Аўтар «На ігле» і «Неглыбокай магілы» Дэні Бойл прапануе гледачам вытворча-экзыстэнцыйную жудасную фантастыку пра аднаўленьне Сонца.
Пекла / Сонечнае сьвятло (Sunshine)
Вялікабрытанія, 2007, каляровы, 107 хв.
Рэжысэр: Дэні Бойл
Ролі выконваюць: Кіліян Мэрфі, Роз Бірн, Кліф Кертыс, Мішэль Йеа, Крыс Эванс, Хіраюкі Санада, Трой Гэрыці, Марк Стронг
Жанр: Вытворча-экзыстэнцыйная жудасная фантастыка
Адзнака: 5 (з 10)
Сонца гіне, а разам зь ім гіне й чалавечая цывілізацыя. Каб ажывіць зорку на Сонца адпраўляецца касьмічны карабель з бомбай. Але на Мэркурыі касманаўты знаходзяць чаўнок, які адправіўся да Сонца з аналягічнаю місіяй – і зьнік 7 гадоў таму. Чаўнок спраўны, але экіпаж зь невядомых прычынаў сканаў. Цяпер – пад пагрозаю і новая экспэдыцыя…
У найменшай ступені карціна брытанца Дэні Бойла нагадвае патасныя галівудзкія «Армагедоны». Так, ёсьць місія выратаваньня, але гэтая місія – штодзённая, звыклая, працоўная. Калідоры карабля й магма сонца па-за ілюмінатарам і ў снах – гэта «Касьмічная Адысея» Кубрыка – і «Салярыс» Таркоўскага, а замкнёная прастора спараджае фобіі й экзыстэнцыйную агрэсію. Будзённы гераізм на зломе, невыносны выбар, канфлікт спачуваньня й абавязку… Кіслароду на ўсіх ня хопіць, але трэба выканаць місію – дык каго з экіпажу варта забіць? На траіх касманаўтаў – адзін скафандр – і каму выратоўвацца? «Прахадная» драма залімітнае сытуацыі.
Але гэная драма занадта рацыянальная, амаль вытворчая. З актораў вылучаецца Кіліян Мэрфі – зь якім Дэні Бойл ужо працаваў на зомбі-жахаўцы «28 днях пасьля».
А ў «Пекле» ірацыянальнасьць жанравых кашмараў занадта сьціплая.
Знойдзены чаўнок з сыгналам трывогі («Чужы», «Праз далягляд»), паабпалены й звар’яцелы камандзір карабля, трызьненьне ад сонечнага сьвятла (тэма шальных навукоўцаў, эўрапейскае містыкі й Фрэдзі Кругера)…
Фільм Дэні Бойла выкарыстоўвае ўсё – і не далучаецца ні да чаго. Такім мог быць савецкі фільм пра подзьвігі астранаўтаў, калі б у СССР здымалі касьмічныя фільмы жахаў.
Фільм дэманструецца ў кінатэатрах «Піянэр» 8-10 траўня а 17.40 і 21.20 і ў «Доме кіно» 11-13 траўня а 17.00 і 21.00.
Таксама на экране «Чалавек-павук 3».
Цяпер чытаюць
Аляксандр Надсан першы раз прыехаў у Беларусь пасля сарака гадоў эміграцыі. Мінская моладзь нечакана знайшла ў ім тое, чаго не бачыла ў сваіх бацьках77
Аляксандр Надсан першы раз прыехаў у Беларусь пасля сарака гадоў эміграцыі. Мінская моладзь нечакана знайшла ў ім тое, чаго не бачыла ў сваіх бацьках7
«Калі і прыеду ў Беларусь, то ўжо як турыст». Аргенцінец хацеў зрабіць бізнэс у Беларусі, але яго выслалі за драбязу. Цяпер дазволілі вярнуцца, але ёсць нюанс22
Каментары