«Таварыства мёртвых паэтаў» – выбітная драма Пітэра Ўіра.
Таксама на экране Гарбатая гара
БТ, 22.10
Таварыства мёртвых паэтаў (Dead Poets Society)
ЗША, 1989, каляровы, 128 хв.
Рэжысэр: Пітэр Ўір
Ролі выконваюць: Робін Ўільямз, Робэрт Шон Леанард, Этан Гоўк, Джош Чарльз, Гейл Гансэн, Дзілан Касман, Алелон Руджэра
Жанр: Драма
Адзнака: 8,5 (з 10)
Францускі “Сэзар” за лепшы замежны фільм. У Злучаных Штатах стужка вайшла ў сотню самых касавых за ўсю гісторыю кіно.
50-ыя гады. У элітны кансэрватыўны каледж прыяжджае новы настаўнік літаратуры Джон Кітынг. Замест таго, каб вучыць падлеткаў канфармізму й жорсткім правілам, ён вучыць іх чалавечнасьці й творчае свабодзе. Натхнёныя юнакі ствараюць патаемнае “Таварыства мёртвых паэтаў”, дзе раскрываюць у вершах свае душы. Але ў сыстэмы свае законы – яна не жадае лічыцца са свавольствам і патаемнымі таварыствамі. Ды і ў самой грамадзе ёсьць здраднікі...
Сутыкненьне жывых душаў – і зьмярцьвелага “парадку”, свабоды – і падпарадкаваньня, творчасьці – і прыстасавальніцтва. Гісторыя пра набыцьцё ўласнага твару і свайго голасу – насуперак усім абставінам.
Аўстралійскі рэжысэр Пітэр Ўір, які заўжды распавядаў пра канфлікт штучнага й прыроднага, адухоўленага (“Пікнік ля Навіслай скалы”) – зрабіў настаўнікам школьнікаў камэдыйнага актора Робіна Ўільямза. Ягоны Джон Кітынг вучыць праўдзе сэрца й духоўнае мужнасьці з такой чалавечай пранізьлівасьцю, што гэтыя ўрокі не запомніць нельга. Надзвычай гарманічны й трапны і падбор маладых актораў.
“Таварыства мёртвых паэтаў” – сур’ёзная драма, якая дасягае трагедыйнага накалу і працінае да глыбіні душы. Карціна мела надзвычайны посьпех у Злучаных Штатах і Эўропе.
Цяпер чытаюць
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый7
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы2323
Каментары