«Hary Poter i Orden Feniksa»
U novaj karcinie pavodle ramanu Džaan Roŭlinh – suvoryja palityka-fantazijnyja pryhody, pastalełyja hieroi – … i biełaruskija realii.
Hary Poter i Orden Feniksa (Harry Potter and the Order of the Phoenix)
Vialikabrytanija – ZŠA, kalarovy, 138 chv.
Režyser: Dejvid Jets
Roli vykonvajuć: Denieł Redklif, Rupert Hryn, Ema Ŭotsan, Imelda Staŭntan, Evana Linč, Rałf Fajnz, Hary Ołdmen, Ałan Rykmen, Chielena Bonem-Karter, Robert Hardzi, Ema Tompsan
Žanr: Fantazijna-kazačnyja pryhody pavodle adnajmiennaj knihi Džaan Roŭlinh
Adznaka: 6,5 (z 10)
Hary Potera abvinavačvajuć u chłuśni. U Ministerstvie mahii nia vierać, što Ciomny Łord viarnuŭsia. Ministar Fadž (Robert Hardzi) zasyłaje ŭ čaradziejnuju škołu Chohvardz sałodkahałosuju Dałores Ambrydž (Imelda Staŭntan), jakaja pilnuje, kab škoła adpaviadała dziaržaŭnaj idealohii. Biurakratka Ambrydž raspuskaje ŭsie vučnioŭskija hurtki, uvodzić palicejski režym i zabaraniaje svabodnyja dumki.
Ale nasupierak pieraškodam Hary Poter arhanizuje atrad, dzie školniki vučacca abaraniacca ad złych siłaŭ. Nieŭzabavie im pryjdziecca sutyknucca z bandaj Volandemorta…
Karcina małaviadomaha Dejvida Jetsa pazbaŭlenaja zmročna-iraničnych intanacyj Alfonsa Kuarona (“Hary Poter i viazień Azkabanu”). Jana dalokaja j ad kamičnaj kazačnaści Krysa Kałambusa (pieršyja častki Potera). Piataja seryja – heta Vysokaja Fabryka, dzie kožny składnik filmu vyvierany na kanvejery (vyniki nastolki spadabalisia pradusaram, što Jetsa zaprasili na nastupnuju seryju).
Karcina bahataja na trapnyja aktorskija žesty. Hrymasa prafesara Snejpa (Ałan Rykman), trahičny pozirk Hary Ołdmena, zadumlivaść Łuny Łavhud (Evanna Linč). A hratesknaj isteryki Chieleny Bonem-Karter, jakaja źjaŭlajecca ŭ kadry na niekalki chvilaŭ, zabyć niemahčyma. Što da Imeldy Staŭntan, to stvorany joju vobraz cichmiana-złobnaj ściervy – nat pieraŭzychodzić knižny aryhinał.
Ašałamlalnyja dekaracyi, bojka ŭ Ministerstvie mahii – karcinie chapaje admysłovych efektaŭ, ale akcent zrobleny na psychalahičnych momantach. Hieroi stalejuć – i ciapier užo samastojna, biez ahladki na darosłych, iduć na dvuboj sa złom.
Kali vyjšła piataja kniha pra Hary Potera, vučni zabaronienaha Biełaruskaha liceju, pisali Džaan Roŭlinh, što heta kniha – pra ich. Ciapier na ekranie my bačym aŭtarytarnaje hłupstva, “idejolahaŭ”, strach, jaki skoŭvaje dušu – i niepaźbiežnuju pieramohu dabra nad złom.
Pieramoha hetaja dajecca ciažka (maleńkich dziaciej u kinateatar lepiej nia brać – źlakajucca); ale chto skazaŭ, što kazka – tolki namiok?
Byłoha supracoŭnika kontrraźviedki KDB aryštavali za zdradu dziaržavie9
Kamientary