukcyi pramysłovaści: chołdynh BMK — 90%, chołdynh BiełAŭtaMAZ — 100%, MTZ — 97,1%, BiełAZ — 92,1%.

Siarod asnoŭnych prablem pa naroščvańni abjomaŭ vytvorčaści, ekspartu i skaračeńnia składskich zapasaŭ dla pradpryjemstvaŭ Minprama kiraŭnik viedamstva vydzieliŭ taksama

skaračeńnie pakupnickaha popytu, praciah źnižeńnia cen na suśvietnym rynku na syravinnyja resursy, što paŭpłyvała na pamianšeńnie abjomu vyručki viadučych hornazdabyŭnych kampanij i, adpaviedna, pryviało da skaračeńnia zakupak karjernych samazvałaŭ. «Akramia taho, spad dziełavoj aktyŭnaści na mižnarodnych rynkach mietałapradukcyi ŭ 2013 hodzie pryvioŭ da źnižeńnia cen na mietałapradukcyju BMK na asnoŭnych rynkach zbytu SND i dalokaha zamiežža. Uviadzieńnie z 1 studzienia 2013 hoda ŭ RF novych ekałahičnych norm Jeŭra-4 na hruzavuju techniku, źnižeńnie ŭzroŭniu mytnych barjeraŭ u suviazi z uvachodžańniem Rasii ŭ SHA pryviali da ŭzmacnieńnia kankurencyi i padzieńnia prodažu na tradycyjnych rynkach Rasijskaj Fiederacyi», — dadaŭ ministr.

Pavodle jaho słoŭ, Ministerstva pramysłovaści pravodzić palityku, nakiravanuju na pavieličeńnie pastavak pradukcyi na rynki krain Amieryki, Afryki, Paŭdniova-Uschodniaj Azii, u tym liku i z prymianieńniem finansavych miechanizmaŭ padtrymki ekspartu. U vyniku za 7 miesiacaŭ hetaha hoda na rynkach krain Afryki i Amieryki dasiahnuty rost ekspartu ŭ 111,9% i 145,3% adpaviedna. Taksama pradpryjemstvami Minprama praciahvajecca praca pa adkryćci zamiežnych pradstaŭnictvaŭ.

Kaciarynič adznačyŭ, što va ŭmovach ściskańnia tradycyjnych dla pradpryjemstvaŭ Minprama rynkaŭ ES i Rasijskaj Fiederacyi asnoŭnaj zadačaj źjaŭlajecca pieraaryjentacyja pastavak na novyja rynki zbytu i zachoŭvańnie maksimalna mahčymych dolej abjomaŭ ekspartu na tradycyjnych rynkach zbytu.

Zasłuchaŭšy dakład ministra, prem'jer-ministr akcentavaŭ uvahu na vytvorčaści pradukcyi z vysokim dadadzienym koštam. «Dla nas, jak dla krainy, jakaja nie maje materyjalna-minieralnaj syravinnaj bazy, biezumoŭna, heta źjaŭlajecca vielmi aktualnym. Zamiest taho kab pieramołvać čužyja resursy, my pavinny pracavać nad stvareńniem maksimalna vialikich abjomaŭ vałavoha dadadzienaha koštu. Pry hetym siońnia apracoŭčaja pramysłovaść maje samuju nizkuju ŭdzielnuju vahu vałavoha dadadzienaha koštu ŭ vypusku — 26,8%. U nas pa krainie niama nivodnaha inšaha vidu dziejnaści, jaki mieŭ by takuju nizkuju ŭdzielnuju vahu», — adznačyŭ Miaśnikovič.

Prem'jer-ministr zrabiŭ šerah inšych daručeńniaŭ, jakija tyčacca pavyšeńnia efiektyŭnaści vytvorčaści, adkryćcia novych rynkaŭ, pryciahnieńnia pramych zamiežnych inviestycyj, padtrymki ekspartu, paviedamlaje pres-słužba.

• 0
• 0
• 0
• 0
• 0
• 0
• 0
• 0